1 Hinu, ghanja, handa unguwalamula waghangi, katu utewesa ng'ogha kulitetela, pamonga na yiwa wenga kwa ghani. Kwaikiva, kwa kuwalamula waghangi, ungujilamula mwenibaha kwa vila na wenga ungughola mighalu hai hai unguwalamula wayako. 2 Hinu tungumanya yiwa lamulo lya Sapanga ni lya chakaka pala paawalamula wandu handa hagha. 3 Ila wenga ghanja unguwalamula wala wangughola mighalu handa hai na kunu wenga kangi ungughola hai hai, ghuli unguliwachila yiwa utehyeta lamulo lya Sapanga? 4 Au unguupughanya ulungwana ghaki utangala, kutama nuu kwaki Sapanga na kufumilila kwaki, wenga umanya ng'ogha yiwa ulungwana ghaki unguwesa kukutaya moyu ili kuulongolo uhyuki na uleki sambi? 5 Ila kwaikiva gha ungakatalu wa moyu gha wenga hula upala ng'ogha kuleka sambi, ungujidilundikila mnyokulu kwa lichuwa lila lya ulamulo lipindi ulamula wa haki pauhighiliswa. 6 Lichuwa hali Sapanga atempegha kila mmonga kukovekelana na angupalwa kupokela. 7 Wala weni kuyendelela kughola matendu gha ulungwana na kuhakula kutundamilwa nesu kuhuma kwa Sapanga, na kupokela ukomu weni kuwela ng'ogha na mwihu. Na mweni Sapanga atewapegha ukomu wa machuwa hyogha bila mwihu. 8 Ila kwa wala watekovekela mighalu ghao weni baha, waleka chakaka gha Sapanga na kukovekala njila zihakata, kutevile na mnyokolu na lilaka kwa weni kuhuma kwa Sapanga. 9 Hila hila kutewela na mahakilo na lung'ai vitemkola kila yula mweni kughola mahakata, Myahudi atewela wa mtumbulo na kuulongolo atekovekela Mgiliki. 10 Ila kila wandu wangughola ulungwana Sapanga atewapegha ujumilo, utundamilu na kulikala kwa kuponga, watetumbula Wayahudi, hinu wandu wa milima ghangi hilahila. 11 Kwaikiva Sapanga kawela ng'ogha na ubaghula. 12 Kwaikiva wandu wogha waigholile sambi lipindi wavile ng'ogha na selia gha Sapanga ampeghili Musa wateyalamiswa panji gha hali selia, na wala wagholile sambi lipindi lya selia gha Sapanga ampeghili Musa na weni wakatenyula watelamulwa kupitila hai selia. 13 Kwaikiva ng'ogha wala wanguyitikila selia gha Sapanga ampeghili Musa ndiwa watewela walungwana kuulongolo gha Sapanga, ila ni wala wangutundamila selia ndiwa watevalangilwa yiwa walungwana. 14 Wandu wavile ng'ogha Wayahudi wamanyile ng'ogha selia ila pala pawagholile mighalu maha kwa kulongoswa na mioyu ghao na mighalu hai ni handa selia ingupala hagha wangutimilisa selia vila ingupala. 15 Kuzyowelela kwao kungulangiha yiwa lila lipalwa kugholeka vila selia ingupala liyandikwa kumioyu ghao. Uwesa ghao wa kulamula kughola ghamaha au mahakata lipindi ghangi yanguwalamula, na lipindi ghangi yanguwatetela. 16 Ndiwa itewela lipindi lya ulamulo, pavile Sapanga kwa njila gha Kilisito Yesu, atetosa wandu kwa mawachilo ghao gha mkifisu. Habali Maha ninguitangasa ndiwa ingulongela.

17 Ila wenga ungujikema Myahudi na unguhyagamila selia gha Sapanga ampeghili Musa na kuitutumulilila Sapanga, 18 hilahila unguyamanya ghala Sapanga angupala, na unguijumila mighalu ivile maheli, na wenga uvulilwi kupitila selia, 19 hilahila wenga unguitutumula yiwa kwa kilongosi wa wangali mihu, na kwa mhana kwa wala weni kuwela mlwisa. 20 Na wenga unguilola kwa mvula wa wandyungi na mvula wa wavile wasoma ng'ogha. Uvile na mavulo gha chakaka kuhai selia, 21 Hinu, wenga unguwavula waghangi, Kwa kyani uwesa ng'ogha kuivula mweni baha? Unguwatangasila waghangi wakotoho kuhija, ila wenga mweni unguhija? 22 Ungulonga, "Mkotoho kughola ngongola," na kunu wenga ungughola ngongola unguhyomela ming'omung'omu gha milungu ila ungulighola uweli mnaisa kwa kuhija kumaghuta gha Sapanga. 23 Wenga mweni kuighola yiwa ungumanya selia zya Sapanga ghuli ungulola ng'ogha yiwa ungumlighu Sapanga? kwa kukotoho kukovekela vila selia ingupala. 24 Handa iyandikwa, "Kwaikiva gha mwenga, lihina lya Sapanga lingulighwa paghati gha wandu wa milima." 25 Kuyingiswa jandu kwa maha ikiva unguyitikila Selia, ila ikiva ungutenyula Selia, kuyingiswa jandu kwa wenga kutewela yaghi yaghi. 26 Ikiva mundu Myahudi ng'ogha mweni kuyingiswa jandu ng'ogha, na angukola selia, ghuli Sapanga atemvalangila ng'ogha yiwa kayingiswa jandu? 27 Ndiwa wala Wayahudi ng'ogha wavile kihigha wayingiswa ng'ogha jandu ila wangughola vila selia ingulonga watewalamula mwenga Wayahudi, mvile myingiswa jandu na kuimanya nesu selia gha Sapanga ila muighola ng'ogha. 28 Ng'ogha kila mundu mweni kuwelekwa na Myahudi atewela mundu wa Sapanga. Kwa nagha mundu anguwesa ng'ogha kuwoneka yiwa kamundu wa Sapanga kwa kuyingiswa jandu. 29 Ila mundu wa Sapanga ni yula mwenikuyitikila kwa Mpumulo. Kuyingiswa nandu kwa chakaka kungugholwa na Mpumulo wa Sapanga kumoyu. Ng'ogha kwa kukola selia mundu hayu kangupokela ng'ogha sifa kwa wandu ila kuhuma kwa Sapanga mweni.