Josué 22

Josuwe ka kabila fila ni a talantɛ labila

1 Nba, Josuwe ka Rubɛn kabila makili, a ni Kadi kabila ni Manase kabila talantɛ. 2 A ka a fɔ ii yɛ ko: «Allabatala la baaraden Musa ka jamarili mɛnilu di, ai ra wo bɛɛ kɛ koɲuma. N ka jamarili mɛnilu di, ai ra wo bɛɛ fanan kɛ a ɲa ma. 3 Waati jan kɔrɔ haan bi, ai ma ai ban ai badenma Isirayɛlikailu dɛmɛnna. Ai Maari Allabatala ka ai lɔ mɛn kɛla, ai ra wo kɛ. 4 Ai Maari Allabatala ka lahidi ta ko a ri ai badenmailu lasii hɛrɛ rɔ yan. Sisɛn, a ra lahidi wo dafa. Nba, sisɛn ai ye ai kɔsɛ ka wa ai jɛrɛ la duu kan, Musa ka mɛn di ai ma Juridɛn Ba telebɔ rɔ. 5 Kɔni Musa ka a fɔ ai yɛ ko ai ye ai Maari Allabatala kanin kosɛbɛ, ko ai ye a la sila taama. Ko ai ye a la jamariliilu bɛɛ mira ka woilu kɛ. Ko ai ye ai fasa a ma. Ko ai ye a bato ai jusukun bɛɛ la, a ni ai sɛɛbɛ bɛɛ la. Ai ye jamarili ni sariya woilu latelen kosɛbɛ.»

6-8 Josuwe banni wo fɔla, a ka duwawu kɛ ii yɛ, ka sila di ii ma. A ka a fɔ ko: «Ai ra nanfulu ba sɔrɔn. Ai ye wa woilu ri ai wara. Kolofen siyaman ye ai bolo, a ni wodigbɛilu ni saninilu ni sulanɛɛilu ni nɛɛfin. Faanin siyaman fanan ye ai bolo. Ai ka nanfulu wo bɛɛ mira ai juuilu le la. Sisɛn, ai ye wa woilu ratala ai ni ai badenmailu tɛma.» Wo rɔ, ii ka ii kɔsɛ ka wa ii wara.

Musa tun ka duu do di Manase kabila talantɛ ma Basan mara rɔ, Juridɛn Ba telebɔ rɔ. Josuwe le ka duu do di kabila wo talantɛ tɔ kelen ma Juridɛn telebe rɔ, ii badenma Isirayɛlika tɔilu tɛma.

Saraka bɔ diya lɔ ko Juridɛn Ba da la

9 Rubɛn kabila mɔɔilu ni Kadi kabila mɔɔilu ni Manase kabila talantɛ mɔɔilu bɔra Isirayɛlika tɔilu fɛ Silo so kɔndɔ, ni a ye Kanaan jamana rɔ. Ii ka sila mira ka wa ii wara Kiliyadi jamana rɔ. Yɔrɔ wo le dira ii ma, ka a kɛ ii ta ri, ikomin Allabatala ka a fɔ ɲa mɛn ma ka fara Musa la. 10 Ii se mɛn kɛni Kelilɔti, ii ka saraka bɔ diya belebele ba do lɔ Juridɛn Ba dala Kanaan jamana rɔ ye.

11 A fɔra Isirayɛlika tɔilu yɛ ko Rubɛn kabila ni Kadi kabila ni Manase kabila talantɛ ka saraka bɔ diya belebele ba do lɔ Juridɛn Ba dala Kanaan jamana rɔ Kelilɔti tɔrɔfɛ. 12 Ii ka wo mɛn tuma mɛn na, ii bɛɛ ka ii ɲɔɔn nadɛn Silo, ko ii watɔ kabila woilu kɛlɛla.

13 Isirayɛlikailu ka Alla la sarakalasela Elasari dencɛ Finehasi kelaya, ko a ye wa Rubɛn kabila ni Kadi kabila ni Manase kabila talantɛ tɛrɛn ye Kiliyadi jamana rɔ. 14 Ii ka jama ɲɛmɔɔ mɔɔ tan lawa a fɛ, kabila kelen ɲɛmɔɔ kelen. Ɲɛmɔɔ tan woilu bɛɛ ye denbaya kuntiilu le ri Isirayɛlikailu la bonkɔndɔlailu tɛma. 15 Woilu wara Rubɛn kabila ni Kadi kabila ni Manase kabila talantɛ tɛrɛn Kiliyadi, ka a fɔ ii yɛ ko: 16 «Allabatala la mɔɔilu bɛɛ ka a fɔ ko ai ra bɔ Allabatala la sila kan, ka saraka bɔ diya lɔ ai jɛrɛ yɛ. Ko nfenna ai ka kojuu ba ɲin kɛ Isirayɛlikailu Maari Alla la? Ko nfenna ai ra murunti Allabatala kanma ten? 17 An tɛrɛ ra tiɲanni mɛn kɛ Peyɔri ye, wo dɔɔman wa? Adon, haan bi an tɛrɛ ma an nadahaya wo julumun na ko ma hali a ra fitinna jankarɔ lana Allabatala la jama bɛɛ ma. 18 Ko a ye di? Ko ai ye bɔla Allabatala la sila kan wo rɔ sisɛn wa? Ko ni ai muruntira Allabatala kanma bi, sini a ri dimin Isirayɛlikailu jama bɛɛ ma. 19 Ko ni a ye ai ɲana ko ai la jamana ma bɛn Allabatala bato le ma, ai ye ai kɔsɛ a la jamana ma, a la daa makɛ faaninbon lɔnin mɛn kɔndɔ. Ko ai ye wa ai sii andeilu fɛ ye. Ko kɔni ai kana saraka bɔ diya gbɛrɛ lɔ ai jɛrɛ yɛ, ka wo la an na Maari Allabatala ta kan. Ko ai kana murunti Allabatala kanma ten, wala ka murunti andeilu ma. 20 Ko ai jɛrɛ ka a lɔn ko Serahi dencɛ Akan ka kojuu ba kɛ waati taminni, baa a ka fen do ta, Allabatala tun ka tɔn sii mɛn tala. Ko Allabatala la mɔnɛ ma se Isirayɛlikailu bɛɛ ma wo rɔ wa? Ko Akana kelen ma faa a la kojuu kosɔn de?»

21 Rubɛn kabila ni Kadi kabila ni Manase kabila talantɛ ka kabila gbɛrɛilu la bonkɔndɔlailu ɲɛmɔɔilu jabi. 22 Ii ka a fɔ ko: «Alla le ye Sebɛɛtii ri, ale le ye Allabatala ri! Alla le ye Sebɛɛtii ri, ale le Allabatala ri! Ale ka a lɔn andeilu ka saraka bɔ diya lɔ kun mɛn na. Fɔɔ Isirayɛlikailu fanan ye a lɔn. Ni a kɛra kojuu ba le ri Allabatala ma, wala murunti ko ri a kanma, ai ka kan ka an halaki bi. 23 An ma saraka bɔ diya wo lɔ an bɔ kanma Allabatala la sila kan. An ma a lɔ sarakailu janinta kanma, wala ka suman sarakailu wala jususuma sarakailu bɔ a kan. Ni an ka a lɔ kun woilu le la, Allabatala jɛrɛ ye wo hakɛ bɔ an dɔ. 24 Kɔni wo ko tɛ. An ka a lɔ hamin de kosɔn, baa an silanni de ko ai bɔnsɔnilu kana a fɔ an bɔnsɔnilu yɛ sini natɔ ko: ‹Dɛ ɲuman ye ai ni Isirayɛlikailu Maari Allabatala tɛma? 25 Allabatala jɛrɛ le ma Juridɛn Ba bila an ni ai Rubɛn kabila ni Kadi kabila mɔɔilu tɛma wa? Ai niiyɔrɔ foyi le tɛ Allabatala fɛ.› Nba, ni wo kɛra, ai bɔnsɔnilu ri kɛ sababu ri an bɔnsɔnilu ri Allabatala bato boloka. 26 Wo le kosɔn an ka a fɔ ko an di saraka bɔ diya ɲin lɔ. Kɔni an ma a lɔ ko an ye saraka janintailu janinna a kan, wala ka saraka gbɛrɛilu bɔ a kan. 27 An ka a lɔ le, sa a ri kɛ sereya ri ai ni andeilu tɛma, a ni ai bɔnsɔnilu ni an bɔnsɔnilu tɛma, ko andeilu fanan ye Allabatala ɲakɔrɔ. Ko an fanan ye an na saraka janintailu janinna ye, ka an na saraka gbɛrɛilu ni jususuma sarakailu fanan bɔ a yɛ ye. Saraka bɔ diya wo ri kɛ sababu ri, ai bɔnsɔnilu ti nala a fɔla an bɔnsɔnilu yɛ sini natɔ ko, ‹ai niiyɔrɔ foyi tɛ Allabatala fɛ.› 28 An ka a fɔ ko lon do rɔ ni ii ka kuma wo fɔ an yɛ, wala an bɔnsɔnilu yɛ, an di a fɔ ii yɛ ko, ‹ii ye Allabatala saraka bɔ diya bisiki wo ragbɛ. Ko an benbailu le ka wo lɔ. Ko kɔni ii ma a lɔ saraka janinta kanma, wala ka saraka gbɛrɛ bɔ a kan de. Ko ii ka a lɔ sa a ri kɛ sereya ri ai ni andeilu tɛma.› 29 Nba, a miriya tɛ an na fewu ka murunti Allabatala kanma ka bɔ a la sila kan. An ma saraka bɔ diya wo lɔ saraka janintailu janin kanma a kan, wala ka suman saraka wala sarakailu gbɛrɛilu bɔ a kan. An tɛ a fɛ ka saraka bɔ saraka bɔ diya si kan, fɔɔ an Maari Allabatala saraka bɔ diya, mɛn ye a la daa makɛ faaninbon donda la.»

30 Nba Rubɛn kabila ni Kadi kabila ni Manase kabila ka kuma mɛn fɔ, wo diyara Alla la sarakalasela Finehasi ni jama la ɲɛmɔɔ tan wo yɛ, Isirayɛlikailu denbaya kuntii mɛnilu nani Finehasi fɛ kɔnin. 31 Alla la sarakalasela Elasari dencɛ Finehasi ka Rubɛn kabila ni Kadi kabila ni Manase kabila talantɛ jabi: «An bɛɛ ka a lɔn sisɛn ko Allabatala ye an fɛ, baa a miriya tɛrɛ ye an na ko ai ka kojuu ba mɛn kɛ Allabatala la, ai ma wo kɛ. Wo rɔ, ai ra Isirayɛlikailu lakandan Allabatala bolo, baa ai ma a fanka labe andeilu bɛɛ kan.»

32 Nba, Alla la sarakalasela Elasari dencɛ Finehasi ni ɲɛmɔɔ tan woilu bɔra Rubɛn kabila ni Kadi kabila wara Kiliyadi jamana rɔ, ka ii kɔsɛ Kanaan jamana rɔ. Ii seni ye, ii ka dantɛɛli kɛ Isirayɛlikailu yɛ. 33 Dantɛɛli wo diyara ii yɛ. Ii ka Allabatala tando. Ii miri tɛrɛ ye a la ɲa mɛn ma kɔrɔman ko ii ri wa Rubɛn kabila ni Kadi kabila kɛlɛ ka ii la jamana ratiɲan, kɔnin dantɛɛli wo kosɔn ii ma ii miri wo ma butun.

34 Rubɛn kabila ni Kadi kabila ka saraka bɔ diya tɔɔ la ko «Sereya le a ri an tɛma ko Allabatala kelen pe le Alla ri.»