1 Ghuli, tungupala lihamba lya kulitambulisa kuhuma kwa mwenga kuwatangasila waghangi? 2 Mwenga weni baha ni lihamba lya twenga, liyandikilwi mumioyu gha twenga, lingumanyika na kusomwa na wandu wogha. 3 Ni lipala yiwa mwenga mwa lihamba lya Kilisito aliyeghili kwa mawoku gha twenga. Lihamba lyeni liyandikwa ng'ogha kwa kalamu ila liyandikwa kwa Mpumulo wa Sapanga mwenikuwela mkomu, kangi muwela ng'ogha handa lihamba lyeni kuyandikwa kunani gha vipandi gha maganga ila lyeni kuyandikwa kumioyu gha wandu.

4 Tunguwesa kulonga nagha kwaikiva gha litumaini tuwela nalu kwa Sapanga kwa njila gha Kilisito Yesu. 5 Hai ingulangiha ng'ogha yiwa twenga twaweni tunguwesa kughola mghalu wowosi, tuwela na uwesa weni kuhuma kwa Sapanga, 6 hayu ndiwa mweni kutuwesesa kuwela watumikila wa Lilaghanu lya hyonu. Lyenikuwela ng'ogha lilaghano lya laghililo, ila ni Lilaghano lya Mpumulo wa Sapanga. Kwaikiva laghililo liyandikilwi liyeghili kihu, ila Mpumulo wa Sapanga anguyegha ukomu.

7 Paikawela utumikila wa laghililo liyeghili kihu lyenikuyandikwa kwa kuhongola kunani gha vipandi vya maganga lihikili kwa ukulu hata Waizilaili wakawela wanguwesa ng'ogha kuulola wuso wa Musa kwaikiva gha hula ung'anyima ghaki pamonga na yiwa uwelili ni wa lipindi lihupi hela. Hinu paikawela utumikila wa laghililo liyandikilwi inguyambusa kihu igholeka kwa ung'anyimo mtangala kwa nagha, 8 Ghuli, lihengu hali lya Mpumulo wa Sapanga litewela ng'ogha mng'anyimo nesu? 9 Hia ghuli mahengu yeni kuyegha ulokola yatewela ng'ogha na ukulu nesu? . 10 Kukovekelana na hagha ukulu wa lilaghano lya dahile ungulandine ng'ogha na ukulu wa lilaghano lyonu kwaikiva lilaghano lya hyonu liwela na makakala nesu. 11 Hinu handa lila lilaghano lyeni kuwela lya lipindi lihupi liwelili na ukulu, hinaa hali lya machuwa hyogha bila mwihu litewela na ukulu nesu.

12 Kwaikiva hali ndiwa litumaini lya twenga hinu tungulonga bila holu. 13 Twenga tungughola ng'ogha handa Musa mweni kupalwa agubiki wuso ghaki ili wandu Izilaili wakotoho kulola hula mwihu wa kusisila kwa mng'anyimo. 14 Ila malangu ghao yakapokwa umanyi. Mbaka lelo pala palisomwa lilaghano lya dahile, kigubiku haki kikali kuwela, kigubiku haki kitehumiswa pala mundu paatemkwinila Kilisito. 15 Hinu nichakaka mbaka lelo pala Waizilaili pawangusoma laghililo lya Musa malangu ghao yanguwoneka yagubikwa. 16 Ila kinguwesa kuhumiswa kigubiko haki handa Mayandiko gha Sapanga vila yayandikwa kunani gha Musa, "Kigubiko kyaki kihumiswilwi pala paamhyukile Bambu." 17 Nagha "Bambu" ndiwa Mpumulo na pala Mpumulo wa Bambu pakawela kwa mundu yoyose, mundu hayu anguwela pekesu. 18 Hinu twenga wogha weni kuligubika ng'ogha wuso kwa litambala tunguulangiha ukulu wa Bambu handa kiou vila kingulangiha picha, na twenga tungughalambuswa ili tulandani na mweni kuhuma ukulu mmonga mbaka mghangi na Bambu ndiwa Mpumulo mweni kughola nagha.