1 Ka Isa to Alla batobonba kɔndɔ, a ka a ɲa lɔ wodi bila diya rɔ. A ka nanfulutii doilu yen, mɛnilu tɛrɛ ye wodi ba bilala ye. 2 A ka cɛsamuso fantan do fanan yen, mɛn ka daɲa gbanan mɛsɛn fila kɛ wodi bila diya rɔ.

3 Isa ka wo bɛɛ lakɔrɔsi ka a fɔ ko: «Tuɲa le! Cɛsamuso fantan wo ra wodi mɛn bɔ, wo ka bon mɔɔ tɔilu bɛɛ ta ri. 4 Ii kelen kelenna bɛɛ ka dɔɔnin bɔ ii la nanfulu ba rɔ ka a di Alla ma, kɔni ale, a la balo wodi mɛn bɛɛ tɛrɛ ye a bolo, a ka a bɛɛ di.»

5 Wo kɔfɛ, karanden doilu tɛrɛ ye barola Alla batobonba la ko kan. Ii ko: ko a lɔra kabakudun ɲumailu le la. Ko a masidi fenilu, mɛnilu dini Alla bonya kanma, ko woilu keɲi kosɛbɛ. 6 Isa ka ii jabi: «Bi, ai ɲa ye bon ɲin na, kɔni sini mɛn natɔ, a bɛɛ ri te. A kabakudunilu bɛɛ ri jɛnsɛn ka bɔ ye. A kabakudun si tɛ to ɲɔɔn kan.» 7 Karandenilu ka Isa maɲininka ko: «Karanmɔɔ, wo ri kɛ waati ɲuman na? A waati wa sudunya, an di a lɔn tɔɔmasere ɲuman de ma?» 8 A ka jabili kɛ ko: «Ai ye ai janto ai jɛrɛ rɔ, sa mɔɔ si kana ai lafili, ka a masɔrɔn mɔɔ siyaman di na ai ma n tɔɔ rɔ, ka a fɔ ko Mɔɔ Ɲenematɔmɔnin de a ri, ko Alla la waati ra se. Ai kana bila woilu si kɔ. 9 Ai wa kɛlɛilu kibaro mɛn, a ni murunti kibaro, ai kana silan. A fɛrɛ tɛ fo wo koilu ye kɛ fɔlɔ, kɔni dunuɲa laban tɛ wo si ri fɔlɔ.»

10 A ka a fɔ ko: «Siya ri wuli siya kanma. Mansayala ri wuli mansayala kanma. 11 Duukolo yɛrɛyɛrɛ ba ri kɛ yɔrɔ doilu rɔ, a ni jankarɔ juu, a ni kɔnkɔ fitinna ba. Masilan fenilu ri kɛ san dɔ, a ni tɔɔmasere bailu.

12 «Kɔni, sani wo koilu ye kɛ, mɔɔilu ri ai mira ka ai bɛnsɛnkɔninteya. Ii ri ai don salibon ɲɛmɔɔilu bolo, ka ai bila kaso la. Mɔɔilu ri wa ai ri kiti diya mansailu ni jamana ɲɛmɔɔilu wara. Tɔrɔya wo bɛɛ ri kɛ ai la nde la ko rɔ. 13 Kɔni wo bɛɛ kɛtɔ fɛrɛ dila ai ma ka n na sereya bɔ ai mirabailu ɲana. 14 Yani wo waati ye se, ai ye ai jusu latɛɛ, sa ai kana hamin ai lafasali ko rɔ. 15 A waati wa se, nde jɛrɛ ri lafasali kuma hankili di ai ma, ai ri mɛn fɔ. Ai juu si ti se kuma wo sɔsɔla. 16 Ai sɔrɔnbailu ni ai kɔrɔilu ni ai dɔɔnninilu ni ai badenmailu ni ai teriilu, woilu jɛrɛ ri ai janfa ka ai doilu faa. 17 Mɔɔ bɛɛ ri ai magboya nde la ko rɔ. 18 Hali wo, ai tɛ halaki, hali ai kunsi den kelen pe tɛ tunun. 19 Wo rɔ, ai ye i raja tuma bɛɛ ka i lɔ, sa ai ri ai jɛrɛ kisi.

20 «Kɛlɛdenilu wa na Jerusalɛmu so laminin dɔ lon mɛn, ai ye a lɔn ko so te tuma ra se. 21 Wo lon, mɔɔ mɛnilu ye Jude mara rɔ, woilu ye ibori ka wa koyinkɛilu kan. Wo wa mɛnilu tɛrɛn Jerusalɛmu so kɔndɔ, woilu ye bɔ ka wa idoon. Mɔɔ mɛnilu kɛra sɛnɛ rɔ, woilu kana don so kɔndɔ butun, 22 ka a masɔrɔn, wo lon di kɛ Alla la jahadi lon di, sa fen fen sɛbɛni Alla la kitabu rɔ, wo bɛɛ ri dafa. 23 Wo lon, gbalo ri la muso kɔnɔmailu ni denbatiilu ka kan ka a dan natamin, baa jamana bɛɛ ri jakankata. Jahadi ri la mɔɔ bɛɛ kan. 24 Doilu ri sɔɔ fanmuru la ka faa. Doilu ri mira ka bila jɔnya rɔ dunuɲa fan bɛɛ rɔ. Wo tuma, siya gbɛrɛ mɔɔilu ri don Jerusalɛmu. Ii ri don fanka jɛrɛ jɛrɛ la, ka to ye haan ka jahadi waati wo dafa.

25 «Tɔɔmasere ri kɛ tele ni karo ni loloilu la san dɔ. Dunuɲa kɔndɔ, ji wunwan bailu ri wuli kɔɔji kan, ka kɛ mankan ba ri. Wo ri mɔɔilu tɔrɔ ka ii kɔndafili. 26 Ko mɛnilu kɛtɔ dunuɲa rɔ, wo ri mɔɔilu masilan fɔɔ ka ii kidon a la, ka a masɔrɔn hali san kɔndɔ fenilu ri lamaa ka bɔ ii nɔ rɔ. 27 Wo tuma, ii ri Mɔɔ Dencɛ natɔla yen duru rɔ, sebaya ba ni nɔɔrɔ ba rɔ. 28 Ni ai ka ko woilu kɛtɔla yen, ai ye i lɔ ka ai ɲa lɔ san ma, ka a masɔrɔn ai la kanhɔrɔya waati ra sudunya.»

29 Wo kɔ, Isa ka kuma kɔrɔlama do fɔ ii yɛ ko: «Ai ye toro ju lakɔrɔsi, wala jiri dogbɛrɛ. 30 A wa naron, ai ye a fɔla ko sanma donda ra sudunya. 31 Wo ɲa ma, ko mɛnilu fɔni ai yɛ bi, ai wa woilu kɛtɔ yen, ai ri a lɔn ko Alla la mansaya ra sudunya. 32 N di tuɲa fɔ ai yɛ. Yani ɲin ko bɛɛ ye ban kɛla, bi mɔɔilu tɛ ban sala. 33 San ni dunuɲa ri ban ka tunun fewu, kɔni n na kuma tɛ ban habadan!

34 «Ai ye ai jɛrɛ la ko lakɔrɔsi. Ai kana to ai diyani koilu kɛla, ka dɔlɔ min ka ai ɲa laminin, ka hamin dunuɲa sii ɲa la. Lon wo kana ai mira a bolo ma ikomin miralifen ye sobo mirala ɲa mɛn ma. 35 N natola ri kɛ ikomin julu lasiini, fen fen bɛɛ ye duukolo kan a ri a bɛɛ mira. 36 Wo rɔ, ai ye to iɲɛna, ka Alla matara tuma bɛɛ; sa ai ri fanka sɔrɔn kojuu ɲin ma, mɛn kɛtɔ kɔnin; sa ai ri bɔ wo bolo; sa ai ri se ka i lɔ Mɔɔ Dencɛ ɲana.»

37 Nba, Isa tɛrɛ ye mɔɔilu karanna Alla batobonba jin kɔndɔ lon lon. Ni su kora, a ri wa susi koyinkɛ yɔrɔ rɔ, mɛn tɔɔ ko Olibiye Koyinkɛ. 38 Sɔɔma jonna, mɔɔilu ri i ladɛn Alla batobonba jin kɔndɔ ka ii tolo malɔ a la.