1 Twenga tungughola lihengu pamonga na Sapanga, tunguwaluwa mkotoho kuleka umaha wa Sapanga muupokelili uyaghaniki hela. 2 Sapanga angulonga kumayandiku ghaki,

"Lipindi lipalilwi nikuyoghanili.

Na kulichuwa lya ulokola nikakutanga". Hinu, hinaa ndiwa lipindi lya ulokola.

3 Hinaa tungughola ng'ogha lolosi lyenikuwesa kuwahakila waghangi, lukani utumikila wa twenga ukotoho kulongelwa maha ng'ogha. 4 Ila tungulangiha yiwa chakaka twenga twa watumikila wa Sapanga kwa kila kindu. Kwa kufumilila kutangala, hata patungukongine na mahakata hyogha. 5 Tutovilwi na kuvikwa mumighuta gha kuwopila wandu na tugholelwa fuju na tungughola mahengu yakamala na tuwonja ng'ogha na tusindili na njala. 6 Tunguhighilisa yiwa twenga ni watumikila wa Sapanga kwaikiva gha ngalilu gha twenga gha moyu maheli, kwa umanyi maha wa lilando lya Sapanga, kwa ufumilifu na kwa upalo wa chakaka na kulongoswa na Mpumulo wa Sapanga, 7 kangi tunguwonesa kwa njila gha kutangasa ujumbi wa chakaka tungughola hagha hyogha kwa makakala gha Sapanga. Kujumilwa na Sapanga ndiwa vindu vya kutovanila mngondu twenga kwa kila upandi. 8 Tujiyandala kutundamilwa na kupughanywa, na kulongelwa maha ng'ogha na kulongelwa maheli. Tunguwoneka ni wahwangi ila tungulonga uchakaka, 9 handa wandu tumanyika ng'ogha ila tungumanyikana kwa wandu wogha, weni kutovwa ila tuhova ng'ogha na handa wandu weni kuhova ila twa wakomu. 10 Tuwela na unyengemalu nesu, ila tunguwoneka na luheku kila lelo. Tunguwoneka wakapuku, ila tunguwaghola wandu watangala kuwela wanaisa, twawoneka yiwa wandu tuwela ng'ogha na chochose, ila tuwela na kila kindu.

11 Walongu Wakolintu, tunguwapala nesu kwa mioyu gha twenga wogha. 12 Twenga tuleka ng'ogha kuwapala mwenga, ila mwenga mleka kutupala. 13 Ningulonga na mwenga handa ningulonga na wana ghangu, hinu pepai muwonesi upalo hilahila kwa moyu gha mwenga wogha.

14 Mkotoho kukongine na wandu weni kukwinila ng'ogha. Ghuli, umaha na uhakata vitewesa kulikala pamonga? Mhana na lwisa vitewesa kuwela pamonga? 15 Kilisito kanguwesaghuli kuyenda pamonga na Lihyukana? Mundu mweni kukwinila kana ughanja ghani na yula mweni kukwinila ng'ogha? 16 Lighuta lya Sapanga liwela na ughanja ghani na ming'omung'omu gha uhwangi? Kwaikiva twenga ni lighuta lya Sapanga avile mkomu. Handa Sapanga mweni ailongile,

"Nitelikala na weni,

na kuwela paghati gha weni,

Nitewela Sapanga wa weni

na watewela wandu wa nenga." 17 Kwa nagha Bambu angulonga kangi,

"Mhuki paghati gha weni,

mjibhaghuli paghati gha weni,

mkotoho kuyavisa chochosi kyeni kuwela mwiku kwa mwenga,

na nenga nitewapokela. 18 Nenga nitewela Tati wa mwenga,

mwenga mtewela wana wa nenga, walumi kwa wadala,

Bambu mweni makakala angulonga."