1 Walongo ghangu, kindu ningupala na mayupo ghangu kwa Sapanga ni walongu ghangu Waizilaili wapati kulokolwa. 2 Kwa ikiva ninguwesa kuhighilisa badili gha weni yiwa wanguyangala nesu kumuhaka Sapanga, ila kuyangala haku wangutumila ng'ogha malangu gha chakaka. 3 Kwaikiva wamanyile ng'ogha vila Sapanga anguwajumila wandu yiwa wamaha na wakajihakulila njila ghao weni gha kuwela na haki. Wakalema kukovekela njila gha kujumilwa na Sapanga kuulongolo ghaki. 4 Kwaikiva Kilisito atimilisili mighalu hila selia iwelili ingukipala ili kila mweni kukwinila ajumilwi na Sapanga yiwa kamaha.

5 Musa ayandikili yala yenikumghola mundu ujumilwi na Sapanga kuulongolo ghaki kwa kupitila selia, "Mundu yoyosi mweni kutimilisa hagha yailongilile selia atelama." 6 Ila havi ndiwa ingulongwa kwa habali gha kujumilika kuulongolo gha Sapanga kwa kupitila ukwinila, "Ukotoho kuilongela mmoyu, ni ghani atekwela kundumba?" Ingumaanisa kumuhulusa Kilisito pahi. 7 Hilahila ukotoho kuikonya, "Ghani ateyenda kumambi akamlongela Kilisito ahinduki?" Ingumaanisa kumkwelesa Kilisito kuhuma kukihu. 8 Ila Mayandiko gha Sapanga yangulonga nagha, "Ujumbi hau wa Sapanga uvile pabehi na wenga, uvile mumlomo ghako na mmoyu ghako" na hau ndiwa kula kukwinila tungukutangasa. 9 Ikiva utelonga kiuhighgiliso kwa mlomo ghako wenga mweni yiwa Yesu ni Bambu na kukwinila mmoyu ghako yiwa Sapanga ndiwa amhindulili kuhuma kukihu, utelokoka. 10 Kwaikiva mundu angukwinila kwa moyu akajumilwa kuulongolo gha Sapanga, na angulongela kiuhighiliso kwa waghangi mweni handa mweni kwa mlomo ghaki atelokolwa. 11 Handa Mayandiko gha Sapanga yailongile, "Yoyose mweni kumkwinila Kilisito atekolwa ng'ogha na honi." 12 Mghalu hau ni wa wogha kwaikiva kwahela mlekano paghati mwa Wayahudi na Wayahudi ng'ogha, mweni ni Bambu wa wogha, mweni ni mlungwana kwa wogha weni kumyupa mtanga. 13 Kwa ikiva Mayandiko yangulonga, "Kila mundu ateyupa kwa lihina lya Bambu, atelokolwa." 14 Hinu, watemyupaghuli yula avile wamkwinila ng'ogha? Kangi, watemkwinilaghuli ikiva wayoghanilili ng'ogha habali zyaki? Na wateyoghanilaghuli habali zyaki ikiva kwahela mtangasa? 15 Na wandu watetangasaghuli handa wayeghwa ng'ogha? Handa ingulongwa ku Mayandiko gha Sapanga, "Ulolayi vila ivile maha kuhika kwa wala weni kuyegha Habali Maha." 16 Ila ng'ogha wogha wayitikilili hila Habali Maha. Kwaikiva Isaya mlota wa Sapanga mweni ailongile, "Bambu, ni ghani avile kakwinila ujumbi wa twenga?" 17 Hinu, mtumbulo wa kukola ukwinila ni kuhyoghanila Habali Maha hila imlongela Kilisito. 18 Ila ningukonya, ghuli, wayoghanila ng'ogha hau ujumbi? Hina, chakaka wauyoghanila, handa mayandiko yangulonga,

"Wandu wayoghanila ujumbi gha Sapanga mahala kogha mumlimawogha,

milando ghao ihika mbaka mwihu gha mmbali gha mlima wogha." 19 kangi ningukonya, Ghuli, inguwesekana yiwa wandu wa Izilaili wamanyili ng'ogha? Musa mweni baha ni wa mtumbulo kuyanga,

"Nitewaghola mwenga weni

kuwela wandu ghangu muwawoneli wifu

wala wandu wavile ng'ogha Wawaizilaeli pala paniwahighila kwaikiva wanikwinila,

nitewaghola muweli na lilaka kwa hagha weni kuwela wandu ghangu ng'ogha." 20 Kangi Isaya mwenikuwela mlota wa Sapanga alongile kwa uhighiliso,

"Wala wavile wanihakula ng'ogha wanilola,

nijilangiha kwa wala weni kukonya ng'ogha habali zyangu." 21 Ila kwa Waizilaili angulonga nagha, "Pamuhi hyogha niwakemili wandu ghangu wanihuyili wandu watatala na weni kuyitikila ng'ogha."