Jonas 3

Junusa wara Ninibe

1 Allabatala kumara Junusa yɛ a siɲa filana rɔ. 2 A ka a fɔ ko: «I ye i wuli ka wa Ninibe so ba kɔndɔ. N wa mɛn fɔ i yɛ, i ye wo lase Ninibekailu ma.» 3 Wo rɔ, Junusa wulira ka wa Ninibe, ikomin Allabatala ka a fɔ a yɛ ɲa mɛn ma. Ninibe tɛrɛ ye so ba le ri, mɔɔ ri tele sawa taama kɛ mɛn kɔndɔ. 4 Junusa seni Ninibe, a donda so kɔndɔ ka tele kelen kɛ taamanna, ka ban ka ye mɔɔilu kawandi ko: «Yani tele binaanin (40), gbalo ba ri kɛ Ninibe.» 5 Alla ka mɛn fɔ Ninibekailu yɛ ka fara Junusa la, ii lara wo la. Ii ka a fɔ ko bɛɛ ye sun don ka landa faanin bila ii kan na, denilu ni mɔɔbailu bɛɛ. 6 Nba, wo kibaro sera Ninibe mansa ma tuma mɛn na, a ka i wuli a la mansaya siifen dɔ ka a la mansaya faanin bɔ a kan na. A ka landa faanin bila a kan na ka i sii buurigbɛ rɔ. 7 Wo kɔ, a ka mɔɔilu lɔ kelalasela Ninibekailu ma ko: «Mansacɛ ni a la ɲɛmɔɔilu ka a fɔ ko tɔn da sii mɔɔilu ni kolofenilu bɛɛ ma, nisiilu ni saailu ni bailu kɔnin. Ii si kana dɔɔnnin kɛ. Ii si kana ii min. 8 Mɔɔilu bɛɛ ye landa faanin bila ii kan na, ka do sidi kolofenilu bɛɛ kan na. Mɔɔ kelen kelenna bɛɛ ye Alla matara a fanka bɛɛ la. Bɛɛ ye a ban a sɔn juu rɔ, ka kojuu kɛ boloka. 9 Baa, yon ka a lɔn? Tumado ko Alla ri a la bolorabɛn yɛlɛman an kanma ka a ban a la duɲa ba rɔ, kosa an ti nala faala.»

10 Alla ka a yen mɛn kɛ ko Ninibekailu ra nimisa ka ii la kojuuilu boloka, a ka a miriya yɛlɛman. A ka masilannikan mɛn fɔ ii yɛ ko a kɛtɔ gbalo ba lala ii kan, a ka wo to ye.