1 Hinu kwahela ulamulo kwa wala weni kukongana na Kilisito Yesu. 2 Kwaikiva, selia gha Mpumulo yeni kunikonganisa kuukomu na Kilisito Yesu inikombola kuhuma kuselia gha sambi na kihu. 3 Sapanga atimilisili mighalu hila selia isindilwi kutimilisa, kwaikiva gha ulepelelu wa umundu. Sapanga akamyegha Mwana ghaki ili ayalamisi sambi, na kwa mhigha hula akayalamisa sambi. 4 Sapanga agholile nagha lukani tuwesi kulama handa selia ingupala, na ng'ogha kulongoswa kangi na makakala gha mihigha gha twenga yeni sambi, ila kwa makakala gha Mpumulo. 5 Kwaikiva wala wangulikala kwa kukovekelana na vila mhigha ungupala wangulongoswa na mhigha, ila wala wangulikala kwa kukovekela Mpumulo, wanguvika lukani lwau kumighalu yeni kupalwa na Mpumulo. 6 Kwaikiva wandu weni kulongoswa na mhigha wanguyeghelwa kihu, ila kuwela na lukani lweni kulongoswa na Mpumulo ni ukomu na kunguyegha kuwela kutali na ngondu. 7 Kwaikiva mundu mweni kulongoswa na mawachilo gha higha ni mhakata wa Sapanga, na kwa uchakaka kanguwesa kutundamila selia gha Sapanga, wala awesi ng'ogha kuyitikila selia gha Sapanga. 8 Wala wandu weni kuyitikila mapalo gha higha, wawesa ng'ogha kughola ghala yeni kumhekelesa Sapanga. 9 Ila mwenga, myitikila ng'ogha yala yeni kupalwa na higha, ila yala gha Mpumulo, ikiva Mpumulo wa Sapanga angulama mghati gha mwenga. Handa Sapanga angulikala mghati mwa mwenga hinu mwenga mkovekela ng'ogha mapalo gha higha. 10 Hinaa Kilisito angulikala mghati gha mwenga. Pamonga na yiwa mihigha gha mwenga inguhova kwaikiva gha sambi, hinu Mpumulo wa Sapanga anguwapegha ukomu kwaikiva Sapanga kawaghola mjumiliki kuulongolo ghaki. 11 Ikiva Mpumulo wa Sapanga yula amuhindulili Yesu kuhuma kukihu angulikala mghati mwa mwenga, hinu hayu amuhindulili Kilisito kuhuma kukihu ateipegha ukomu mihigha gha mwenga yeni kuhova, kwa njila gha Mpumulo ghaki mweni kulikala mghati gha mwenga. 12 Hinu hinaa, walongo wa nenga twenga tungupalwa ng'ogha kulikala kwa kukovekela mihigha vila ingupala tulikali. 13 Kwaikiva mkilikala kwa kukovekela vila mihigha ingupala, mtehova, ila handa pamtelikala kwa kulongoswa na Mpumulo mtetangwa na hayu Mpumulo kukoma matendu gha higha na hinu mtelama. 14 Kwaikiva wogha weni kulongoswa na Mpumulo wa Sapanga ni wana wa Sapanga. 15 Kwaikiva, Mpumulo mpeghilwi mwenga na Sapanga anguwaghola ng'ogha mwenga kuwela wahusutu na kuwaghola mutili ila hayu Mpumulo anguwaghola mwenga muweli wana wa Sapanga na kwa makakala gha Mpumulo hayu, twenga tunguwesa kumkema Sapanga, "Aba," ingumaanisa "Tati" 16 Hilahila na mweni Mpumulo wa Sapanga anguhighilisa mghati mwa mpumulo gha twenga yiwa twenga ni wana wa Sapanga. 17 Hinu, kwaikiva twenga ni wana wa Sapanga, tutepokela highili zyogha Sapanga awavikilili wana ghaki, pamonga na Kilisito, na tukihakilwa pamonga na mweni hilahila tuteyinulwa pamonga na mweni.

18 Ninguvalanga yiwa mahakili gha twenga gha hinaa yanguwesa ng'ogha kulandine na hila mighalu mikulu ivile Sapanga katuvikila twenga wandu ghaki. 19 Vindu vyogha vilumbilwi vingulindila kwa luhujulu nesu pala Sapanga atewalangila lipala wana ghaki. 20 Kila kyeni kulumbwa na Sapanga akilekili kiweli na ulepelelu hau, iwelili ng'ogha mapalo ghao vindu vyogha vilumbilwi vipalili ng'ogha vyeni viweli nagha, ila Sapanga alekesili hagha yahumili kwa lukani lwa litumaini hali. 21 lya kukombolwa ili vikotoho kuyalamiswa. Na kangi vindu vyogha vyeni kulumbwa vingulindila lichuwa lya kulikongana na wana wa Sapanga kuupekesu mkulu na kuleka kihu kikatuyalamisa. 22 Kwaikiva tungumanya yiwa hata hinaa vilumbi vyogha vingulila handa kwa utungu wa mdala mweni kukolwa na utungu lipindi lya kuiwopola. 23 Ng'ogha hagha vilumbi wekayao, ila hata twenga weni hayu Mpumulo wa Sapanga, mweni kuwela wa mtumbulo kuhupo zya Sapanga, na twenga hilahila tungung'ung'ulika mghati, kunu tukilindila tugholwi wana wa Sapanga, ingumaanisa kukombola na kughalambula mihigha gha twenga kuwela mihyonu. 24 Kwaikiva tungulokolwa kulitumaini hali. Ikiva mundu kalola kala kila akitumainila, hali liwesa ng'ogha kuwela litumaini kangi, kwaikiva ni ghani mweni kuwesa kuyendelela kutumainila kindu kila angukilola kumihu? 25 Ila patutumainila kupokela kindu kila tukilola ng'ogha, hinu tutekilindila kwa ufumilifu. 26 Na hilahila Mpumulo wa Sapanga angututanga kuulepelelo wa twenga, kwaikiva tumanya ng'ogha kuyupa vila ingupalwa. Ila Mpumulo wa Sapanga mweni angutuyupila kwa Sapanga kwa kung'ung'ulika kula tuwesa ng'ogha kukulongelela. 27 Namweni Sapanga mweni kuwesa kulola yala yavile mghati mwa mioyu gha twenga, angumanya mawachilo gha Mpumulo ghaki, kwaikiva Mpumulo anguwayupila wandu wa Sapanga kukovekelana na mapalo gha Sapanga. 28 Twenga tungumanya yiwa, kumighalu hyogha, Sapanga angughola lihengu pamonga na wala wogha weni kumpala, kukuwapatila ghala gha maha, ingumaanisa, wala wakemilwi kwa lukani lwaki. 29 Kwaikiva wala awahaghulili kuhuma mtumbulo wa kulumbwa kwa mlima wogha, ndiwa awamanyili ili wapati kulandine na Mwana ghaki, ili Mwana aweli mhacha mkulu paghati gha wana wogha wa Sapanga. 30 Hinu, wala wavile Sapanga katumbula kuwahaghula, akawakema, wala awakemili hilahila akawajumila kuwela wamaha, na wala awajumilile kuwela wamaha kuulongolo ghaki, hilahila akawayinula.

31 Hinu, tulonge niki kwa mighalu hai? Ikiva Sapanga kapamonga na twenga ni ghani kanguwesa kutungingama? 32 Kwaikiva Sapanga kamuwonela ng'onga luhungu mwana ghaki wa weka, ila amyeghili ili ahovi kwaikiva gha twenga wogha, hinu chakaka hilahila atetupatila vindu vighangi vya maheli. 33 Ni ghani atewasitaki wahaghulwa wa Sapanga? Ni Sapanga mweni baha ndiwa kalongela yiwa wawela ng'ogha na mahakata. 34 Ni ghani atewalamula? Kwa hela. Kwaikiva Kilisito Yesu ahindukili kwaikiva gha twenga, kangi angulama kuutundamilu kwa Sapanga akilongosa. Na mweni angutuyupila. 35 Ni ghani mweni kuwesa kutulekanisa na upalo wa Kilisito? Ghuli ni lung'ai au maghaso au mahakili au njala au kuwela ng'ogha na nguu au uhakata au kihu? 36 Handa Mayandiko gha Sapanga yalongile,

"Kwaikiva gha wenga tungulola wandu wanguyesa kutukoma kila lelo,

tuvalangilwa handa kondolu wa kuhinjwa." 37 Ila, kumighalu hai hyogha, tupokela usindi mkulunga kwa mtanga ghaki Kilisito yula mweni kutupala. 38 Kwaikiva ningumanya chakaka yiwa kwahela kindu kinguwesa kutulekanisa na upalo ghaki, ng'ogha kihu, au ukomu, au watumikila wa Sapanga wa kundumba au mahoka, au makakala ghangi gha Lihyukana, hata yeni kuhumila hinaa, hata yatehumila kuulongolo, hilahila weni uweso, 39 au mighalu yeni kuwela kumlimawogha wa kunani, au mighalu yenikuwela kumlimawogha gha pahi, na kwahela kiumbi chochose kitewesa kutulekanisa na upalo wa Sapanga uvile ku Kilisito Yesu Bambu wa twenga.