1 Kwahela lukani lwa nenga kuwayandikila mwenga yala yeni kulongela kuwatanga watumikila wa haku kumlima wa Yudasia. 2 Kwaikiva ningumanya vila muwela na moyu wa kutanga, na nijitutumulili kuwalongela watumikila wa Bambu wa haku Makedonia yiwa "Walongo wa twenga wa Akaya" waliyandala kuhuma lichuva lya lichu. Hinu kuyangala kwa mwenga kupegha kuwasosela wandu watangala. 3 Hinu, niwalaghila walongo wa twenga hagha, ili kuisifila kunani gha mwenga kukotoho kuwoneka yiwa ni milando hela, ila iwoneki yiwa mliyandala na muwela na hau mtanga handa niilongile. 4 Kwaikiva handa panihika haku pamonga na Wamakedonia na kulola mliyandala ng'ogha hai itewela honi kunani gha litumaini lwa twenga kwa mwenga kangi mwenga mtewela na honi yeni kuwesa ng'ogha kulongeleka. 5 Kwa nagha nilola yiwa maha nesu kuwaluwa hagha walongo wa twenga Titusi na wayaki, watulongoli kuhika kwa mwenga, ili muyandali ndambu gha kukungula hupo hila tulaghanili mtepegha kwa mapalo muwela nayu. 6 Walongo mkumbwiki milando hai, "Yula mweni kukulila mbeyu mayaghani, atebena mabeno mayaghani, ila yula atekulila mbeyu zitangala atebena mabeno yatangala." 7 Kila mmonga wa mwenga apeghi kila kalumula kupegha kuhuma kumoyu ghaki, ng'ogha kwa uwimi au kulasimiswa, kwaikiva Sapanga angumpala yula mundu mweni kupala kupegha kwa luheku. 8 Sapanga kanguwesa kuwapegha mwenga kupiti vila mngupala kupokela, ili pamuwela na kila kindu mpati kupegha kukila lihengu maha. 9 Handa iyandikilwi ku Mayandiko gha Sapanga,

"Kapegha kwa moyu wogha,

na anguwapegha wakapuku,

umaha ghaki utelikala machuwa hyogha bila mwihu." 10 Sapanga mweni kumpegha mtukutula mbeyu, na mulyo kwa kila mmonga, hilahila atewapegha mwenga mbeyu mzipala, na ateghola zimeli, na zikuli na kuwapegha mabeno matangala mnguyapokela kwaikiva gha kupegha kwa mwenga lwa moyu. 11 Mwenga mtegholwa kuwela wanaisa kukila kindu ili machuwa hyogha mulangihi moyu wa kupegha. Na Sapanga ateyinulwa kwa lihengu tuligholile kwa mwenga. 12 Kwaikiva utumikila hau maha munguughola ng'ogha kwaikiva gha kukwila malepelelu wawela nayu watumikila wa Sapanga, ila hilahila kunguwaghola wandu watangala wamshukwile Sapanga. 13 Kukovekelana na ghala yeni kuwoneka kulihengu lya twenga hali, wandu watemyinula Sapanga kwaikiva gha mwenga kukwinila Habali Maha gha Kilisito munguitangasa kuulongolo gha wandu, na kwaikiva gha moyu wa kupala kuwapegha wandu wogha hindu gha mwenga. 14 Kwa nagha watewayupila mwenga kwa moyu, kwaikiva gha umaha muulangisili. 15 Tumshukwile Sapanga kwaikiva gha hupo ghaki ngulu, yeni kuwesa ng'ogha kulandaniswa atupeghili!