1 Walongo, tungupala kuwapegha habali gha umaha wa Sapanga augholili kumapinga gha wandu wamkwinila Kilisito gha haku Makidonia. 2 Wakwinila hagha wayesilwi nesu na maghasu, ila luheku lwau luhighalile kuwela lukulu, hata wakapegha kwa moyu wa kupegha nesu, pamonga na yiwa wawelili wakapuku nesu. 3 Ninguwesa kuwalongela yiwa kwa uwesa wa weni, na kupiti uwesa wawela nau, kwa kupala kwau wakapegha hindu ghao, 4 watuluwili nesu wapeghwi fwasi gha kukongine na twenga kughola lihengu lya kuwatanga wandu wa Sapanga. 5 Kangi wagholile maha kupiti vila tutumainili, mtumbulo wajihumisili kwa Bambu, na kwa twenga hilahila, handa aipalile Sapanga. 6 Titusi ndiwa mweni mwenikuwaghola mtumbuli lihengu hali maheli kwa mwenga, hinu tumluwili awatangi mwenga kuyomola utumikila hau wa upalo. 7 Mwenga muwela na kila kindu, kukukwinila, kuuwesa wa kulonga, umanyi, kuuwesa wa kutanga kwa njila yoyosi, na kuupalo wa mwenga kwa twenga. Hinu kangi tunguwapala muweli na mpumulo wa upalo kulihengu hali lya kuwatanga waghangi.

8 Ninguwalasimisa ng'ogha, ila ningupala kuwalangiha vila waghangi wawela na kuyangala kukuwatanga waghangi, ili mbati kumanya vila upalo wa mwenga uwela wa chakaka. 9 Kwaikiva mwenga mngumanya umaha wa Bambu wa twenga Yesu Kilisito, pamonga na yiwa awelili na kila kindu, akajighola kapuku kwaikiva gha mwenga, ili kukovekelana na ukapuku ghaki muweli wanaisa.

10 Hali ndiwa ningupala kuwalongela mwenga, yiwa lichuva lya lichu mwenga muwelili wa mtumbulo kupegha hindu gha mwenga na kuwela na luhujulu lwa kughola nagha. 11 Hinu, mtimilisi lihengu hali, na handa vila muwelili na luhujulu lukulu lwa kutanga, hinu myangalai kupegha kukovekelana na uwesa muwela nau. 12 Kwaikiva handa mundu paakawela na moyu wa kupegha, Sapanga angujumila kila kindu angukipegha, Sapanga kangupala ng'ogha kikulu kupiti kila uwela nachu.

13 Lukasini lwa twenga, ng'ogha kulonga mwenga mghasiki na mihighu gha kuwatanga waghangi ila tungupala mlandani. 14 Ila kwaikiva kwa hinaa muwela navyu ni maha kuwapegha wala weni kulepelelwa ili lichuwa mwenga pamtewela walepelelwa na weni watewatanga mwenga, kwa nagha na wogha mtewela mtangana. 15 Kwakughola nagha mtewela mtimilisa yala mayandiko yalongile, "Yula kakungula vitangala, kakungula ng'ogha kupiti myaki, hata yula kakungula mayaghani kapungukilwa ng'ogha."

16 Ningumshukwile Sapanga kwaikiva ampeghili Titusi awelili na luhujulu lwa kupala kuwatanga handa nenga vila niwela na luhujulu lwa kuwatanga. 17 Titusi kayitikila kughola vila tumluwili, kangi mwenibaha kwa kupala kwaki apalili nesu kuwatanga. 18 Pamonga na Titusi, hilahila tungumuyegha mlongo wa twenga mghangi hayu angutundamilwa nesu kukutangasa Habali Maha kumalipinga hyogha yeni kumkwinila Kilisito. 19 Kangi mapinga gha wandu yenikumkwinila Kilisito, yamhaghula mlongo wa twenga hayu ili aweli pamonga na twenga patuyegha mtanga kwa wandu. Lihengu hali, lingumghola Sapanga ayinulwi, kangi lingulangiha vila tungughola kuyangala kuwatanga waghangi.

20 Tunguwela na mwanja na mlongo hayu ili kuhyeta kulalamikilwa kuugholokela wa twenga kuhupo hai tunguitumikila. 21 Lukasini lwa twenga ni kughola gha maha, ng'ogha kuulongolo gha Bambu hela, ila hilahila kuulongolo gha wandu.

22 Hinu pamonga na walongo hagha, tumlaghila mlongo wa twenga mghangi, hayu tumyesa mihanja mitangala tukalola yiwa kana luhujulu lukulunga lwa kuwatanga, hata hinaa kawela na moyu nesu kwaikiva kana kukwinila nesu na mwenga. 23 Hayu Titusi ni myangu, tungughola mahengu pamonga kwaikiva gha mwenga, ila hagha wandu waghangi waivili walaghilwa na mapinga maghangi gha weni kumkwinila Kilisito, na kila wangukighola kingumpegha Kilisito utundamilu. 24 Kwa nagha muwonesi upalo wa mwenga kwa weni, ili mapinga maghangi yeni kumkwinila Kilisito yahighilisi yiwa nichakaka twenga tuwela na upalo, kwa nagha tuweli na lukani lwa kuisifila kunani gha mwenga.