1 Ni olemani, anya owotiri shini ala geyagye da awoba kala, owoni ashe ipu wa kyogwu kpe ela ko Owuso lo, oza yoya kala ya yawoba kala ba kyogwu. Ko owoni ala koje kponu lo, 2 ikweyi koni aba mo neshi ko ogeyagye do Owuso kala. 3 Oshi kala naka wa ko gwagya kikpiye lo, kwe eyi otota kpo otiyegba kwo shoshiye neshi lo. 4 Oshi wo ke na wa koza ni yawa bwipu kotu wo ni, oshi ni ya sa lo ni, zikweyi iso lo kpo omaku mene, edo koshi mani woza nyakwu ebe ko Owuso. 5 Koni owe mani pini anya kema ni yi iyitagye do Owuso ni ba yi iyiwa shoshi bwebe ko geyagye da awobuwa. 6 Osera lemani la; ogeyagye di Ibirayi kweyi oyogwu ma adole nu. Anani awo woyi nu owoni oyo neshi kyi gboshi kojije lo.

7 Mamani awoba, owotiri shala bagye kpa anya kala kweyi ala gye ma aloshu ikpiye fala lo. Ala byuwa neneshi, ikweyi koni aba pyeshi ko olayi kpa ala dudu. Ala ya mani shini ojije naka yi inarigwu tota kala na yishi lo.

8 Ko gwejeji: owotiri shini oza yoya kotu kpi imu yoya kala na woye kponu; ala yimu kiyi kala, kweyi ala gbi iyinynyi kweyi ki wiyi kala shu. 9 Ala ka sore ko bibi kpo obibi lo kwe ase ni sesa ka sesa lo; mani oni, sore kpa aboneshi, ikweyi koni aboneshi pini woza ni Owuso shokoyi ishini oyala ogwu ni la. 10 Byo ni Okpa ko Owuso kamo,

<<Owoni oyayimu ko monye ko olayi

kweyi oyimu ko meno neshi,

shela bibi bita

kweyi sho okame bita.

11 Owotiri shini opyitikpi to oza bibi shini oyo oza neshi;

owotiri shini otikpo kotu mene kpo otu oye kponu.

12 Koni Adole ya yi iyi kwase neneshi,

kweyi ya pwi inarigwu wa ishi kpiri;

oke ya byotu kpa awino yo ozalabi.>>

13 Anoho ya yofo owoni oya takirikwu ko yoza neshi? 14 Owoni oke mowe ikweyi ko yo neshi, otunehe wo ya lemoji! Ka yoshi ka ashishe lo, kweyi ka byotu lo. 15 Ni olemani oni yo Okristi tipu kotu wo, kweyi geyagye danu bya Adole wo. Wiyoshu ishi kpiri ko kyogwu kpa ananoho ni wa doka ko kyogwu ikweyi ki iyitagye ni ogbo ni. 16 Ke kyogwu kpo okomene kweyi muwa gyiyi. Otuwo na woye kponu, shini awase ni ba sesa ikweyi koni oyayo neshi ipu kiye ko Okristi ni ana yiweyi kela ni aka ni. 17 Oya shoshi sho mowe ikweyi koyo neshi, owoni owo okyokye kotu ko Owuso, oshoshi sho ozalabi. 18 Okristi abiyinu gekwu ikweyi ka igboye kpokponu, oki gekwu ikweyi ka awinozalabi, ase neshi gekwu kase labi shini na byaha gebe ko Owuso, ayo ngmo bya angma ananoho ni, kweyi onyiso ikwu bwebe koshu ko Omaku kweyi ogbo olayi, 19 ishini oyiyi byo Omaku ni, oga tono da awomaku ni bo oruduru ni. 20 Omani wo Omaku kawase ni tela ko geyagye do Owuso ishini ozotu ya gbeyi wa ipu ki ishini Onuhu ya gbowu ni. Ishi oni ase gbayayi pini bipu ko owu, kpiri wase ahata ni inyo ruwa lo ni, 21 ni woyi ni ya myabo obatisma, ni ya ngmaha anani. Awo ko ninyi kikpiye lalo, oke wokoyi neshi ni ashe do Owuso kpo otu oye. Ongmaha bwebe ko nyiso ko Oyesu Okristi bwikwu, 22 anu ni giso ga yagye abore ko Owuso, oya kpogwu ka ayoleho kpiri, igabo kpa awoshu ni biso ni.