1 Walongu hinaa niteyanga kila mnikonyili mulihamba lila mniyandikilili.

Mnikonyili, Ni maha mlumi akotoho kuposa? 2 Ila kwaikiva gha kuwela kwa ngongola, kila mlumi angupalwa aweli na mhumbu ghaki mweni, hilahila kila mdala angupalwa aweli na mngwana ghaki mweni. 3 Mngwana angupalwa aweli angumgholela mhumbu ghaki handa ingupalwa amgholeli, hilahila mhumbu angupalwa aweli angumgholela mngwana ghaki handa ingupalwa amgholeli. 4 Mhumbu kahela uweso kunani gha mhigha ghaki bila mngwana ghaki, hilahila mngwana kahela uweso kunani gha mhigha ghaki bila mngwana ghaki. 5 Hinu mkotoho kuleka kupeghana, ila pamlaghana mkotoho kupeghana kwa lipindi mayaghani hela, ili muwesi kuwela na lipindi maha lya mayupu. Mgholi njenji kukongana kangi ili Lihyukana likotoho kuwayesa kwa mwenga kusindwa kufumilila.

6 Ningulonga nagha ng'ogha amuli ila munguwesa kuhaghula mwa weni. 7 Ningapala wandu wogha waweli handa nenga niwela, ila kila mmonga kana hupo ghaki kuhuma kwa Sapanga, mmonga hupo hai na ghangi hila.

8 Hinu wala wogha waposa ng'ogha na wala waposwa ng'ogha pamonga na wala wahumbu wahovitiliwi na wangwana ghao ninguwalongela ni maha wakayendelela kulikala handa nenga. 9 Ila handa ungusindwa kuikanisa mweni, unguwesa kuposa kwaikiva ni mbaha kuposa kupiti kuwela na lumatamata lwa mhigha.

10 Kwa wala waposanili kala ninguwapegha amuli hai, kangi ni gha nenga ng'ogha ila ni gha Bambu, "Mhumbu akotoho kumleka mngwana ghaki." 11 Ila handa kamleka, angupalwa ahighali bila kuposwa, au wapatani na kuhuyilana, hilahila mngwana kapalwa ng'ogha kumleka mdala ghaki.

12 Kwa hagha waghangi ningulonga nagha, hai ng'ogha amuli gha Bambu paikawela mngwana kana mhumbu kakwinila ng'ogha Kilisito ila hayu mdala kajumila kulikala na mweni nenga nonga akotoho kumleka. 13 Namweni mhumbu mkilisito kana mngwana na hayu mngwana kamkwinila ng'ogha Sapanga ila hayu mngwana akajumila kuyendelela nayu akotoho kumleka hayu mngwana. 14 Kwaikiva hayu mngwana au mhumbu mweni kummanya ng'ogha Sapanga angujumilwa na Sapanga kwa kupitila mhumbu ghaki, au mngwana ghaki, handa ingawela ng'ogha nagha hata wana ghao wangalijumilwa ng'ogha na Sapanga, ila hinaa wangujumilwa na Sapanga. 15 Hata nagha, ikiva yula mweni kummanya ng'ogha Kilisito angupala kumleka myaki mweni kumkwinila Kilisito, hinu, na amleki. Kwaikiva hayu mlumi au mdala mweni kukwinila Kilisito kakaniswa ng'ogha. Pamonga na hagha hyogha Sapanga katukema kumlimawogha hau tulikali kwa kuponga. 16 Kwaikiva wenga mhumbu mkilisito unguwesa ghuli kumanya yiwa pangi unguwesa kumlokola mngwana ghako? Au wenga mngwana mkilisito unguwesa ghuli kumanya yiwa pangi utemlokola mhumbu ghako?

17 Kila mundu ayendeleli kulama ngalilu kukovekelana na hupo apeghilwi na Bambu, alami handa vila alamili lipindi paakemilwi na Sapanga milando hai ndiwa hilahila ninguwalongela mapinga gha wogha weni kumkwinila Kilisito. 18 Handa mundu akemilwi na Sapanga akiva kayingiswa jandu, hinu akotoho kujighola yiwa kayingiswa ng'ogha jandu, na handa paakemilwi awelili kayingiswa jandu ng'ogha, hinu na akotoho kuyingiswa jandu. 19 Kwaikiva kuyingiswa jandu au kuleka kuyingiswa jandu kungumanisa ng'ogha kindu, ila kila kyeni kumaanisa kindu ni kukola malaghilo gha Sapanga. 20 Hinu kila mmonga wa mwenga na atami handa kawela paakemilwi na Sapanga. 21 Ghuli, ukemilwi lipindi uwela mhusutu? mghalu hau ukotoho kukughasa. Ila pamonga na yiwa uvili na fwasi gha kuwela mundu pekesu, ila handa bambu ghako kakulekesela ukotoho kuwela mhusutu hinu uyendi zyaku. 22 Kwaikiva mundu yula mweni kukemwa na Bambu akiva mhusutu hayu mundu anguwela mundu pekesu kwa Bambu. Hilahila na yula mundu mweni kukemwa akiva mundu pekesu, ni mhusutu kwa Kilisito. 23 Mhemelwa na Sapanga kwa mahipo yatangala, ili mkotoho kuwela wahusutu wa wandu. 24 Walongo ghangu, kungalilu gha mwenga hyonu pamonga na Sapanga kila mmonga wa mwenga angupalwa kuyendelela kulama kundambu kawela lipindi paakemilwi na Sapanga.

25 Hinaa nitewalongela kunani gha vila mnikonyili kulongelela wala waposwa ng'ogha na waposa ng'ogha, nenga nahela laghililo kuhuma kwa Bambu, ila hagha ni mawachilo ghangu na mwenga mnguwesa kunijumila kwaikiva Bambu kaniwonela luhungu.

26 Kwaikiva gha maghasu matangala gha machuwa hagha, ninguliwachila yiwa ni maha mundu alikali handa kawela. 27 Ikiva uposa kala, ukotoho kuhakula kulekana na mhumbu ghako. 28 Ila pauposa, utewoneka ng'ogha na sambi, hilahila yula aposilwi ng'ogha pakaposwa atewoneka ng'ogha na sambi, ila wala weni kuposana watewela na maghaso kukulama na nenga ningalipala maghaso hagha yakotoho kuwahikila.

29 Walongo ghangu, ningumanisa yiwa lipindi lihighala ni lihupi. Hinaa muweli mngughola mahengu gha Bambu hinu wala weni kuposa waleki kuwawachilila wahumbu ghao weka ila wagholi mahengu gha Bambu. 30 Hilahila weni kulila waweli handa walila ng'ogha, na weni kuhekelela waweli handa weni kuhekelela ng'ogha, hilahila wala weni kuhemela waweli handa wavile ng'ogha na kindu, 31 na wala weni kughayaghaya na hindu gha mlima wogha hau wawoneki handa weni kughayaghaya ng'ogha. Kwaikiva mlima wogha hau upabehi kuhika mwihu.

32 Ningalipala mwenga mkotoho kuwela na holu. Mundu mweni kuposa ng'ogha angughola mahengu gha Bambu, ingumaanisa anguhakula vila anguwesa kumhekelesa Bambu. 33 Ila mlumi aposili angughola mahengu gha mlima wogha, ili ahakuli vila atewesa kumhekelesa mhumbu ghaki, 34 hilahila hayu angukweghwa kunjila ivili, na kangi mdala mweni kuposwa ng'ogha au msikana angughola mahengu gha Bambu. Ajighululi mhigha na mpumulo kwaikiva gha kumhekelesa Bambu. Ila yula mweni kuposwa angughola mahengu gha mlima wogha, ili apati kumhekelesa mngwana ghaki.

35 Milando hai ningulongela ni kwa fwaida gha mwenga, na ng'ogha kuwavikila mwenga ngingamu yoyosi, ila ningupala mgholi yala yangupalwa ili muwesi kumtumikila Bambu kwa moyu wogha.

36 Ikiva handa mundu yeyosi anguliwachila yiwa angumgholela ng'ogha biti amyeghelili lihamba kwa watati ghaki kwa kulindila kumposa na pakalola machuva yanguyenda na lumatamata ghaki lungumghola asindwi kuikanisa mweni hinu na amposi. Kwa kughola nagha atewela ng'ogha kaghola sambi. 37 Ila ikiva mlumi pakapala mweni bila kulasimiswa yiwa niteposa ng'ogha na paikawela atewela ng'ogha na lumatamata kwa wadala hayu angughola maha kuleka kumuposa hayu mdala amyeghilile lihamba kwa watati ghaki. 38 Hinu yula mweni kuposa angughola maha, ila yula mweni kulamula ng'ogha kuposa angughola maha nesu.

39 Mdala mweni kuposwa anguwela pahi gha malaghilo gha mlumi ghaki lipindi lyogha mngwana ghaki pakawela mkomu. Ila handa mngwana ghaki pakahova, mweni anguwela pekesu kuposwa na yula mweni kumpala, ila mngwana hayu aweli mweni kumkwinila Kikilisito. 40 Ila ni maha yula mwenikuhovilwa na mngwana ghaki ahighali bila kuposwa, hagha ni mawachilo gha nenga na nenga ningulonga nagha kwaikiva niwela na Mpumulo wa Sapanga.