1 Nenga Paulo mweni kuwoneka mnyalinyali paninguwela pamonga na mwenga, ila ni mkalipa paninguwela kutali na mwenga, ninguwaluwa nesu kwa unyenyekela na unyalinyali wa Kilisito. 2 Ninguwaluwa ili pala panitehika kwa mwenga, mkotoho kunighola niweli mkalipa. Kiuchakaka nitewela mkalipa nesu kwa wala wogha wenikuliwachila yiwa twenga twa handa wandu wamtundamila ng'ogha Sapanga. 3 Pamonga na yiwa tungulikala kumlima wogha, ila tungutovana ng'ogha ngondu handa vila wandu wa kumlimawogha wangutovana. 4 Kwaikiva vila vindu tungutumila patungutovana, ng'ogha vitovanilu vya kumlima wogha hau, ila ni makakala gha Sapanga yeni kubomola ngomi zyogha, tunguyalamisa mawachilo hyogha gha uhwangi, 5 na kubomola kila ngingamu yeni kugholoka na kungingama umanyi wa Sapanga, tungukamula kwa makakala mawachilo hyogha na kuyaghola yamyitikili Sapanga. 6 Pamuwela mnguyitikila nesu, twenga tutemnyokola kila mundu mweni kuyitikila ng'ogha. 7 Mwenga mngumlola mighalu kwa panje hela. Ikiva kuwela na yeyosi mweni kuliwachila yiwa mweni ni hindu gha Kilisito weka yaki, hayu na atuwachilile na twenga hilahila twa hindu gha Kilisito handa vila mweni kawela. 8 Ningulola ng'ogha honi kuisifila uweso hula Bambu katupegha, kwaikiva uwesa hau ng'ogha wa kuwabomola ila wakuwatanga kuwachenga kuukwinila. 9 Nenga mbala ng'ogha mliwachili namkalipa kwa ghala niwayandikilile. 10 Mundu anguwesa kulonga, "Milando iyandikilwi na Paulo yawelili makalipa nesu, ila paanguwela na twenga kangukalipa ng'ogha, na milando ghaki paangulonga ni gha unyalinyali." 11 Mundu handa hayu angupalwa amanyi yiwa kwahela mlekanu wowosi paghati gha milando tuyandika patunguwela kutali, ila ndiwa tungughola patunguwela ndundandunda. 12 Kwaikiva tunguwesa ng'ogha kuyesa kujivika au kuilandanisa na wala wandu weni kuisifila weni. Wandu weni kuilola yiwa weni bahala ni kipimu kya kuipimila, na wandu weni kuilandanisa weni kwa weni, hagha ni wandyungi. 13 Ila twenga tuteisifila ng'ogha kupiti vila tunguwela, kuisifila haku kutehighala kukila kipimu kya lihengu lila atupeghili Sapanga, lihengu lila tungulighola hilahila kwa mwenga. 14 Handa tungawela tungulidumba tungalihika ng'ogha kwa mwenga, ila twenga tuwelili wa mtumbulo kuhika kwa mwenga kutangasa Habali Maha gha Kilisito. 15 Kangi tunguisifila ng'ogha kunani gha mundu mghangi, ila tungutegemela ukwinila wa mwenga vila unguyendelela kuyengeseka kukula, lihengu lya twenga litewela linguwoneka likulunga nesu. 16 Kwa nagha tutewesa kutangasa Habali Maha kumlima mghangi kutali na mwenga muwela. Kwaikiva tungupala ng'ogha kuisifila lihengu ligholeka kala na mundu mghangi kumahala kughangi. 17 Handa Mayandiko vila yayandikwa, "Mweni kuisifila na aisifili kwa kughola lihengu lya Bambu." 18 Kwaikiva mundu mweni kujumilika ng'ogha yula mweni kuisifila mweni, ila ni yula mundu mweni kusifilwa na Bambu.