1 Mumkemi yula mweni kuwoneka mng'enya wa kukwinila, ila mkotoho kusindana kwa mawachilo ghaki. 2 Wamonga gha wandu wangukwinila wangulyegha kila kindu, ila weni kukwinila mayaghani wangulyegha vindu mayaghani. 3 Mundu mweni kulyegha kila kindu akotoho kumpughanya yula kawesa ng'ogha kulyegha kila kindu, na yula mweni kulyegha likolo lya mahamba weka yaki hilahila akotoho kumlamula yula mweni kulyegha kila kindu, kwaikiva Sapanga kamjumila. 4 Wenga kwa ghani hata uyesi kumlamula mtumikila wa mundu ghangi? Kwaikiva bambu ghaki ndiwa angumanya yiwa kaghola gha maha au ng'ogha. Na mtumikila ghaki ateghola handa ingupalwa kwaikiva Bambu ndiwa mwenikuwesa kumtanga agholi vila ingupalwa. 5 Mundu anguwesa kuliwachila yiwa lichuwa litenu lya maha kupiti lichuwa ghangi, Hilahila mundu ghangi anguwesa kuliwachila yiwa machuwa hyogha gha maha. Kila mmonga na akovekeli vila angukwinila. 6 Yula mweni kuvalanga lichuwa litenu yiwa lya maha kupiti lichuwa ghangi, angughola nagha kwa kumtundamila Bambu. Na mweni kulyegha vindu vyogha angughola nagha kwa kumtutundamila Bambu, kwaikiva angumshukwile Sapanga, na yula mweni kulyegha amonga hela gha vindu angughola nagha kwa Bambu na kumshukwile Sapanga. 7 Kwaikiva kwahela mundu yoyosi paghati mwa twenga mweni kulama kwaikiva angupala kulama, hilahila kwahela yula mweni kuhova kwaikiva angupala ahovi. 8 Hinu ikiva tungulama, tungulama kwaikiva gha Bambu, na ikiva tunguhova, tunguhova kwaikiva gha Bambu. Kwa nagha ikiva tungulama, au ikiva tunguhova, twenga twa wandu wa Bambu. 9 Kwaikiva Kilisito ahovili na akahinduka ili apati kuwela Bambu wa weni ukomu na wahovili. 10 Hinu kwa kyani wenga ungumlamula mlongo ghako? Au kwa kyani wenga ungumpughanya mlongo ghako? Ikiva wogha tutegholoka kuulongolo gha kikalilo kya ulamulo kya Sapanga. 11 Kwaikiva Mayandiko yangulonga,

"Handa vila ningulama,

kila mundu atenitovela manung'una kuulongolo gha nenga,

na kila mundu atetundamila yiwa nenga ni Sapanga."

12 Kwa nagha kila mundu paghati gha twenga atelitetela mweni handa mweni kuulongolo gha Sapanga.

13 Hinu tukotoho kulamulana badili ghaki mkoli lukani hali, mundu akotoho kughola kindu kinguwesa kumngingama au kumguwisa mlongu ghaki kusambi. 14 Mkonganiku ghangu na hayu Bambu Yesu, kungunihighilisila yiwa kwahela kindu chochosi kiwela mwiku kulyegha, ila mundu pakaliwachila yiwa mulyo mtenu unguwela mwiku kulyegha kuulongolo gha Sapanga, hinu kwa mweni kinguwela mwiku kulyegha. 15 Ikiva mlongo ghako angunyengemala kwa kila ungukilyegha, hinu wenga unguyendana ng'ogha na upalo. ukotoho kuleka kila ungukilyegha kimyalamisi mlongo ghako yula mweni kuwela Kilisito kahova kwaikiva gha mweni. 16 Hilala, Mkotoho kujumila kindu kila mkilola yiwa kwa mwenga ni maha kikamghola myako agholi sambi. 17 Kwaikiva unkosi wa Sapanga ng'ogha kwaikiva gha kulyegha na kunywegha, ila ni pamonga na haki, kulikala kwa kukotoho kutovana na luheku lweni kuyeghwa na Mpumulo wa Sapanga, 18 kwa ikiva mundu yoyose mweni kumtumikila Kilisito kwa njila hai, angumpala Sapanga na angujumilwa na wandu. 19 Kwa nagha na tuyangalai nesu kughola mighalu hila yeni kuyegha kulikala kwa kukotoho kutovana kweni kututanga kuchengana twenga kwa twenga. 20 Hinu, mkotoho kuyalamisa lihengu lya Sapanga kwaikiva gha mulyo. Chakaka milyo hyogha ni maha, ila maha ng'ogha kulyegha kindu chochosi kyeni kumghola mlongo ghako alikwali msambi. 21 Mbaha kuleka kulyegha liwondu, kunywegha divai, au kughola chochose kila kyeni kumghola mlongo ghako alikwali msambi. 22 Hinu, Hinaa mwenga kila mngukikikwinila kunani gha mghalu hau iweli kifisu kya mwenga na Sapanga. Wahighilwa wandu wala wangujilamula ng'ogha kumoyu ghao yiwa ni maha ng'ogha. 23 Ila wandu wala weni kulola holu kwa mulyo hula wanguulyegha, hagha watelamulwa na Sapanga kwaikiva wangughola kila wangukwinila ni kihakata kuulongolo gha Sapanga.