1 Hinu niteyendelela kuisifila pamonga na yiwa mbata ng'ogha fwaida! Ila ningupalwa kuisifila, kumighalu anilangilili Bambu na kunigubutulila. 2 Ningummanya mundu mmonga mweni kumkwinila Kilisito, na hinaa ipiti kala machuva ikumi na njechi, mundu hayu atolilwi kunani mbaka kundumba kutali nesu handa atolilwi kumhigha au awelili ku Mpumulo, Sapanga weka yaki ndiwa angumanya. 3 Handa niilongile, ni Sapanga hela ndiwa mweni kumanya yiwa mundu hayu kwa lipindi lila awelili kumhigha au Mpumulo, 4 haku akahyoghanila mighalu mitopa kuihimulila, mighalu iwela mundu kanguwesa ng'ogha kuihimulila. 5 Hinu, niteisifila kwa habali gha mundu hayu, na ng'ogha kwa habali gha nenga mwenibaha, niteisifila ulepelelwa ghangu. 6 Handa ningalipala kuisifila, ningawela ng'ogha mndyungi, kwaikiva ningawela ningulonga uchakaka hela. Ila niteisifila ng'ogha kwaikiva ningupala ng'ogha mundu yeyosi akanilola nenga ni mundu mkulu nesu kupiti vila ninguwoneka kughala ninguyaghola na kuhyoghanila.

7 Ila, lukani mighalu hai mikulunga nigubutulilwi ikotoho kunighola niloweli kuisifila, nipeghilwi mahakilo makalipa kumhigha handa mhomi, na hayu ni handa mjumbi wa Lihyukana mweni kunitova, ili nikotoho kuisifila kupiti vila iwela. 8 Nimyupili nesu Bambu mihanja miitatu anihumisili mhomi hau. 9 Ila akaniyanga, "Umaha ghangu ungukukwila, kwaikiva makakala ghangu yanguwoneka pala pauwela ng'ogha na makakala." Hinu, ninguhekelela nesu kuisifila ulepelelo ghangu, ili uwesa wa Kilisito ulikali mghati gha nenga. 10 Kwa nagha ningujumila na ninguhekelelela ulepelelo ghangu, wandu wanguwesa kunilihu nenga, na paniwela mmaghaso, hata panihakilwa ili Kilisito ayinulwi. Kwaikiva lipindi paninguwela nilepelela, ndiwa lipindi Kilisito angunipegha makakala.

11 Nenga niwoneka handa mndyungi, ila mwenga myambusa niweli nagha. Mwenga ndiwa mngalipalwa kunisifila, pamonga na yiwa nenga ninguwoneka nakindu ng'ogha, nenga na mnung'una ng'ogha kupiti weni kuilongela yiwa ni "Wandumindumi wakulu." 12 Lipindi paniwelili kwa mwenga niwelile na ufumilifu na kughola makangaso na vilangihi vyeni kunilangiha yiwa nenga na mndumindumi wa Sapanga. 13 Kwahela mghalu wowosi niugholile kumalipinga maghangi gha wandu weni kumkwinila Kilisito na nilighola ng'ogha kwa mwenga, pangi niwakosela kwaikiva niluwili ng'ogha mtanga kwa vindu ninguvipala, handa hali ndiwa nikosela hinu ninguluwa mnilekeseli.

14 Hinaa ninguliyandala kuhika kwa mwenga lihanja lya itatu, na nitewela ng'ogha na kya kutola kwa mwenga. kwaikiva kila ninguhakula ng'ogha hindu gha mwenga, ila ni mwenga maweni. Machuwa hyogha walela ndiwa wanguwavikila wana vindu na ng'ogha wana kuwavikila vindu walela. 15 Hinu nitehekelela kuhumisa vyogha niwela navyu hata kujihumisa mweni kwaikiva gha kuwatanga. Ghuli mtenipala mayaghani kwaikiva nenga niwapalile nesu?

16 Hinu, kwaikiva niwaghasili ng'ogha kwa kupala hindu kwa mwenga, Ila pangi mundu mghangi atelonga, "Kwa vila Paulo ni mweni malangu, kawakamula kwa ukambenga." 17 Ghuli, nitolili kindu chochose kwa mwenga kwa kuwalulunyanya kupitila wala niwalahighilili? 18 Nimluwili Titusi ahiki kwa mwenga, pamonga na mlongo wa twenga mghangi. Ghuli, Titusi atolili chochosi kwa mwenga? Hinu kwa nagha mmanyi yiwa matendu na ndyangilu gha nenga ni ghala ghala handa gha mweni Titusi.

19 Ghuli, mwenga munguliwachila yiwa kwa lipindi hali lyogha twenga tungulitetela kuulongolo gha mwenga? Twenga tungulongela mighalu hai kuulongolo gha Sapanga tukiwela tukongana na Kilisito. Walongo wapalwa, mighalu hai hyogha ni kwaikiva gha kuwachenga mwenga kuukwinila. 20 Kwaikiva ningutila yiwa lipindi panitehika kwa mwenga, nitewalola ng'ogha vila ninguwachila muwela, na mwenga hilahila ningutila mtenilola ng'ogha vila mnguwachila niwela. Ningutila kuwalola muwela weni mabisanu, na weni wifu na weni lilaka na mkitovana kwa kuipala weni na weni kulongela maha ng'ogha na weni kuwalongela wayenu, na weni kinyengu na mikologhanyu haku. 21 Ikotoho kuhumila pala panitehika kwa mwenga, Sapanga akaghola niloli honi kuulongolo gha mwenga. Na nenga nitelila kwaikiva gha watangala gha wala wagholile sambi na wakaleka kumuhuyila Bambu, wambila kuwela na ndyangilu maha ng'ogha gha ngongola na lumatamata lughangi lula wawelili nalu.