1 Nuair a bheir an Tighearna do Dhia thu a-steach don fhearann a-chum a bheil thu a’ dol ga shealbhachadh, agus a thilgeas e a-mach romhad mòran chinneach, na Hitich, agus na Girgasaich, agus na h-Amoraich, agus na Canàanaich, agus na Peridsich, agus na Hibhich, agus na h-Iebusaich, seachd cinnich as mò agus as cumhachdaiche na thusa;

2 Agus nuair a bheir an Tighearna do Dhia iad thairis ad làthair, buailidh tu iad, agus cuiridh tu gu tur as dhaibh; cha dèan thu coicheangal sam bith riu, cha mhò a nochdas tu tròcair dhaibh:

3 Cha mhò a nì thu cleamhnas riu; do nighean cha toir thu da mhac-san, cha mhò a ghabhas tu a nighean-san dod mhac-sa.

4 Oir tionndaidhidh iad do mhac o mise a leantainn, a-chum gun dèan iad seirbhis do dhiathan eile: mar sin lasaidh fearg an Tighearna nur n-aghaidh, agus sgriosaidh e thu gu h-obann.

5 Ach mar seo buinidh sibh riu: sgriosaidh sibh an altairean, agus brisidh sibh an dealbhan, agus gearraidh sibh sìos an doireachan, agus loisgidh sibh an coslais shnaidhte le teine.

6 Oir is sluagh naomh don Tighearna do Dhia thusa: thagh an Tighearna do Dhia thu gu bhith ad shluagh àraidh dha fhèin, os cionn gach sluaigh a tha air aghaidh na talmhainn.

7 Cha do ghràdhaich an Tighearna sibh, cha mhò a thagh e sibh, a chionn gu robh sibh na bu lìonmhoire na sluagh sam bith eile; (oir is sibh a bu teirce de gach uile shluagh;)

8 Ach a chionn gun do ghràdhaich an Tighearna sibh, agus a-chum gun gleidheadh e na mionnan a mhionnaich e dur n-athraichean, thug an Tighearna a-mach sibh le làimh chumhachdaich, agus shaor e thu à taigh nan tràillean, à làimh Phàraoh righ na h-Eiphit.

9 Biodh fhios agad uime sin, an Tighearna do Dhia gur esan Dia, an Dia fìrinneach, a chumas coicheangal agus tròcair riùsan a ghràdhaicheas e, agus a ghleidheas a àitheantan, gu mìle ginealach;

10 Agus a dhìolas orrasan a dh’fhuathaicheas e, rin aodann, a-chum an sgrios: cha dèan e moille da thaobh-san aig a bheil fuath dha; dìolaidh e air ra aodann.

11 Gleidhidh tu uime sin na h-àitheantan, agus na reachdan, agus na breitheanais, a tha mi ag àithneadh dhut an-diugh a dhèanamh.

12 Uime sin, ma dh’èisdeas sibh ris na breitheanais sin, agus ma choimheadas agus ma nì sibh iad, cumaidh an Tighearna do Dhia riutsa an coicheangal agus an tròcair a mhionnaich e dod athraichean.

13 Agus gràdhaichidh e thu, agus beannaichidh e thu, agus nì e lìonmhor thu: mar an ceudna beannaichidh e toradh do bhronn, agus toradh d’fhearainn, d’arbhar, agus d’fhìon, agus d’ola, fàs do chruidh, agus treudan do chaorach, anns an fhearann a mhionnaich e dod athraichean a thabhairt dhut.

14 Bidh tu beannaichte os cionn gach sluaigh; cha bhi fireann no boireann neo-thorrach nur measg, no am measg ur sprèidhe.

15 Agus bheir an Tighearna uat gach eucail, agus cha chuir e ort aon air bith de dhroch ghalaran na h-Eiphit, as aithne dhut, ach cuiridh e iad orrasan uile leis am fuathach thu.

16 Agus sgriosaidh tu an sluagh sin uile a bheir an Tighearna do Dhia thairis dhut; cha ghabh do shùil truas riu: cha mhò a nì thu seirbhis dan diathan, oir bidh sin na ribe dhut.

17 Ma their thu ad chridhe, Is mò na cinnich sin na mise, cionnas as urrainn mise an cur à seilbh?

18 Cha bhi eagal ort romhpa; ach cuimhnichidh tu gu math ciod a rinn an Tighearna do Dhia ri Phàraoh, agus ris na h-Eiphitich uile;

19 Na deuchainnean mòra a chunnaic do shùilean, agus na comharraidhean, agus na h-iongantasan, agus an làmh chumhachdach, agus an gàirdean sìnte a-mach, leis an tug an Tighearna do Dhia a-mach thu: mar sin nì an Tighearna do Dhia ris an t-sluagh uile ro a bheil eagal ort.

20 Os bàrr, cuiridh an Tighearna do Dhia a’ chonnspeach nam measg, gus am bi iadsan a dh’fhàgar, agus a dh’fhalaicheas iad fhèin od ghnùis, air an sgrios.

21 Cha bhi uamhann ort romhpa; oir tha an Tighearna do Dhia nur measg, Dia mòr agus uamhasach.

22 Agus cuiridh an Tighearna do Dhia a-mach na cinnich sin romhad a lìon beagan is beagan: chan fhaod thu an sgrios a dh’aon bheum, air eagal gum fàs fiadh-bheathaichean na machrach lìonmhor ort.

23 Ach bheir an Tighearna do Dhia iad thairis dhut, agus sgriosaidh e iad le sgrios mòr, gus an cuirear as dhaibh.

24 Agus bheir e an rìghrean thairis dod làimh, agus sgriosaidh tu an ainm o bhith fo nèamh: cha seas duine sam bith ad aghaidh, gus an cuir thu as dhaibh.

25 Dealbhan snaidhte an diathan loisgidh sibh le teine: cha mhiannaich thu an t-airgead no an t-òr a tha orra, cha mhò a ghabhas tu e dhut fhèin, air eagal gun ribear thu leis: oir is gràinealachd e don Tighearna do Dhia.

26 Cha mhò a bheir thu gràinealachd dod thaigh, air eagal gum bi thu ad nì mallaichte cosmhail ris: ach bheir thu fuath iomlan dha, agus gabhaidh tu gràin dheth gu tur, oir is nì mallaichte e.