1 Kwaikiva tungumanya yiwa mihigha tungulikala mghati ghaki haku kumlimawogha ni handa mighuta, na hai mighuta gha twenga paiyalamiswa. Tuwela na lighuta lyeni kuhuma kwa Sapanga, lighuta lichengwa ng'ogha kwa mawoko na lyeni kuwela lya machuwa hyogha bila mwihu haku kundumba. 2 Hinaa, lipindi tuwela na mihigha hai mumlima wogha, tungulila mghati kwa mghati, tukiwela na luhujulu lwa kuyenda na kulikala kulighuta lya twenga kundumba. 3 Kwaikiva Sapanga paatetupegha mihigha mihyonu, mipumulo gha twenga itewela na mihigha kulama mghati ghaki machuwa hyogha bila mwihu. 4 Patuwela tukali kulighuta hali lya kumlima wogha ingumaanisa mihigha gha twenga, tungulila kwa kughaswa na mighalu mitangala, ng'ogha kwaikiva tungupala kuwoposola mhigha hau wa kuhova, ila tuwela na luhujulu lwa kuvaliswa hula mhigha wenikuhova ng'ogha, ili hula mhigha weni kuhova ughalambulwi na kuwela mkomu. 5 Sapanga mweni ndiwa mweni kughola maghalambulo hagha, na mweni katupegha Mpumulo ghaki kutughola tumanyi yiwa chakaka ateghola hagha.

6 Kwa nagha machuwa hyogha tuwela na wakamala, tungumanya yiwa lipindi patuwela kumhigha hau, ni kulikala kutali na Bambu. 7 Kwaikiva tungulama kwa kukwinila, na ng'ogha kulola. 8 Chakaka tuwela na litumaini na tungalipala hata kuhuka kumhigha hau, na kulikala na Bambu. 9 Kwa nagha handa tuwela kumhigha hau au tuwela kutali na weni, lukani lwa twenga ni kumuhekelesa Sapanga. 10 Kwaikiva twenga wogha tutegholoka kuulongolo gha kitamilo kya utoso kya Kilisito, ili kila mmonga apokeli kila angupalwa kupokela kukovekelana na ghamaha au ghala mahakata ayagholile lipindi angulikala haku kumlimawogha.

11 Hinu, twenga tungumanya kumtundamila nesu Bambu, na tunguyangala kuwayegha wandu kwa Kilisito. Sapanga kangutumanya kinaga ubaga, na nenga ninguliwachila hilahila mwenga mngutumanya maheli nesu. 12 Tungupala ng'ogha kuisifila kangi kwa mwenga, ila tungupala kuwalongela kila mngupalwa kuisifila kwaikiva gha twenga, ili mpati kuwela na milando gha kuwayanga wala weni kuidumba kuulongolo gha wandu, wanguleka kuisifila ghala yenikuwela mumioyu ghao. 13 Kwa wandu waghangi, tunguwoneka wandyungi. Na hai ni kwaikiva tungupala kumtumikila Sapanga. Ila patuwoneka na malangu maha, hinu nikwaikiva gha kuwatanga mwenga. 14 Kwaikiva mapalo gha Kilisito yangutulongosa wogha weni kumanya yiwa mundu mmonga hela ahovili kwaikiva gha wogha na hai ingumanisa yiwa wogha wangukongine kihu kukyaki. 15 Ahovili kwaikiva gha wandu wogha, ili wala wangulama wakotoho kulama kwaikiva gha wenibaha, ila walami kwaikiva gha mweni kuhova na kuhinduka kwaikiva gha weni.

16 Nagha kutumbula hinaa na kuyendelela kumlola na kumtosa ng'ogha mundu yeyosi kwa njila gha kimundu, hata handa tumtosili Yesu Kilisito kwa kumlola ila hinaa tungumtosa ng'ogha kangi kwa kumlola. 17 Mundu pakanguwela mghati gha Kilisito, kanguwela kiumbi kihyonu, mighalu gha dahile ingupita, na kila kindu kinguwela kihyonu. 18 Hyogha hagha yanguhuma kwa Sapanga yula mweni kutukonganisa twenga na mwenibaha kupitila Kilisito, na mweni kangi katupegha lihengu lya kuwakonganisa wandu na Sapanga. 19 Hai ingumaanisa, Sapanga ndiwa mwenikuwela akiwakonganisa wandu wogha na mwenibaha kwa njila gha Kilisito akileka kuvalanga sambi syau. Na mweni katupegha ujumbi wa kuwakonganisa wandu.

20 Twenga tulaghilwa na Kilisito tulongi na wandu. Na Sapanga mweni angututumila twenga kuwaluwa nesu mwenga, na twenga tunguwaluwa kwa njila gha Kilisito mkonganiswi na Sapanga. 21 Kilisito kahela sambi, ila Sapanga amgholili kuwela na sambi kwaikiva gha twenga ili kwa kukonganiswa na hayu Kilisito ili tuwese kughola yala kanguyapala Sapanga.