1 Ningulonga uchakaka, nikongana na Kilisito na nenga niwesa ng'ogha kulonga uhwangi. Mghati mwa nenga kukilongoswa na Mpumulo wa Sapanga kunguhighilisa yiwa ningulonga ng'ogha uhwangi. 2 Chakaka nenga nivili na mahakilo yayomoka ng'ogha kumoyu ghangu. 3 Kwaikiva gha wandu wa mlima ghangu ingaliwela ni mapalo ghangu nenga mweni ningalijumila kukolwa na mahakata handa kughola nagha, kungaliwaghola walongo ghangu hagha wamkwinili Kilisito. 4 Hagha ndiwa wandu wa Izilaili. Wavile Sapanga awahaghulile kuwela wana ghaki, akawakonganisa ukulu ghaki, akaghola na weno malaghano, akawapegha selia ghaki, ukwinila wa chakaka na kila akilongelile. 5 Weni ni wawelekwa wa watati wa twenga wakulu, na mweni Kilisito awelekili handa twenga wandu kuukolu hau. Ila mweni ni Sapanga na mweni kukwilikiwa machuwa hyogha bila mwihu. Hina. 6 Nilongile ng'ogha yiwa akilongilile Sapanga yiwa kisindwa. Kwaikiva ng'ogha kila mundu kuhuma ku Izilaili ni mundu wa Sapanga. 7 Hilahila ng'ogha wawelekwa wogha wa Ibulahimu ni wana wa Sapanga. Ila, handa iyandikilwi ku Mayandiko gha Sapanga, "Wawelekwa ghaki watehumila kwa Isaka." 8 Hai ingumanisa yiwa, ng'ogha wana walelilwi kihigha wawela wana wa Sapanga, ila ni wana wala wahika kupitila kila akilongilile Sapanga ndiwa watekemwa wana ghaki. 9 Kwaikiva malongelo yeni ni hagha, "Nitekuhuyila kangi lipindi handa hali, na Sala atelela mwana mlumi." 10 Ng'ogha hagha hela, ila hilahila Lebeka alelili na mbuyi wa twenga Isaka wana waivili mavila. 11 Ila, ili Sapanga awoneki yiwa anguhaghula vila angupala, hata paikawela pambila wala mavila wawelekwa ng'ogha au pambila wawesa kughalambula lya maha na lihakata. 12 Lebeka alongelilwi nagha, "Mwana mkulu atemtumikila mnung'una." Nagha mghalu hau uwonesa yiwa Sapanga angumkema mundu handa aipalili mweni angumkema mundu na ng'ogha kukovekela na matendu gha mundu. 13 Handa vila Mayandiko gha Sapanga yailongile, "Nimpalilie nesu Yakobu kupiti Esau."

14 Hinu tulongi kyani? Pangi Sapanga kangubhaghula wandu? Ng'ogha hata mayaghani! 15 Sapanga amlongelili Musa, "Nitemgholela ulungwana mundu nipala kumgholela ulungwana na nitemwonela luhungu mundu nimpalile kumwonela luhungu." 16 Kwa nagha mighalu hyogha inguhika kwa luhungu lwa Sapanga ila inguhika ng'ogha kwa mapalo gha mundu. 17 Kwaikiva Mayandiko gha Sapanga yailongile nagha kwa Falao nkosi wa Misili, "Nikugholili uweli nkosi ili nipati kulangiha uweso ghangu umanyiki, na lihina lyangu litangaswi kokosi kumlima wogha." 18 Hinu hinaa ni lipala, yiwa Sapanga angumuwonela luhungu mundu yula angupala kumuwonela luhungu na paakapala kumghola aweli mweni kinyengu Sapanga angughola nagha.

19 Pangi utenikonya, "Ikiva mighalu ivile nagha, Sapanga anguwesaghuli kumlalamikila mundu? Ghani mweni kuwesa kuyangingama mapalo ghaki?" 20 Ila, wenga mundu, kwa ghani hata uyesi kumkonya Sapanga? Ghuli, kimbundi kinguwesa kumkonya mghola vimbundi, "Kwa kyani wenga unighola handa nagha?" 21 Mghola vimbundi anguwesa kughola vila angupala mweni kulutupi. Akauhumisa kulilundila lya lutupi anguwesa kughola vimbundi viivili kwa lipindi limonga na kimbundi kimonga kya kuvikila lua na kighangi kya kuvikila ndaka. 22 Nagha wamonga gha wandu ni handa vimbundi viyandalwa kuyalamiswa. Hinu Sapanga kawawonesa lilaka lyaki. Sapanga kahighilisa uwesa ghaki. Hinu, awelili na ufumilifu nesu, akiwafumilila wala wavile kawavika kulukani lwa kuwahakili, wavile wapalilwi kuyalamiswa. 23 Hilahila apalili kulangiha lipala utangala wa ukulu ghaki kwa twenga tuvile ndiwa lukani lwaki kutuwonela luhungu, twenga tuwela katuyandala kala kupokela ukulu ghaki. 24 Kwaikiva twenga ndiwa wala awakemili, ng'ogha kuhuma kwa Wayahudi weka ila hilahila kuhuma kwa wandu wavili ng'ogha Wayahudi. 25 Handa Sapanga vila ailongile ku kihitabu kya Hosea,

"Nitewakema ‘Wandu ghangu’

Wala wavile ng'ogha wandu ghangu,

na nenga nitemkema ‘mpalo ghangu’

yula avile ng'ogha mpalo ghangu nitelonga mundu nimpalile," 26 kangi, Itewela nesu nesu mahala pala pawalongelilwi, "Mwenga ng'ogha wandu ghangu." Weni watekemwa "Wana wa Sapanga avile mkomu." 27 Hilahila mlota wa Sapanga Isaya alongili kwa lilowi likulunga kwa Waizilaili, "Pamonga na yiwa wana wa Izilaili ni watangala handa mhanga wa muufuku, ni mayaghani hela ndiwa watelokolwa. 28 Kwaikiva, Bambu Sapanga atetimilisa ulamula ghaki kwa kuloposela." 29 Pambila gha hagha mlota wa Sapanga Isaya ailongile,

"Handa Bambu mweni Makakala hyogha

angalitulekela ng'ogha amonga wa wana wa Izilaili,

tungaliwela kala tunyanywa lyoto handa Sodoma,

tungaliwela kala tunyanywa lyoto handa Gomola."

30 Kwa nagha tulonge kyani hinu? Yiwa wandu wavile ng'ogha Wayahudi wavile wahakula ng'ogha wajumilwi na Sapanga, ila wakajumilwa kuwela wamaha kwanjila gha ukwinila, 31 Ila Izilaili, weni wayangalili kuhaka kujumilwa kwa njila gha selia, ila wapata ng'ogha kujumilwa kwa selia. 32 Kwa kyani? Kwaikiva wahakulili ng'ogha kwa kumkwinila Kilisito ila kwa kupitila matendu ghao. Wakalikwala kulila "Liganga likulu lyeni kuwaghola wandu waguwi." 33 Handa yailonga Mayandiko gha Sapanga,

"Uloli ninguvika ku Sayuni liganga litewaghola wandu walikwali kwaikiva gha kuguwisa wandu,

ila yula mweni kukwinila atekolwa ng'ogha na honi machuwa hyogha bila mwihu."