1 Mnikovikeli nenga handa vila nenga nimkovikela Kilisito.

2 Ninguwasifila kwaikiva mwenga mngunikumbwiki kumighalu hyogha na hilahila mngukola ghala niwapeghili. 3 Ila ningupala mmanyi yiwa kilongosi wa kila mlumi ni Kilisito, na kilongosi wa mdala ni mlumi, na kilongosi wa Kilisito ni Sapanga. 4 Hinu, kila mlumi mweni kuyupa au kutangasa Habali Maha gha Sapanga kunu kagubika mutu ghaki, hayu angumpughanisa Kilisito mweni kuwela kilongosi ghaki. 5 Ila mdala paanguyupa au kutangasa ujumbi wa Sapanga akiva kahela kigubiko kumutu ghaki, hayu angumpughanya mlumi ghaki, na mdala mweni kughola nagha kangulandana na mdala mweni kumoa hwila ghaki. 6 Ikiva mdala kagubika ng'ogha mutu ghaki, ni mbaha amoi hwila ghaki. Ila kwa vila ni honi kwa mdala kumoa hwila ghaki, ni mbaha agubiki mutu ghaki. 7 Mlumi angupalwa ng'ogha kugubika mutu, kwaikiva mweni ni mlandano wa Sapanga na ukulu wa Sapanga. Ila mdala angulangiha angumtundamila mlumi ghaki. 8 Kwaikiva mlumi kalumbwa ng'ogha kuhuma kwa mdala, ila mdala kalumbwa kuhuma kwa mlumi. 9 Hilahila Sapanga kamlumba ng'ogha mlumi kwaikiva gha mdala, ila Sapanga kamlumba mdala kwaikiva gha mlumi. 10 Ndiwa kwaikiva mdala angugubika mutu ghaki, ili kulangiha yiwa kangulongoswa na mlumi ghaki, na hilahila kwaikiva gha watumikila wa kundumba wa Sapanga. 11 Hata nagha, kukukongana na Bambu mdala bila mlumi kakindu ng'ogha na mlumi bila mdala kakindu ng'ogha kwaikiva kila mmonga angumtegemela myaki. 12 Kwaikiva mdala alumbilwi kuhuma kwa mlumi, hilahila mlumi kangulelwa na mdala. Ila vindu vyogha vinguhuma kwa Sapanga.

13 Mulamuli mwenga wenibaha, ghuli ni maheli mdala kagubika ng'ogha mutu paangumyupa Sapanga? 14 Hata kulumbwa kwa twenga kungulangiha yiwa ni honi kwa mlumi kuwela na hwila ndali. 15 Ila mdala pakawela na hwila ndali ni mghalu gha utundamilu kwa mweni. Kwaikiva mdala apeghilwi hwila ndali ili kumgubika. 16 Handa mundu atekanila mghalu hau, kwa twenga hata kulipinga lya wandu weni kumkwinila Kilisito, twahela ndyangilu gha kusindanila hali.

17 Vila ninguyendelela kuwalaghila hinaa ningulaghila hagha, pamngukonganika mngughola mighalu mihakata kupiti mighalu ghamaha. 18 Kwa kutumbula pamkongana pamonga handa lipinga lyeni kumkwinila Kilisito kunguhumila mikologhanyu, na nenga kughala niyayoghanila ningujumila yiwa ni chakaka. 19 Kiuchakaka ni lasima magombi yahumili paghati gha mwenga ili wala wenikujumilika na Sapanga wamanyikani lipala lipala. 20 Hinu mwenga wakwinila pamngukonganika, mnguliwachila yiwa mngulyegha mulyo kwaikiva gha kukumbwiki lichuwa lya Bambu ila ng'ogha, 21 Kwaikiva pamngulyegha, kila mmonga angughola kwa uloposelo kulyegha mulyo ghaki mwenibaha bila kuwapegha waghangi, na kuwaghola waghangi wahighali na njala na waghangi wakilowela. 22 Ghuli mwenga mvile ng'ogha na mighuta gha kulyeghela na kunyweghela? Au ghuli mnguwapughanya wandu weni kumpughanya Kilisito na kuwataya honi hagha wawela ng'ogha na kindu? Ghuli, niwasifili kuhali? Ng'ogha ninguwasifila ng'ogha kwaikiva gha mghalu hau.

23 Kwaikiva nenga yala mavulo nipokelili kuhuma kwa Bambu ndiwa niwapeghili mwenga, uhiku hula pambila gha Bambu Yesu kukamulwa, atolili libumunda, 24 akamshukwile Sapanga, akametula libumunda, hinu akalonga, "Hau ndiwa mhigha wa nenga kwa ajili gha mwenga, mgholi nagha kwa kunikumbwiki nenga." 25 Hila hila, badili gha kulyegha, akatola kikombi kya divai, hinu akalonga, "Haki ni kikombi kya lilaghano lya hyonu linguhighiliswa kwa mwahi gha nenga, mgholi nagha kila pamnywegha, kwa kunikumbwiki nenga."

26 Kwaikiva kila pamngulyegha libumunda hali na kukinyweghela kikombi haki, mngutangasa kihu kya Bambu, mbaka paahika kangi. 27 Hinu, kila yula mweni kulyegha libumunda hali au kunyweghela kikombi haki kya Bambu vila ipalwa ng'ogha atewela kana sambi kwaikiva atewela kapughanya higha na mwahi gha Bambu. 28 Hinu, kila mundu ajilolesi mweni, hinu alyeghi libumunda na kunywegha divai gha kikombi haki. 29 Kwaikiva mundu yoyose mweni kulyegha na kunywegha bila kumanya mhigha wa Bambu ungumaanisa niki mundu hayu angujilamula mweni. 30 Ndiwa kwaikiva wandu watangala paghati gha mwenga ni wavina na walepelela na wandu watangala paghati gha mwenga wahova kala. 31 Ila tuilolesi maha twenga twaweni ili tukotoho kulamulwa na Sapanga. 32 Ila patulamulwa na kunyokolwa na Bambu angutuvula utundamilu ili tukotoho tukalamulwa pamonga na wandu wa mlima wogha.

33 Kwa nagha, walongo ghangu, pamkonganika pamonga kulyegha mulyo kwaikiva gha kukumbwiki kihu kya Bambu, mlindilani na mkemani. 34 Handa mundu akiva na njala, alyeghi ukaya kwaki ili pamkonganika pamonga mkotoho mkalamulwa na Sapanga. Hai mighalu mighangi nitewavula panitehika.