1 Walongo ghangu wapalwa kwaikiva tuwela na malaghanu hagha hinu tujighululi kwa kuleka mighalu hyogha yeni kutughola tokotoho kujumilika na Sapanga kumhigha na kumpumulo na tuyangalai kuwela wandu wa Sapanga tukilikala kukumtundamila Sapanga.

2 Waghanja wa nenga tunguluwa mtupali, tumkosela ng'ogha mundu yeyosi, na tumbyodosa ng'ogha mundu yeyosi, hata kumpokola hindu mundu yeyosi. 3 Ningulonga ng'ogha mighalu hai ili kuwatosa mwenga yiwa mkosa, nilongola kulongela hagha, kwaikiva mwenga muwela kumioyu gha twenga kwa kukala pamonga, na hata kuhova pamonga. 4 Ninguwela ng'ogha na holu paningulonga na mwenga, Ninguitutumulila nesu mwenga, pamonga na maghasu hyogha yatukolile, nipeghilwi moyu nesu na mnighola niweli na luheku nesu.

5 Patuhikili Makidonia, tupumulila ng'ogha. Tughasikili kwa ndambu weka weka, magombi na wandu waghangi na kumioyu gha twenga kuwelili na holu. 6 Ila Sapanga mweni kuwataya moyu wandu weni kunyenyema, akatutaya moyu twenga hilahila kwa kumyegha Titusi kwa twenga. 7 Ng'ogha kwa kuhika kwaki Titusi hela, ila kwa vila mumpeghili moyu. Mweni katulongela vila muwela na luhujulu lwa kunilola, na vila muwela na unyengemalo, na vila mngughola kila kindu kwaikiva gha kunitanga. Mghalu hau ungunihekelesa nesu.

8 Hata paikawela niwahoma moyu, kwa lihamba lila lya mtumbulo, ila ninguliwachila ng'ogha yiwa nikosela, ningumanya yiwa lihamba hali liwanyengamasili mwenga ila ni kwa lipindi lihupi hela. 9 Hinaa ninguhekelela, ila ng'ogha kwaikiva niwagholile mnyengemali, ni kwaikiva unyengamalu wa mwenga uwaghola mghalambuki na kuleka sambi. Unyengamalu hau uyeghilwi na Sapanga, na kwa nagha twenga tuwahakila ng'ogha kwa ndambu yeyosi. 10 Unyengamalu weni kuyeghwa kwa kupala Sapanga lunguyegha kuhyuka na kuhyuka haku kunguyegha ulokola, hinu ungupalwa ng'ogha kuijutila. Ila unyengemalu hula wenikuyeghwa na wandu unguyegha kihu. 11 Mloli hinu! Unyengemalu weni kuyeghwa kwa kupala Sapanga hau uwayeghela fwaida ngulu, uwaghola kuwela na luhujulu lukulunga lwa kughola mighalu yeni kuwatanga, mnguwesa kulitetela yiwa mighalu mnguighola ni chakaka, kuuhyomela uhakata, kumtundamila Sapanga, na kuwela na luhujulu lwa kunilola, na kulola yiwa yula mwenikukosela kagholwa vila ingupalwa agholwi. Ku hagha hyogha ingulangiha yiwa mkosela ng'ogha lolosi kumghalu hau.

12 Hinu, niwayandikilile ng'ogha lihamba kwaikiva gha yula mweni kukosela au yula mweni kukoselwa, ila kuyangala kwa mwenga kwaikiva gha twenga kupati kuhighiliswa kuulongolo gha Sapanga. 13 Na hali ndiwa liwelili litugangamalisa twenga.

Tupeghilwi moyu nesu, ila hilahila Titusi atuhekelesili pala pakatulongela vila mumhekelesa kumoyu. 14 Nenga niwasifila nesu kuulongolo gha Titusi na kumghalu hau mnipegha ng'ogha honi. Tuwalongeli uchakaka machuwa hyogha na kula kuwasifila mwenga kuulongolo ghaki kuwelili mghalu wa uchakaka hela. 15 Nagha upalo wa mweni mkulu kwa mwenga unguyongeseka nesu, pala paangukumbuka uyitikila wa mwenga wogha na vila mumpokela maha kangi kwa holu na kuhihimila. 16 Niwela na luheku kwaikiva ninguwesa kuwakwinila kukila mghalu.