João 12

Isa donda Jerusalɛmu

12 Wo duu sa gbɛ, jama siyaman ba mɛn nara Jerusalɛmu sali diya, woilu ka a mɛn ko Isa natɔ Jerusalɛmu. 13 Ii ka tamaro bolon ta ka wa a labɛn, ka ii sɛwa kan nabɔ ko:

«Alla tando!»

«Duwawu ye a yɛ,

Mɛn ye nala Maari tɔɔ rɔ ten!»

«Duwawu ye Isirayɛli Mansa Ba yɛ!»

14 Isa ka sofalinin bulan do yen ka i sii wo kan ikomin a sɛbɛni ɲa mɛn ma:

15 «Ai kana silan, Siyonkailu;

A ragbɛ, ai la mansa ye nala,

siini falini bulan kan.»

16 Waati wo la a la karandenilu tɛrɛ ma a ɲayen fɔlɔ ko mɛn ye taminna, kɔni Isa ka a la gbiliya labɔ tuma mɛn na, ii ka lɔn ko wo bɛɛ sɛbɛnni Alla la kitabu kɔndɔ, a ni mɔɔilu tɛrɛ ka wo bɛɛ kɛ Isa yɛ.

17 Nba, jama ba tɛrɛ ye Isa fɛ wo lon, a ka Lasari kili ka bɔ kaburu kɔndɔ lon mɛn ko a ye wuli ka bɔ saya rɔ tuma mɛn na, woilu kɛra a sereya ri. 18 Wo rɔ jama ba nara a labɛn diya, ka a masɔrɔn ii ra a mɛn ko a ra kabannako wo kɛ. 19 Wo rɔ Farisiilu tɛrɛ ye a fɔla i ɲɔɔn tɛma ko: «Ai ma yen ai ti se foyi kɛla la. A ragbɛ! Dunuɲa bɛɛ ye bilala a kɔfɛ!»