1 Isa ka a fɔ ko: «N da wo bɛɛ ɲafɔ ai yɛ sa ai ti nala lafilila. 2 Ii ri aile gbɛn salibon kɔndɔ, wo fanan waati natɔ sela mɔɔ mɛn ye ai faa ko rɔ, wo tii mirini ko a ye Alla le batola wo ɲa ma. 3 Ii ri woilu kɛ ka a masɔrɔn ii ma n Fa lɔn, wala nde jɛrɛ. 4 N ye wo fɔla ai yɛ, sa woilu wa se, ai hankili ri bila a rɔ ko n ka a fɔ le ai yɛ.

«N ma wo fɔ ai yɛ a damirala, ka a masɔrɔn n tɛrɛ ye ai tɔrɔfɛ. 5 Sisɛn, n watɔla le wo tɔrɔfɛ mɛn ka n kelaya, kɔni ai kelen ma n maɲininka ko: ‹I watɔ min?› 6 Ai jusu makasinin kojuuya ko ɲinilu kosɔn, n nɔ mɛnilu fɔla ai yɛ. 7 Kɔni n ye tuɲa fɔla le ai yɛ ko: ai la hɛrɛ le a rɔ ni n wara, baa na n ma wa, Lalilila ti nala ai ma. Kɔni ni n wara n di a lawa ai ma. 8 Wo wa na, a ri julumun ko ni telenbaya ko ni kiti tɛɛ ko gbɛ dunuɲa yɛ, ka a yiraka ii la ko ii filini woilu bɛɛ rɔ. 9 Ii filini julumun ko rɔ ka a masɔrɔn ii ma lemɛniya nde ma. 10 Ii filini telenbaya ko rɔ, ka a masɔrɔn n watɔ n Fa ma, a ni ai ti n yenna butun. 11 Ii filini kiti tɛɛ ko rɔ, ka a masɔrɔn, dunuɲa ɲin kuntii ra jalaki.

12 «Kuma siyaman de n bolo ka a fɔ ai yɛ, kɔni ai ti se wo kɔrɔ sisɛn. 13 Nii Sɛnimanna Tuɲa wa na tuma mɛn na wo ye ai taala tuɲa le rɔ, baa a ti nala kumala a jɛrɛ yɛ ɲa wo ma, kɔni a wa fen fen mɛn a ri wo fɔ. Ko mɛn ye nala a ri wo ɲafɔ ai yɛ. 14 A ri n na gbiliya yiraka, baa mɛn tɛrɛ ye nde rɔ a ri wo ta ka a lase ai ma. 15 Fen fen mɛn ye n Fa bolo a bɛɛ ye n ta le ri. Wo le kosɔn n da a fɔ ai yɛ ko mɛn tɛrɛ ye n dɔ Nii Sɛniman di wo ta ka a fɔ ai yɛ. 16 Sani waati ai ti n yenna butun, waati wo wa tamin a ti mɛn bakɛ ai ri n yen fanan.»

17 A la karandenilu tɛma ii tɛrɛ ye i ɲɔɔn maɲininkala ko: «A ye nfen fɔ ko rɔ an yɛ ko: ‹Sani waati ai ti n yenna butun, waati wo wa tamin a ti mɛn bakɛ ai ri n yen fanan›? A ni fanan ‹ka a masɔrɔn n watɔ n Fa ma›?» 18 Ii ye a fɔla ikɔ tuunni ko: «A ye nfen fɔla ko: ‹Waati dɔndɔ›? An ma a lɔn a ye mɛn fɔla.»

19 Isa ka a lɔn ko ii ye a fɛ ka a maɲininka, a ka a fɔ ii yɛ ko: «Ai ye ai ɲɔɔn maɲininkala ko n ye nfen fɔla kuma ɲin dɔ ko: ‹Sani waati ai ti n yenna butun, waati wo wa tamin a ti mɛn bakɛ ai ri n yen fanan›? 20 N ye tuɲa le fɔla ai yɛ ko: ai ri kasi ni ka kule, ka a tɛrɛn dunuɲa mɔɔilu ri sɛwa bakɛ ka ɲaalen. Ai ri to jusukasi rɔ, kɔni ai la jusukasi wo ri yɛlɛman ka a kɛ sɛwa ba ri, fo ka ɲaalen. 21 Ni muso kɛra tin ma a jusukasini, ka a masɔrɔn dimin ye a kan, kɔni a wa den sɔrɔn a ri sɛwa ka ɲina a la tɔrɔyaba wo kɔ, baa adamaden sɔrɔnda dunuɲa rɔ. 22 Wo ɲa kelen de ma, ai mɛn fanan jusukasini sisɛn, kɔni n di ai yen kokura, ai jusu ri sɛwa. Sawani mɛn ye wo ri, mɔɔ si ti se wo bɔla ai bolo. 23 Wo lon wo rɔ ai ti n maɲininkala foyi ma. N ye tuɲa le fɔla ai yɛ ko: ai wa foyi maɲininka n tɔɔ rɔ n Fa yɛ, a ri wo bɛɛ di ai ma. 24 Haan bi ai ma foyi maɲininka n tɔɔ rɔ. Ai ye a maɲininka, ai ri a sɔrɔn, sani ai la sɛwa ye dafa.

25 «N ka ɲin bɛɛ fɔ ai yɛ kuma kɔrɔlama le rɔ. Waati natɔ sela n ti sɔn kuma kɔrɔlama si fɔla ai yɛ butun, kɔni n di n Fa la ko bɛɛ fɔ ai yɛ gbɛ rɔ. 26 Wo lon ai ri maɲininka n tɔɔ la, n ma a fɔ ko n di n Fa madiya ai ta fan dɔ. 27 Hen! Ai duman n Fa jɛrɛ yɛ ka a masɔrɔn n diyara ai yɛ, a ni ai lara a la ko n bɔni Alla le rɔ. 28 N bɔni n Fa le rɔ ka na dunuɲa rɔ, sisɛn n bɔtɔ dunuɲa rɔ ka wa n Fa ma.»

29 A la karandenilu ka a fɔ a yɛ ko: «A mafɛnɛ, sisɛn i ye kumala gbɛ rɔ, i ti foyi fɔla kuma kɔrɔlama rɔ. 30 Sisɛn an ka a lɔn ko i ka ko bɛɛ lɔn a ni i mako sa a la mɔɔ ni i maɲininka fosi ma. Wo le rɔ an ka lemɛniya a la ko i bɔni Alla le rɔ.»

31 Isa ka a jabi: «Ai ye lemɛniyala sisɛn wa? 32 Waati natɔ sela, a don gbun da se, ai ri jɛnsɛn ai ɲɔɔn na bɛɛ ri wa a wara. Ai ri n kelen to. Kɔni n kelen tɛ, baa n Fa ye n tɔrɔfɛ. 33 N da ko ɲinilu fɔ ai yɛ, sa ai ri jususuma sɔrɔn n na ko rɔ. Ai ri tɔrɔya sɔrɔn dunuɲa rɔ, kɔni ai ye ai sɛɛbɛ don, baa nde ra se dunuɲa rɔ.»