1 Enena mani bwabo ko Obitrus oyikoko ko Oyesu Okristi,

Gebe kase ko Owuso ni oshu ni, awase ni nyinya kefu go okpagye ko Opontus kpo Ogalatiya kpo Okapadokiya kpo Asiya, kpo Obitiniya ni. 2 Ala ni Owuso Ada kaha shala ipu ko yoya nu, okyalatu bwebe ko Omaku, shini ala geyagye do Oyesu Okristi, shini oyi nu na yo ozalabi kala na.

Oneshi kpo omene na wa ka kala nwashika.

3 An shotunehe do Owuso Ada ka Adole Oyesu Okristi! Ipu ki iyinyinyi nu odaha olayi pepe bwebe ko Oyesu Okristi ni oshiyi bwikwu. Omani yaha gbi iyitagye ko olayi pepe, 4 kweyi aha ba gbeyi ko rogwu ka aboneshi ni Owuso yitagye dase nu. Oyitagye daha iso, ebeni oya wowa lo, kwe ya yishi lo, kwe oyasa lo ni. 5 Otunehe mani wa akakala, awase ni bwebe ko otuse, oshu ko Owuso ngmaha ikweyi ko olayi ni okwobonu shaha okweyi kishi ni.

6 Ala shotunehe ikweyi koza mani, owotiri shotu kala na bya kishi gbayayi, koni aba malama, ala ba mowe gogo-gogo. 7 Owe mani gbodagye shini ana mamo otuse kala wo kwokwoshi. Ozinariya, ni ya yishi ni aba moma kpo ola, mamani otuse kala ni sho ozinariya ni aba moma shini na rese. Ala ziye shosha kpi igyashi kpa abokpa eno ni Oyesu Okristi yawa ni. 8 Ala yimu nu, koni ala omo lo ni, kweyi ala kyogwu kpanu koni ala mo lo ni. Mani oni otunehe kala ni gbigyashi ni sheyi gagye, ni okwunu kala ya gege ya ka lo, 9 ikweyi koni opyo ngmongma ko Omaku ni wi ikweyi kotuse ni ipu nu.

10 Ikweyi ko ngmongma mani awinobane zishi wa ba ikpo kweyi abane ikweyi keshi ni Owuso ya dala ni. 11 Atakirikwu ko gyi ishi ni oza mani wa gbodagye ni kpo owe ni oya gbodagye ni. Omani wi ishini Omaku ko Okristi ni yi ikpiye wa kada wa ikweyi ko owe ni Okristi wa ma ni kpi igyashi ni oya gbo ni. 12 Owuso sayi da awobane mani mo, omani woko ikweyi ki iyiwa lalo ke wi ikweyi kala, byo ni akela ikweyi koza ni ala pwo anani bwebe ka ayoleho ni tono koshu neshi dawo bwebe ko Omaku ko Owuso ni bwi iso ni. Omani wa awoza ni ayoleho ba yimu ko gye ni.

13 Mani oni, ala kyi iyi kala tu koyoko. Ala yiyitagye da aboneshi ni aba dala eno ni Oyesu Okristi ya wa ni. 14 Ala geyagye do Owuso bya ayileke, ala ka yi imoza bibi na kpa ala ogwu byi ishini ala bebe dibu ni lo. 15 Yoza gyogye byoni Owuso ni yogwu ni yo gyogye ni, awo ki yo gyogye ipu koza ni oyaya kpiri. 16 Byoni Okpa ko Owuso kamo: <<Yo gyogye byoni ami yo gyogye ni.>>

17 Ishini ala ba tinarigwu do Owuso, ala ba yogwu mo Ada, awo ni ya kepwo kananoho gyogye kpo oza ni oya ni, mani oni, ipu ko olayi wo ese mani, yagye sho geyagye do Owuso byoni oya yimu ni. 18 Ala gye mo oza ni Owuso yoko kpanu ko angmala shi ipu ko oza bibi ni ala rogwu bwebe ka awokyikyi kala ni le bya azurupa kwe ozinariya ni ba yishi ni lalo. 19 Opopa ni ake pa ni wo Okristi ni le byo Oyi Kotukpo ni gbinyi ikpiye nu lo ni ko ngmala. 20 Owuso sho ome oyese mani la, oke wa eno ko gwejeji mani ikweyi ka. 21 Bwebe nu ala kyogwu kpo Owuso, ni shiyi bwikwu kweyi danu igyashi; oza ni ya ni ala yotuse kpi iyitagye kala do Owuso. 22 Anani ala geyagye do kwokwoshi, ala yi iyi kala na, ala gbimu kotata kpa ayene kala ni gbotuse, ala yimu kiyi kala kpotu oye kponu. 23 Ikweyi koni Owuso daha olayi pepe, ni we edo ni ya yishi lo ni, oke we edo ni ya yishi lo ko ogbogbo-gbogbo, bwebe koshu kela ko Owuso ni gbo olayi kweyi kiyo ko gbogbo-gbogbo. 24 Byoni Okpa ko Owuso kani mo,

<<Kpiri kase lema byi ikyashi la,

igyashi wa kpiri lema byo oshepu ki ikyashi.

Ikyashi shoha, kweyi oshepu ya gwo shonu,

25 ela ka Adole ke yaba ko gbogbo-gbogbo.>>

Omani pini wo ono ni Oshu Neshi tono dala ni oma.