1 Ningapala handa mnganifumilila mayaghani, pamonga na yiwa ningulongela undyungi. Pepai mnifumilili. 2 Nenga ningulola wifu kwaikiva gha mwenga ila ni wifu wa Sapanga. Kwaikiva mwenga ni handa msikana mweni kuwela kambila kuwonja na mlumi nenga nikawela msenga ghaki kwa Kilisito. 3 Ila ninguwela na holu yiwa, handa vila Eva, angongilwi na yula njoka mweni kuwela kakalamuka, na mwenga mkangongwa mkaleka kumpala Kilisito kwa mioyu gha mwenga yenikuwela maha. 4 Kwaikiva mwenga mnguwoneka mnguwesa kumpokela na kumjumila mundu yeyosi, mwenikuhika kwa mwenga na kuwalongela Yesu mghangi tumtangasili ng'ogha twenga, au mkapokela mpumulo mghangi mwenikuwela ng'ogha yula mumpokelili, na Habali Maha ilandine ng'ogha na hila tuwatangasilile twenga! 5 Nenga ninguliwachila yiwa wala wenikujikema yiwa "Wandumindumi wakulu," wangulekanika ng'ogha na nenga. 6 Inguwesekana nenga niwesa ng'ogha kulongela maha handa hagha wandumindumi waghangi, ila ningumanya mighalu mitangala na mighalu hai tuilangiha kumahala wekaweka kwa mwenga.

7 Nenga nitangasili kwa mwenga Habali Maha gha Sapanga, bila lihomosi, nikalihulusa ili mbati kuwayinula mwenga. Ghuli, niwelili ngosela? 8 Panigholile lihengu kwa mwenga, vila nivipalile ili mbati kulama vihumili kumapinga maghangi yeni kumkwinila Kilisito, kwa kughola nagha ni handa niwapokela vindu ili mbati kuwatumikila mwenga. 9 Paniwelili na mwenga nimghasa ng'ogha mundu yoyose panipala vindu, walongo kuhuma kumlima wa Makidonia wanyeghilili kila kindu nikipalili. Nikotoho kuwaghasa kwa lipindi lila, na niteyendelela ng'ogha kuwaghasa. 10 Kiuchakaka kwahela mundu yeyosi kumlima wa Akaya mwenikuwesa kungingama nenga nikotoho kuisifila kwa hali. Ningulongela hali kukovekelana na chakaka gha Kilisito yeni kuwela mghati gha nenga. 11 Ghuli, hai ingumaanisa ninguwapala ng'ogha? Ng'ogha, Sapanga angumanya yiwa ninguwapala!

12 Niteyendelela kughola handa ningughola hinaa, ili wandumindumi hagha wenikulikema yiwa, "Wandumindumi wakulu" wasindwi kya kuisifila yiwa wangughola lihengu handa twenga. 13 Kwaikiva weni ni wandumindumi wa uhwangi, wangughola lihengu kwa uhwangi wanguighola yiwa wandumindumi wa Kilisito. 14 Hau ng'ogha mghalu wa kukangasa, kwaikiva hata Lihyukana hilahila linguighola kuwela mtumikila wa mhana! 15 Kwa nagha ikangasa ng'ogha, kwaikiva hata watumikila ghaki wanguwesa kulighola wawoneki handa watumikila wa maha kwa Sapanga. Kumwihu watemanyika kwa matendu ghao.

16 Ninguwalongela kangi, akotoho kuwela mundu yeyosi mwenikuliwachila yiwa nenga na ndyungi. Ila paikawela nagha, hinu mniwachili handa mndyungi, ili mbati kuisifila hata mayaghani. 17 Milando hai ninguilongela gha kuisifila inguhuma ng'ogha kwa Bambu, ila ningulongela mweni handa mundu mndyungi. 18 Kwaikiva wandu watangala wanguisifila handa vila wandu wa mlima wogha waighola, nenga hilahila niteisifila. 19 Mwenga munguilola yiwa muwela na luhala ndiwa kwaikiva mnguyenda pamonga na wandyungi. 20 Mngufumilila na kumjumila hata mundu mweni kuwavika kuuhusutu, mwenikuwahijila na kuwapokola hindu, kangi angulisifila na kuwatofa kuwuso! 21 Ninguilolela honi kujumila yiwa twenga tuwelili walepelelwa kumighalu hyogha!

Ila paikawela mundu kanguwesa kuisifila kwa kindu chochosi, nenga hilahila niteisifila, ila kuisifila haku ni kindu kya undyungi. 22 Ikawela weni ni Wahebulania, hata nenga muebulania. Hilahila ikawela weni ni Waizilaili na nenga ni Muizilaili. Na ikawela weni ni kiwelekwa kya Ibulahimu, na nenga ni muwelekwa wa Ibulahimu. Ghuli, weni ni Waizilaeli? Hata nenga. Weni ni wawelekwa wa Abulahamu? Hata nenga. 23 Hinaa nitelongela handa mndyungi, ikiva weni ni watumikila wa Kilisito, nenga ni mtumikila ghaki kupiti weni. Nitumikila mahengu matangala nesu, niwopwa mihanja itangala nesu, nitovwa nesu, na mihanja itangala nityelembukili kukihu. 24 Mihanja itano nitovwa hyatu iselasini na tisa na Wayahudi. 25 Nitovilwi hyatu mihanja itatu na Waloma, nikatovwa maganga lihanja limonga wakipala kunikoma, nikavetukililwa na whatu ngulunga mihanja itatu, na lihanja limonga nilikalile uhiku wogha na kusinda pamuhi hyogha kubahali. 26 Kumihanja ghangu wekaweka, nikonganili na pabehi na kuhova kumilweni, pabehi kuhova na wapokola, pabehi kuhova kuhuma kwa walongo ghangu, pabehi kuhova kuhuma kwa wandu wa panji, pabehi kuhova kumbwani, pabehi kuhova kumhitu, pabehi kuhova mbahali, pabehi kuhova kuhuma kwa walongo wa uhwangi. 27 Nigholile mahengu na kughasika, niwonjili ng'ogha mihanja itangala, niwelili na njala na uyumililo, mihanja itangala niwopili mulyo na kulikala kulupepo bila nguu zya kuikingila lupepo. 28 Kupiti hagha hyogha, niwelili nikiwachila mapinga hyogha yeni kumkwinila Kilisito. 29 Mundu pakawela kahela makakala na nenga ningulilola nahela makakala, hilahila mundu pakamghola mundu agholi sambi, nenga ninguhyoma.

30 Handa patewela na ulasima kuisifila, hinu niteisifila hila mighalu yenikulangiha ulepelelo ghangu. 31 Sapanga Tati wa Bambu Yesu, mweni kuyinulwa machuwa hyogha bila mwihu, angumanya yiwa ningulongela ng'ogha uhwangi. 32 Paniwelili Damasiko, yula mwenikuwela mkulu wa mmbwani pahi gha Nkosi Aleta avikili watova ngondo ili wanikamuli. 33 Ila nihulusilwi nikiwela mkibeja kikulunga kupitila fwasi zya muluambasa, na nenga nikawesa kunyelembuka.