1 Kwaikiva Sapanga katupegha lihengu hali hinu tungutenyuka ng'ogha moyu. 2 Tukanila katu katu kughola matendu gha kifisu yeni honi, hata kuwangonga wandu, hata kuhanganya lilando lya Sapanga na uhwangi ila tungulikala kwa kuulangiha uchakaka ili wandu wogha wamanyi kumioyu ghao yiwa tuwela na uchakaka kuulongolo gha Sapanga. 3 Ila handa Habali Maha hila tunguitangasa imanyika ng'ogha maha kwa wandu, hai ni kwa wala hela weni kukovekela njila gha uyalamiso. 4 Weni wangukwinila ng'ogha kwaikiva yula Lihyukana mlungu wa mlima wogha hau kavika lwisa malangu ghao lukani wakotoho kulola mng'anyimo wa Habali Maha gha ukulu wa Kilisito mwenikuwela mlandano chakaka wa Sapanga. 5 Twenga tungutangasa ng'ogha ujumbi wa twenga twaweni, ila tungumtangasa Yesu Kilisito yiwa ndiwa Bambu, twenga weni ni watumikila wa mwenga kwaikiva gha Yesu. 6 Yula Sapanga mweni kulongela, "Mhana na ulangasi kuhuma mlwisa," ndiwa hayu mweni kulangasa kumioyu gha twenga, na kutuwesesa kumanya ukulu wa Sapanga wenikuwoneka kuwuso wa Kilisito.

7 Hinu, twenga tuwela na hupo kulongela ujumbi wa Sapanga, ila twenga tulepelela handa vyombu vya mlutupi, ili iwoneki lipala yiwa makakala hagha makulu yanguhuma kwa Sapanga na ng'ogha kwa twenga wenibaha. 8 Tungughaswa kwa ndambu wekaweka, ila tungunyengemala ng'ogha. Na kangi tunguwela na holu, ila tungutenyuka ng'ogha moyu, 9 Wandu wangutuhakila, ila Sapanga kanguleka ng'ogha kututanga, na pawangutuguwisa pahi, twenga tungugholoka kangi. 10 Machuwa hyogha wandu wanguhakula kutukoma handa iwonekanili kwa Yesu. Ili ukomu wa Yesu uwoneki mghati gha twenga. 11 Hinaa, twenga wenikuyendelela kulama machuwa hyogha tunguhakulwa tukomwi kwaikiva gha Yesu, ili ukomu ghaki Yesu upati kuhighiliswa kumihigha gha twenga yeni kuhova. 12 Kwa nagha kihu kingughola lihengu mghati mwa twenga, ila ukomu ungughola lihengu mghati gha twenga.

13 Mayandiko gha Sapanga yangulonga, "Nilongile kwaikiva nikwinilili." kwa Mpumulo hayu hayu wa kuwinila hilahila tungulongela kwaikiva tungukwinila. 14 Tungumanya yiwa yula amhindulili Bambu Yesu atetuhindula twenga hilahila pamonga na Yesu na kutuvika kuulongolo ghaki pamonga na mwenga. 15 Mighalu hyogha tunguipokela ni kwaikiva gha mwenga ili umaha wa Sapanga uwahikili wandu watangala, kangi hagha wandu watangala wamshukwile nesu Sapanga na kwa nagha Sapanga ateyendelela kuyinulwa.

16 Kwaikiva gha nagha tungutenyuka ng'ogha moyu hata mayaghani. Pamonga na yiwa mihigha gha twenga inguhakala, ila kwa mghati tungugholwa hyonu kila lelo. 17 Kwaikiva hagha mahakilo tungukolwa nayu ni masokombi hela na gha lipindi lihupi hela, na hagha mahakilo yangutuyandala kuwela tukamala machuwa hyogha bila mwihu weni kuyendelela kuwela mtangala. 18 Hinu vindu vyeni kuwoneka, vingulikala kulipindi lihupi hela. Na ndiwa kwaikiva twenga tunguvika mkasu kuvindu vila viwesa ng'ogha kuwoneka. Ila vindu vila viwoneka ng'ogha vingulikala machuwa hyogha bila mwihu.