1 Lihamba hali linguhuma kwa nenga Paulo, mwenikugholwa kuwela mndumindumi wa Yesu Kilisito kwa mapalo gha Sapanga nikiva baha pamonga na mlongo Timoseo.

Tunguwayandikila lihamba hali lipinga lya wandu wenikumkwinila Sapanga wa haku Kolintu, pamonga na wandu wa Sapanga wogha wenikuwela haku Akaya hyogha.

2 Sapanga Tati wa twenga na Bambu wa twenga Yesu Kilisito awapeghi umaha ghaki na kuponga.

3 Tumyinuli Sapanga, mwenikuwela Tati wa Bambu wa twenga Yesu Kilisito, Tati mweni kuwawonela luhungu wandu na Sapanga wa kutanga kulipindi lya lung'ai. 4 Mweni kututanga lipindi lyogha patuwela na lung'ai ili waghangi pawakolwa na lung'ai, tuwesi kuwatanga handa Sapanga vila angututanga twenga. 5 Kilisito mweni akolilwi na mahakili matangala, na Sapanga akampegha moyu. Hilahila twenga handa watumikila wa Kilisito, tungupokela mahakilo matangala na Sapanga angutupegha moyu. 6 Pamonga na yiwa tunguhakilika kwaikiva gha kuwatanga mwenga na ulokola wa mwenga. 7 Litumaini lya twenga kwa mwenga linguyumbila ng'ogha, kwaikiva tumanya yiwa pamghasika handa twenga ndiwa mngutangwa kulungai halu handa Sapanga atutangile twenga.

8 Walongo, tungupala mmanyi ghala mahakilo yatukolile patuwelile haku kumlima wa Asia. Mahakilo hagha yawelili matopa. Twenga twaweni tuwesili ng'ogha kufumilila, hata tukaliwachila yiwa tungaliwesa kuhova. 9 Kangi twenga twaweni tuliwachilile yiwa kihu kya pabehi na twenga, ila hali likatughola tuleki kulikwinila twaweni na kutumbula kumkwinila Sapanga, mweni kuwahindula wala wenikuhova. 10 Sapanga atulokolile pala patuwelile pabehi na kuhova, na anguyendelela kutulokola, na twenga tumvikila litumaini yiwa atetulokola. 11 Hinu mwenga vila mnguyendelela kututanga kwa kutuyupila, Sapanga ateyanga mayupo gha wandu watangala weni kutuyupila na atetuhighila, Na wandu watangala watemshukwile Sapanga kwaikiva gha umaha ghaki kwa twenga.

12 Hali ndiwa tungulidumbila, na ninguwesa kulonga paluagha yiwa tulamili kwa umaha na uchakaka hula atuhighilile Sapanga, tugholile ng'ogha nagha kwa luhala lwa twenga twaweni ila kwa kutangwa na Sapanga. 13 Tunguwayandikila mwenga mighalu munguwesa kuisoma na kumanya ingulongela niki. Ninguliwachila yiwa mtemanya nesu yiwa ingumaanisa niki. 14 Ndiwa lichuwa lila paatehika Bambu mtelidumbila twenga handa twenga vila tungulidumbila mwenga.

15 Kwaikiva niwelile na litumaini lya kuhika kwa mwenga, nivikili huti lukani lwa kuhika kwa mwenga. Ili mpati kulinoma kwa kuhika mihanja miivili. 16 Nivikile lukani lwa kuwatyangila paniwela mmwanja kuyenda kumlima wa Makedonia na kuhuya kangi kwa mwenga panihuma ku Makedonia, ili mnitangi kumwanja wa kuyenda kumlima wa Yudasia. 17 Mnguwesa kungonya kwa kyani nikaghalambula lukani lwangu. Ghuli, mnguliwachila neka kuliwachila huti kya kughola? Ghuli, mnguwachila ningulongoswa na mawachilo ghangu mweni handa wandu wa kumlima wogha weni kulonga "Ndiwa" na "Ng'ogha" bahala. 18 Sapanga kamchakaka hinu kila tuwalongelile mwenga kya ng'ogha "Ndiwa" au "Ng'ogha" bahala. 19 Kwa nagha Kilisito Yesu, Mwana wa Sapanga, yula nenga na Siliwano na Timoseo, tumtangasili kwa mwenga, kawela ng'ogha mundu wa "Ndiwa" na "Ng'ogha" bahala ila mweni machuwa hyogha ni "Ndiwa." 20 Kwa nagha ghala hyogha ayalongile Sapanga yawela "Ndiwa" kwa njila gha Kilisito, na hai ndiwa kwaikiva tungulonga "Hina" ku Kilisito kwa kumuyinula Sapanga. 21 Hinu hayu mweni kutugangamalisa twenga, pamonga na mwenga ku Kilisito na kutuhaghula ni Sapanga. 22 Hayu kavika Mpumulo ghaki kumioyu gha twenga iweli uhighilisu kwa hyogha ghala atuvikilile kulangiha yiwa twenga ni hindu ghaki.

23 Nihika ng'ogha kangi haku kumlima wa Kolintu kwaikiva nipalile ng'ogha kuwakalipila kwa ghala mgholile, hagha ningulongela uchakaka hata Sapanga angumanya. 24 Tungupala ng'ogha kuwalasimisa mwenga mkwinili niki. Kwaikiva tungukwinila mwenga mgholoka maha kuukwinila. Hinu lukani lwa twenga tungupala tugholi mahengu pamonga na mwenga kwaikiva gha luheku lwa mwenga.