1 Kwa nagha, walongo ghangu, kwaikiva Sapanga katuwonela luhungu ninguwaluwa nesu kwa moyu wogha. Mlihumisi mwenga maweni muweli handa litambiku liwela likomu, na kughola nagha ndiwa njila gha chakaka gha kumuyupa Sapanga. 2 Mkotoho kughola handa waigholile wandu wa mlima wogha hau, ila mumlekeseli Sapanga awawesesi kughalambula vila mnguliwachila, ndiwa mtewesa kumanya na kughola mighalu aipalile Sapanga kuhuma kwa mwenga. 3 Kwaikiva gha umaha nipeghilwi na Sapanga ninguwalongela kila mmonga paghati gha mwenga, mkotoho kujiwachilila mwenga maweni yiwa ni wamaha kupiti vila ingupalwa na kuilola yiwa mwenga mwawakulu kupiti vila iwela. 4 Handa vila mngumanya mhigha ni mmonga ila uvile na vikongonu vitangala, na kila kikongonu kivile na lihengu lyaki. 5 Hilahila pamonga na yiwa twenga twangenju,ila kwa kukongana na Kilisito tuwela mhigha mmonga, na kila mmonga wa twenga ni kikongonu kya myaki. 6 Tuvile na hupo gha weka weka kila mmonga kwa vila tupeghwa kwa ulungwana wa Sapanga. Yula apeghilwi uwesa wa kuwalongela wandu ujumbi wa Sapanga na alonge hagha kwa ukwinila. 7 Mweni kupeghwa uwesa wa utumikila na atumikili kwa umaha. Mweni kupeghwa uwesa wa kuvula na avuli kwa umaha. 8 Yula mweni kupeghwa uwesa wa kutaya moyu waghangi, awakanisi. Na yula mweni kupeghwa uwesa wa kupegha, apeghi kwa moyu wogha. Na mweni kugholokela waghangi, awagholokeli kwa kuyangala. Na yula apeghilwi uwesa wa kuwonela luhungu waghangi, agholi nagha kwa luheku. 9 Muwapali wayenu kwa moyu mbuleti. Kangi mkotoho kughola sambi ila muweli mkighola ghamaha lipindi lyogha. 10 Mpalani mwenga kwa mwenga kwa uchakaka handa vila walongo, hilahila mtundamilani mwenga kwa mwenga. 11 Mkotoho kuwela wapweli, ila myangalai pamumtumikila Bambu. 12 Mhekeleli kwaikiva mngumyaghamila Sapanga, muweli na ufumilifu pamuhakilwa na myupi kwa kukwinila lipindi lyogha. 13 Muwatangi wandu wa Sapanga kwa kuwapegha kila wapungukilwa nachu, muwapokeli wahenja kwa utundamilu. 14 Muwayupili maheli wala wogha wahakata wa mwenga, muwayupili na mkotoho kuwalapila. 15 Mhekeleli pamonga na weni kuhekelela, mlile pamonga na weni kulila. 16 Myoghanilani paghati mwa mwenga, mkotoho kuwela na lukani lwa kujitutumula, ila mjumili kulikala kuunyenyekela. Mkotoho kujiwachila yiwa ni weni malangu nesu. 17 Mundu akikugholela uhakata ukotoho kumuhuyisila mundu uhakata. Uyangali kughola gha maha kuulongolo gha wandu wogha. 18 Kwa njila yoyosi hila myangalai kuwela na kulikala kwa kuponga na wandu wogha. 19 Walongo wa nenga wapalwa, ukotoho kumhuyisila mundu yula akugholilile uhakata, ila mlekeli Sapanga kulilaka lyaki amuhuyisili, kwaikiva ku Mayandiko gha Sapanga ingulonga , "Kuwahuyisila ni lihengu lya nenga, nenga nitewahuyisila, angulonga Bambu." 20 Badili ghaki, Mayandiko yangulonga, "Mhakata ghako paakiva na njala, mpeghi mulyo, paakiva na uyumililo, mpeghi kya kunywegha. Kwa kughola nagha ungumghola akolwi na honi." 21 Ukotoho kusindwa na uhakata, ila wenga uusinde uhakata kwa ulungwana.