1 Kwa nagha, kwaikiva tujumilwa kala kwa ukwinila, tungulikala kwa kuponga na Sapanga kupitila Bambu wa twenga Yesu Kilisito. 2 Kwa njila gha kumkwinila Yesu, Sapanga katupatila umaha ghaki hata hinaa tunguyendelela kupokela umaha hau, tunguhekelela nesu kwaikiva tungutumainila yiwa tutelikala na Sapanga kundumba. 3 Hina, ng'ogha hai hela, hata patuwela kulung'ai tukimanya yiwa lung'ai lungututanga kuwela wafumilifu, 4 na ufumilifu ndiwa wenikutuyeghela kukotoho kutila na kukotoho kutila kungutuyeghela litumaini. 5 Litumaini hali liwesa ng'ogha kutuvika mhoni, kwaikiva Sapanga katuyitila kala kumioyu gha twenga upalo ghaki kwa njila gha Mpumulo ghaki yula atupeghili. 6 Kwaikiva hata patuwelili tuvile ng'ogha na mtanga wowosi, lipindi palihika, Kilisito ahovili kwaikiva gha twenga tuvile na sambi. 7 Uchakaka ni yiwa yuyughu ng'ogha mundu kuhova ili kumtetela mundu mweni kujumilika kuulongolo gha Sapanga, ila mundu anguwesa kuyesa kuhova kwaikiva gha mundu maha. 8 Ila Sapanga atulangilile yiwa angutupala nesu, kwaikiva lipindi patuwelili twambila weni sambi, Kilisito ahovili kwaikiva gha twenga. 9 Hinu, kwaikiva hinaa tungujumilika kuulongolo gha Sapanga kwa mwahi ghaki, ni chakaka nesu tutelokolwa kuhuma kulilaka lya Sapanga. 10 Lipindi patuwelili wahakata wa Sapanga akatughola tuweli maghanja na mweni kwa kupitila kihu kya Mwana ghaki, na handa tugholwa kuwela waghanja ghaki hinu tungumanya atetulokola Kilisito atetulokola kwaikiva mweni ni mkomu machuwa hyogha. 11 Ila ng'ogha hagha hela, hilahila tunguhekelela kwa kila Sapanga kakighola kupitila Bambu Yesu Kilisito, pala pakatughola tujumilwe na Sapanga.

12 Kwa nagha handa vila sambi iyingilili kumlimawogha kupitila kwa mundu mmonga na sambi hagha ikalandala yegha kihu. Kwaikiva wandu wogha waghola sambi. 13 Pambila gha selia gha Sapanga ampeghili Musa, sambi iwelili mumlimawogha, Sapanga ailongile ng'ogha yiwa wandu wawela na sambi. 14 Hata nagha, kuhuma lipindi lya Adamu mbaka lipindi lya Musa, kihu kikawela nkosi ghao wandu wogha pamonga na hata wala waghola ng'ogha sambi handa hila gha Adamu gha kumyitikila ng'ogha Sapanga, Adamu awelili mlandanu wa yula atehika. 15 Sambi gha Adamu ilingulandine ng'ogha na ulungwana wa Sapanga. Adamu ni mundu mmonga mwenikughola wandu wogha wahovi kukovekelana na sambi ghaki. 16 Kangi vila Sapanga anguwalekesela wandu kwa ulungwana ghaki kungulandine ng'ogha na ghala yenikuyeghwa na sambi gha Adamu. Sambi hila imonga gha Adamu paigholokile Sapanga akawanyokola wandu wogha. Ila hinaa sambi zitangala zigholeka ila Sapanga kambila kanguwajumila wandu kwa njila gha ulungwana ghaki. 17 Chakaka, kwa sambi gha mundu mmonga, akayambusa kihu kutumbula unkosi, ni lipala nesu yiwa kila akigholile hayu Kilisito ni maha nesu, wandu wogha wenikupokela ulungwana hau wenikuwela ni hupo gha kujumilwa kuulongolo ghaki watewela wankosi kupitila Yesu Kilisito. 18 Kwa nagha, ulamula wa Sapanga uwahikilile wandu wogha kwaikiva gha uhakata mmonga augholile Adamu. Ila tendu limonga aligholile Kilisito liwavika wandu kuwela pekesu. Hinu Sapanga anguwajumila wandu kwa njila gha tendu limonga aligholile Kilisito. Na kwa nagha wandu wangupokela ukomu wa machuwa hyogha bila mwihu. 19 Na hilahila wandu wogha wawonekanili yiwa wawela na sambi kwa hayu mundu mmonga kukotoho kumyitikila Sapanga, hilahila kwa Yesu kamyitikila Sapanga pala ahweghili kulipingika akaghola wandu watangala kujumilwa. 20 Ila selia iyingilili ili wandu wawesi kulola vila wagholile sambi. Ila wandu pawagholile sambi nesu Sapanga akayendelela kuwela mmaha kwa wandu kwa njila zitangala nesu. 21 Handa vila sambi ilandalile na kuyegha kihu, hilahila umaha wa Sapanga uyendelela kuwela mtangala na kuyegha ukomu wa machuwa hyogha bila mwihu, kwa kupitila Yesu Kilisito Bambu wa twenga.