1 Hinu nilamula nikotoho kuwatyangila kangi nikawaghola mnyengemali. 2 Kwaikiva paniwanyengemalisa mwenga, ni ghani atenighola nihekeleli? Ni wala wala niwanyengemasili! 3 Ndiwa kwaikiva nikawayandikila kulihamba lila, lukani panikihika kwa mwenga nikotoho kuhomwa moyu kwa na mwenga wenikupalwa mnipeghi luheku. Nimanyile yiwa nenga paniwela na luheku na mwenga hilahila mtewela na luheku. 4 Paniwayandikilile lihamba lya mtumbulo, niyandikili kunu nikiwela na mnyengemalu na kughasika mmoyu kunu nikilila, niyandikilile ng'ogha ili kuwaghola muweli na mnyengemalo, bali ni kuwalangiha yiwa ninguwapala nesu.

5 Paikawela na mundu yeyosi kamnyengemalisa mundu hayu kanyengamalisa ng'ogha nenga weka ila kawanyengamalisa mwenga wogha na nenga nipalile ng'ogha kuwakalipila. 6 Utoso hula awelile kaupokela kuhuma kwa watangala wa mwenga uhika kunamba yaki. 7 Hinu ni mbaha kwa mundu hayu alekeselwi na kumtaya moyu, ili akotoho kuwela na mnyengemalu nesu na akotoho kutenyuka moyu. 8 Kwa nagha ninguwaluwa nesu, mumlangihi yiwa mngumpala hayu mundu. 9 Lukasini lya nenga kuyandika lihamba lila ni kupala kumanya handa myitikila kughola vila ningupala muweli. 10 Pamumlekesela mundu yeyosi uhakata ghaki, na nenga hilahila nimlekesela. Na handa pakawela na kya kumlekesela, hinu ningumlekesela kwaikiva gha mwenga kunu Kilisito akihighilisa, 11 ili tukotoho kumpegha fwasi lihyukana atungongi, kwaikiva tungumanya kila angupala kukighola.

12 Panihikili kummbwani wa Tiloa kutangasa Habali Maha gha Kilisito, Bambu awagholile wandu waweli kala kuniyoghanila. 13 Ila kula ninyengemangili nesu kwaikiva nimlola ng'ogha mlongo ghangu Titusi, hinu nikawataula wandu wa pala na kuyenda kumlima wa Makedonia.

14 Ila tumshukwile Sapanga, machuwa hyogha mweni kutughola tulongosani kwa usindi tukiwela tukongana na Kilisito. Angututumila twenga ili tulandali umanyi wa Kilisito mahala kogha handa vila manungilo maheli yangulandala kogha. 15 Kwaikiva twenga kwa Sapanga, ni handa manungilo maheli gha Kilisito paghati gha wala weni kulokolwa na wenikuyalamika. 16 Kwa wala wenikulokolwa manungilo hagha ni maheli, yanguwapegha ukomu. Ila kwa wandu weni kuyalamika manungilo hagha ni mahakata, na yanguwapegha kihu. Ghuli ni ghani mweni kupalwa kughola lihengu hali? 17 Wandu watangala wanguyesa kuipatila unaisa kwa kutangasa ujumbi wa Sapanga. Ila twenga ni watumikila wachakaka wa Sapanga, na kwa makakala gha Kilisito tungumtangasa Kilisito kiuchakaka na Sapanga angumanya.