Josuwe 15

Juda kabila ka yɔrɔ mɛn sɔrɔn

1 Juda kabila ka yɔrɔ mɛn sɔrɔn kalabe rɔ, wo tɛrɛ ye wala tele kankan bolokinin dɔ ka se fɔɔ Edɔmu jamana dan ma, ni a ye Sini kiɲɛ fufu kɔndɔ tele kankan bolokinin dɔ fan fɛ bakɛ. 2 Tele kankan bolokinin dɔ fan fɛ, yɔrɔ wo dan ye bɔla Dalaba Kɔɔjilama tele kankan bolokinin dɔ bolo fara la. 3 A ye wala Kɔsɔn Koyinkɛ tele kankan bolokinin dɔ, ka wa se Sini. A ye bɔla ye ka wa Kadɛsi-Baraneya so tele kankan bolokinin dɔ, ka bɔ ye ka wa Hɛsirɔn so la. A ye bɔla ye ka wa Adari so la, ka bɔ ye ka wa Karika so la. 4 A ye bɔla ye ka wa Asimɔn so la, ka bɔ ye ka wa se Misiran Kɔ ma. Kɔ wo ye dan de ri ka wa se fɔɔ Kɔɔjiba ma. Wo kɛra Juda kabila la duu dan de ri tele kankan bolokinin dɔ fan fɛ.

5 Telebɔ rɔ fan fɛ, a dan ye Dalaba Kɔɔjilama le ri, ka wa se fɔɔ Juridɛn Ba bila diya ma Dalaba Kɔɔjilama rɔ.

Tele kankan bolomaran dɔ fan fɛ, a dan ye bɔla Juridɛn Ba bila diya ye 6 ka wa se fɔɔ Bɛti-Hɔkila so ma, ka bɔ ye ka wa Bɛti-Araba so tele kankan bolomaran dɔ, ka wa se fɔɔ Bohan na kabakudun ma. Bohan tɛrɛ ye Rubɛn dencɛ le ri. 7 Dan ye bɔla ye ka wa Akɔri dinban tɛma ka wa se fɔɔ Debiri so ma. A ye bɔla ye ka wa tele kankan bolomaran fan fɛ ka wa se fɔɔ Kilikali so ma, mɛn ɲabɛnni Adumimu tindi la dinban tele kankan bolokinin dɔ. Dan ye wala En Semɛsi kɔ ma, ka wa se En Rokɛla so ma. 8 A ye bɔla ye ka tamin Bɛni Hinɔmu dinban tɛmala rɔ, Jebusikailu la tindi tele kankan bolokinin fudu fan fɛ. Jerusalɛmu so ye tindi wo kun de rɔ. Dan ye bɔla ye ka wa fɔɔ koyinkɛ kun dɔ, koyinkɛ mɛn ye Hinɔmu dinban telebe rɔ. Koyinkɛ wo ye Refayilu la dinban tele kankan bolomaran dɔ. 9 Dan ye bɔla koyinkɛ kun dɔ ka wa fɔɔ Nɛfitoha ji bu yɔrɔ rɔ. A ye bɔla ye ka wa Efurɔn koyinkɛ soilu la, ka bɔ ye ka wa Bahala so la, mɛn tɔɔ fanan ko Kiriyati-Jeharimu. 10 Ka bɔ Bahala, dan ye wala telebe rɔ ka wa se fɔɔ Seyiri Koyinkɛ ma, ka bɔ ye ka tamin Yeharimu Koyinkɛ tele kankan bolomaran fudu fan fɛ. Yɔrɔ wo tɔɔ fanan ko Kesalɔn. Dan ye bɔla ye ka wa Bɛti-Sɛmɛsi so la, ka bɔ ye ka wa Timina so la. 11 Dan ye wala Ɛkɛron so koyinkɛ tele kankan bolomaran fudu fɛ, ka bɔ ye ka wa Sikirɔn so la, ka tamin ye ka wa Bahala Koyinkɛ ma. A ye bɔla ye ka wa se fɔɔ Jabinɛli so ma, ka bɔ ye ka wa se Kɔɔjiba ma. 12 Kɔɔji ba tɛrɛ ye dan de ri telebe rɔ. Awa, Juda kabila la bonkɔndɔlailu ka yɔrɔ mɛn sɔrɔn, wo danilu le wo ri.

13 Josuwe ka yɔrɔ do di Jefunɛ dencɛ Kalɛbu ma Juda kabila la duu kɔndɔ, ikomin Allabatala ka a fɔ Josuwe yɛ ɲa mɛn ma. A ka Kiriyati Ariba so di a ma, mɛn ye kilila fanan ko Heburɔn. Ariba tɛrɛ ye Anaki fa le ri. 14 Kalɛbu ka Anaki bɔnsɔnilu sawa gbɛn ka ii labɔ Heburɔn so kɔndɔ. Woilu tɔɔilu ko Sesayi ni Ahiman ni Talimayi. 15 Kalɛbu bɔra ye ka wa Debirikalu kanma. Fɔlɔ Debiri so tɔɔ le tɛrɛ ko Kiriyati Sefɛra. 16 Wo tuma, Kalɛbu ka a fɔ ko: «Ni mɔɔ mɛn ka Kiriyati Sefɛrakailu kɛlɛ ka ii la so mira, n di n denmuso Akisa di wo tii ma ka a kɛ a muso ri.» 17 Otiniyɛli tɛrɛ ye Kalɛbu dɔɔcɛ Kenasi dencɛ le ri. Ale wara so kɛlɛ ka a mira. Wo rɔ, Kalɛbu ka a denmuso di a ma ka a kɛ a muso ri. 18 Akisa seni a cɛɛ la bon na, a ka a fɔ a cɛɛ yɛ ko wo ka kan ka duu do ɲinin a fa fɛ. Wo kɔ rɔ, Akisa wara bɔ a fa fɛ. A jiira ka bɔ a la fali kan tuma mɛn na, Kalɛbu ka a maɲininka ko: «A ye di? N ye nfen kɛ i yɛ?» 19 Akisa ka a fɔ ko: «I jaandi, i ye n nadiya. I ye tenkema yɔrɔilu di n ma, baa i ka duu di n ma Nɛkɛbi.» Wo rɔ, Kalɛbu ka sandɔ tenkema yɔrɔilu di a ma, a ni duula tenkema yɔrɔilu.

Juda kabila la soilu

20 Juda kabila ka duu mɛn sɔrɔn, woilu le wo ri, bonkɔndɔla bɛɛ ni a ta. 21 Wula kɔndɔ so mɛnilu ye Nɛkɛbi, Juda kabila la duu rɔ, so mɛnilu kɔnin ma jan Edɔmukailu la jamana dan na, woilu tɔɔ le ɲin di: Kabisela, Ederi, Yakuru, 22 Kina, Dimona, Adeyada, 23 Kedɛsi, Hasɔri, Jitinan, 24 Sifu, Telemu, Behalotu, 25 Hasɔri Hadata, Keriyota Hɛsirɔn mɛn tɔɔ fanan ko Hasɔra, 26 Amama, Sema, Molada, 27 Hasɔra Kada, Hesimɔn, Bɛti-Pɛlɛta, 28 Hasara-Suwali, Bɛri-Seba, Bisihotiya, 29 Bahala, Hiyimu, Ɛsɛmu, 30 Elitolada, Kesili, Horima, 31 Sikilaki, Madimana, Sansana, 32 Lebahota, Silimu, Ayin, a ni Rimɔn. Wo bɛɛ ladɛnnin kɛra so ba muwan ni kɔnɔndɔ (29) le ri, a bɛɛ ni a so mɛsɛnilu.

33 Juda kabila la so mɛnilu tɛrɛ ye telebe gbɛkula yɔrɔ rɔ, woilu tɔɔ le ɲin: Ɛsitahɔla, Sora, Asɛna, 34 Sanowa, En Kanimu, Tapuwa, Enamu, 35 Jaramutu, Adulamu, Soko, Aseka, 36 Sarayimu, Aditayimu, a ni Kedera (mɛn tɔɔ fanan ko Kederotayimu). Woilu bɛɛ ladɛnnin kɛra so ba tan ni naanin de ri, a bɛɛ ni a so mɛsɛnilu.

37 Senan, Hadasa, Mikidala Kada, 38 Dileyan, Misipa, Jokitɛla, 39 Lakisi, Bosikata, Ekilon, 40 Kabɔn, Lahimasa, Kitilisu, 41 Kederɔti, Bɛti-Dakɔn, Nama, a ni Makeda. Woilu bɛɛ ladɛnnin kɛra so ba tan ni wɔɔrɔ le ri, a bɛɛ ni a so mɛsɛnilu.

42 Libina, Etɛra, Asan, 43 Jɛfɛta, Asina, Nesibu, 44 Keyila, Akisibu, a ni Maresa. Woilu bɛɛ ladɛnnin kɛra so ba kɔnɔndɔ le ri, a bɛɛ ni a so mɛsɛnilu.

45 Ɛkɛron so fanan tɛrɛ ye Juda kabila la duu rɔ, a ni a so mɛsɛnilu ni a todailu. 46 So ba ni so mɛsɛn mɛnilu tɛrɛ ye Ɛkɛron ni Kɔɔjiba tɛma, mɛnilu kɔnin ma jan Asidɔdi so la, woilu bɛɛ tɛrɛ ye a rɔ. 47 Asidɔdi so ni Kasa so fanan tɛrɛ ye a rɔ, a ni ii so mɛsɛnilu ni ii todailu. Yɔrɔ wo ye wala tele kankan bolokinin dɔ fan fɛ ka wa se fɔɔ Misiran kɔ ma. A ye wala telebe rɔ fan fɛ ka wa se fɔɔ Kɔɔjiba ma.

48 Juda kabila la so mɛnilu tɛrɛ ye koyinkɛ ma yɔrɔ rɔ, woilu tɔɔ le ɲin di: Samiri, Jatira, Soko, 49 Dana, Kiriyati Sana mɛn tɔɔ fanan ko Debiri, 50 Anabu, Esitemoya, Animu, 51 Kosɛni, Holɔn, a ni Kilo. Woilu bɛɛ ladɛnnin kɛra so ba tan ni kelen de ri, a bɛɛ ni a so mɛsɛnilu.

52 Araba, Duma, Esana, 53 Janimu, Bɛti-Tapuwa, Afeka, 54 Humeta, Kiriyati Ariba mɛn tɔɔ fanan ko Heburɔn, a ni Sihɔri. Woilu bɛɛ ladɛnnin kɛra so ba kɔnɔndɔ le ri, a bɛɛ ni a so mɛsɛnilu.

55 Mahɔn, Karamɛli, Sifu, Juta, 56 Jisirele, Jokidehamu, Sanowa, 57 Kahini, Kibeya, a ni Timina. Woilu bɛɛ ladɛnnin kɛra so ba tan de ri, a bɛɛ ni a so mɛsɛnilu.

58 Halula, Bɛti-Sura, Kedɔru, 59 Marata, Bɛti-Anɔti, a ni Elitekɔna. Wo bɛɛ ladɛnnin kɛra so ba wɔɔrɔ le ri, a bɛɛ ni a so mɛsɛnilu.

60 Kiriyati Bahali mɛn tɔɔ fanan ko Kiriyati-Jeharimu, a ni Raba. Wo bɛɛ ladɛnnin kɛra so ba fila le ri, a bɛɛ ni a so mɛsɛnilu.

61 So doilu tɛrɛ ye kiɲɛ fufu kɔndɔ. Woilu tɔɔ le ɲin: Bɛti-Araba, Midini, Sekaka, 62 Nibisan, Kɔɔ so, a ni En Kedi. Woilu bɛɛ ladɛnnin kɛra so ba wɔɔrɔ le ri, a bɛɛ ni a so mɛsɛnilu.

63 Juda kabila mɔɔilu ma se Jebusikailu gbɛnna ka ii labɔ Jerusalɛmu so kɔndɔ. Wo rɔ, Jebusikailu siini Juda kabila mɔɔilu tɛma so kɔndɔ ye haan bi.