1 Ni olemani oni, ala shoza bibi bita, okwunu fofu kpo kame kpo yoza iyi kpa anya yoya, kpo yase ishi kpe esasosa. 2 Ala le bya ayi meme ni ba yimu kinyi kame neshi ishi kpiri ko gwa, ishini ala gwa ala ba gye, kweyi Owuso ya ngmala. 3 Byoni Okpa ko Owuso kani, <<Ala ma ki gye ma Adole shoshi.>>

4 Ala webe ka Adole, akyo ni gbo olayi ni. Ni ase tela nu mo owojije lo ni, Owuso ke sho kweyi shoshi sheyi gagye danu. 5 Ala wa bya awakyo ni gbo olayi ni, ala shuwabita shini ana yoko kpala ko mole ko Owuso, ebe ni ala ba yoko bya awosapa neshi ko peshi ni Owuso ya yimu, bwebe ko Oyesu Okristi. 6 Okpa ko Owuso kamo,

<<Nshikyikpo neneshi,

ni nyya yi kwu wite kole ni nyyo kwagye Osiyona ni;

kpiri kase ni kyogwu kpa akyo mani oya gbowuru lo.>> 7 Anani ebe kawase ni kyogwu, kpa akyo mani amo woza neshi. Ebe kawase ni kyogwu kpa nu lo ni ke,

<<Akyo ni awomoda tela nu

pini pya shoshi she la.>> 8 Kweyi Okpa oye ki kamo,

<<Akyo ni ya yase ya shikawu ni

kpo okpo ni ya yase ya gbo ni.>>

Aba shikawu ikweyi koni akyogwu kpe ela ko Owuso lo, omani wo oza ni Owuso gbo dawa ni oma.

9 Ala ke wa ase ni Owuso shu, ayose ko Owuso ose, agye ni gbi igyashi, awase ko Owuso, ni oshuwa shini ana ko oza ki igbashi ni Owuso ya ni, oyaha ogwu shipu kebe dibu wipu kebe yoyu ki igbashi nu. 10 Ishi oye ala wase ko Owuso lo, anani ke ala wase ko Owuso; ishi oye ala gyi iyinyinyi ko Owuso lo, anani ke ala pyi iyinyinyi nu wa.

11 Ayene hin moshi, nyya bala, ni wo ogboga kpa wo nyinya kefu ese mani! Ala nwanyi kpo oza bibi ni ikpiye ya yimu, ki ya kpefu kpo omaku kala ishi kpiri ni. 12 Ala kwiyi kala neshi ipu kawase ni gyo Owuso lo ni, shini owoni akwala epwo mala nyowe, aba moza neshi ni ala yani kweyi aba sho Owuso iye eno ni oya wa nu.

13 Ala geyagye dase kpiri abishi ka Adole, ala geyagye dose ni ya kpogwu kase kpiri ni, 14 kwe awoteyi kokpagye, ni ashuwa ko gbawase ni ba yo bibi ogo agye, kweyi zabokpa dase ni ba yoneshi ni. 15 Ozani Owuso ya yimu shini ahan yani yoma, owoni ayo neshi awikyo ni ba ko obibi basha. 16 Ahan bagye byase ni pyo minyo, ka yoko kpo ominyo wo shini oyabo kobibi lo; yagye byo oshe ko Owuso. 17 Geyagye neshi da ananoho: yimu kase ni gbotuse bya ala, do Owuso abokpa, kweyi ogeyagye do Ose.

18 Ala awoshe ala ziyi kala da Adole kala kweyi geyagye dawa kokwokwoshi, ka geyagye da awase ni bayo neshi kpi iyinyinyi kin ni lo, ke ya mama ni da awase ni ba ya ala obibi ni. 19 Owuso ya sa aboneshi, owoni ozotu kpo dose kpo owe moma koni gye mo owo oyoya ko Owuso ni. 20 Abola wo ke yini, owoni ozotu kpi ize gwogwo ikweyi koni oyo zalabi ni? Owoni oke zotu kpo owe koni oyoza neshi ni, Owuso ya sa aboneshi ikweyi nu. 21 Ikweyi koni pini Owuso yogwu la, mamani Okristi mowe ikweyi wo shini na wowe ko gba nu. 22 Oke yo ozalabi oyoye lo, kweyi ashishe ke pwela kokame bwo okwunu nu lo. 23 Ishini asesa ni oshokwunu lo, ishini oya mowe ni oyanya lo, oke zotu nu do Owuso, ino kepwo neshi. 24 Okristi abiyinu zo ozalabi ka ikpiye nu gikweyi koshi, shini an gekwu dozalabi kweyi gbolayi do oza neshi. Bwebe ko ofo ni ayo ni pini aha pyo ogege la. 25 Ala lema byo otukpo ni gebi owe ni, kweyi anani akwikye ala wa ko gboso inogbeho kobize kpase ni ya yiyi kwo olayi ka ni.