1 Nba, Farisi cɛɛ do tɛrɛ ye ye, a tɔɔ ko Nikodɛmu. Judiyailu la ɲɛmɔɔ do le tɛrɛ a ri. 2 A nara ka Isa yen su tun da ko: a ka a fɔ ko: «Rabi, an ka a lɔn ko Alla le ka i kelaya an ma, ka na an karan. Mɔɔ si ti se wo kabannako tɔɔmasereilu ɲɔɔn kɛla ni Alla tɛ a fɛ.» 3 Isa ka a jabi: «N ye tuɲa le fɔla i yɛ: na mɔɔ mɛn ma sɔrɔn kokura, wo tii ti se Alla la mansaya yenna.» 4 Nikodɛmu ka a fɔ Isa yɛ ko: «Mɔɔ ri se sɔrɔnna cɛmɔɔbaya rɔ ka a kɔsɛ a na kɔnɔ rɔ ka sɔrɔn siɲa fila wa?» 5 Isa ka a jabi: «N ye tuɲa le fɔla i yɛ: mɔɔ si ti se donna Alla la mansaya rɔ na a ma sɔrɔn ji rɔ a ni nii* rɔ. 6 Mɛn bɔni faribanku rɔ wo ye faribanku le ri, mɛn bɔni Nii Sɛniman dɔ, wo ye nii le ri. 7 I kana kabannakoya baa n da fɔ ko: ‹mɔɔ ka kan ka sɔrɔn kokura.› 8 Fɔɲɔ ri a fili ikomin a duman yɛ ɲa mɛn. I ri a mankan mɛn, kɔni i ma a lɔn a ye bɔla fan si, i ma a lɔn a wala fan si. A ye wo ɲa le mɔɔilu fanan yɛ mɛn bɛɛ sɔrɔnni Nii Sɛniman dɔ.»

9 Awa Nikodɛmu ka Isa maɲininka ko: «Ko wo ye sela kɛla di?» 10 Isa ka a jabi: «I ye karanmɔɔ le ri Isirayɛlika yɛ, kɔni i ma wo lɔn wa? 11 N ye tuɲa le fɔla i yɛ: an ka mɛn lɔn, an ye wo le fɔla. An da mɛn yen, an ye wo le sereya bɔla. Kɔni ai ti sɔn an na sereya ma. 12 Ni n ka dunuɲa koilu fɔ ai yɛ, kɔni ai ma la woilu la. A ye di wo rɔ, ni n ka sankolo koilu fɔ ai yɛ, ai ri la woilu la di? 13 Mɔɔ si ma don harijeene rɔ fɔɔ Mɔɔ Dencɛ, mɛn jiini ka bɔ harijeene rɔ. 14 Nba, waati taminnin, Musa ka duuma sa munuɲa layɛlɛ jiri la wula kɔndɔ ɲa mɛn ma, Mɔɔ Dencɛ fanan ka kan ka layɛlɛ wo ɲa le ma, 15 kosa mɔɔ si wa lemɛniya a ma, wo ri ɲenemaya banbali sɔrɔn.»

16 Baa, Alla ka dunuɲa mɔɔilu kanin kosɛbɛ, wo rɔ, a ka a Dencɛ kelen pe di, kosa mɔɔ si wa lemɛniya a ma wo kana halaki, kɔni a ri ɲenemaya banbali sɔrɔn. 17 Wo rɔ Alla ma a Dencɛ lana ka kiti be dunuɲa kan, kɔni ka a kisi a la baraka rɔ.

18 «Mɔɔ si wa lemɛniya Dencɛ ma, wo ti jalakila, kɔni mɔɔ mɛn ma lemɛniya wo tun da jalaki, baa a ma lemɛniya Alla Dencɛ kelen tɔɔ ma. 19 Kɛnɛya ra na dunuɲa rɔ, kɔni dibi duman adamaden yɛ ka tamin kɛnɛya la, ka a masɔrɔn ii kɛwaliilu juuman. Kiti beni ii kan mɛn kosɔn, wo le wo ri. 20 Baa mɔɔ si ye kojuu kɛla, kɛnɛ wo ma di a yɛ fewu. A ti nala sɔnna donna kɛnɛ wo rɔ, baa a tɛ a fɛ a kɛwaliilu ye bila gbɛ rɔ. 21 Kɔni mɛn ye taamanna ka bɛn Alla la tuɲa ma, wo le ye nala kɛnɛya ma, kosa mɔɔilu ri a yen gbɛ rɔ ko wo tii ra ko mɛn kɛ, a ra wo kɛ Alla la dɛmɛnnin de rɔ.»

22 Waati wo taminnin kɔ rɔ, Isa ni a la karanden wara Jude mara rɔ. Ii ka waati dɔndɔ kɛ ye ka mɔɔilu sun ji rɔ. 23 Wo ka a tɛrɛn Yaya ye mɔɔilu sunna ji rɔ Enɔn mɛn ye Salimu tɔrɔfɛ. Yɔrɔ wo ye jiman diya ba le ri. Mɔɔilu nara a ma ka ii sun ji rɔ. 24 Wo waati rɔ, Yaya tɛrɛ ma bila kaso la fɔlɔ.

25 Awa, lon do rɔ, sɔsɔli do wulira Yaya la karanden doilu ni Judiya do tɛma. Sɔsɔli wo tɛrɛ ye dina dahali namun le kan. 26 Ii nara Yaya tɛrɛn ka a fɔ ko: «Rabi, i kɛra mɛn na sereya ri, Juridɛn Ba kɔma, a ye mɔɔilu sunna ji rɔ. Sisɛn bɛɛ ra i wa a kɔfɛ.» 27 Yaya ka ii jabi: «Mɔɔ si ti se fen sɔrɔnna a jɛrɛ yɛ ni Alla ma a di mɛn ma. 28 Aile mɛn ye yan, ai ri kɛ n na sereya ri ko n ka kuma wo fɔ ko: ‹Mɔɔ Ɲenematɔmɔnin tɛ n di›, kɔni ‹n ye mɔɔ le ri mɛn nani a ɲɛfɛ.› 29 Kɔɲɔ kura ye mɛn bolo wo le kɔɲɔcɛ ri, kɔni cɛɛ duɲɔɔ mɛn lɔnin kɔma, a tolo ye a kan na. A wa furucɛ kan mɛn tuma mɛn na a ri sɛwa bakɛ. Wo rɔ, n sɛwani ka ɲaalen ka dafa. 30 Wo rɔ Isa la ko ka kan ka bonya ka tamin n na ko la, n na ko ka kan ka a majii bakɛ.

31 «Mɛn nani ka bɔ sankolo rɔ wo ye bɛɛ kun na. Mɛn nani ka bɔ dunuɲa rɔ wo ye dunuɲa ta le ri. Wo ye dunuɲa koilu le fɔla, kɔni mɛn nani ka bɔ sankolo rɔ wo ye fen bɛɛ kun na. 32 A ka mɛn yen a ni a ka mɛn mɛn a ye wo sereya le bɔla, kɔni mɔɔ tɛ sɔn a la sereya rɔ. 33 Mɛn ka i sɔn a la sereya ma wo ye a yirakala ko Alla ye tuɲa le fɔla. 34 Baa Alla ka mɛn nana wo ye Alla la kuma le fɔla, baa Alla ye Nii Sɛniman dila a ma fewu. 35 Fa Alla ye a Dencɛ kaninna. A ka fen bɛɛ don Dencɛ bolo. 36 Mɛn wa lemɛniya Dencɛ ma wo ri ɲenemaya banbali sɔrɔn. Mɛn wa a ban lemɛniyala Dencɛ ma wo ti nala ɲenemaya banbali sɔrɔnna, kɔni Alla la mɔne ri to a ma fewu.»