1 Byoni Okristi mowe ipu kikpiye ni, awo wiyo shu koya mamani, ikweyi koni ase ni mowe ipu kikpiye ya yo ozalabi kelo. 2 Bwa anani gohobu, oyagye wo ese mani na woza ni Owuso ya yimu ni, woza ni otu wo ya yimu ni lalo. 3 Koni nekye-nekye ala kwobonu ngmishi nwashika ba yoza ni awase ni gyo Owuso lo ba yimu ko ya ni. Ala bagye ba beba, ba mehe kanya kpa ango, ba gwinyi ya, ba tigiga keba, ba gwinyi shoshu, ba geyagye de eka. 4 Anani igbashi ya awase ni gyo Owuso lo ni kwu, ni amala ba yawoza shushukwu mani kpa awa kelo ni, kweyi aba sala esa. 5 Awa ke ba wa kojoji ni aya ni do Owuso ni kwobonu gbomu ko kepwo kawase ni biyi kpa awase ni gekwu ni. 6 Oza ni ya ni aba tono ko Oshu Neshi da awase ni gekwu ni mamani oma, shini ana wa kepwo wa gyogye kpa awase ni biyi ni; atono dawa shini ana bagye byoni Owuso ya yimu ipu ko Omaku ni.

7 Okweyi kojoji baha piya. Ala wiyi kala shu kweyi ala hagye giri shala tinarigwu. 8 Oni she kpiri yoma, ala yimu kiyi kala ko kwokwoshi, ikweyi koni imu ya byo ozalabi otu lo. 9 Ala ya anano omaba ipu kole kala katiya lo. 10 Anano wa adole keshi ko Owuso gogo-gogo, ase ni yagege ona tase ashini abo kpeshi ni opye bwebe ko Owuso ni. 11 Ase ni ya kela ko Owuso, na koshu neshi ko Owuso. Ase ni yayo ko, naya kpo oshu ko Owuso, shini ipu koza kpiri iye shosha nawa ko Owuso bwebe ko Oyesu Okristi, anu ni gbigyashi kpo oshu ko gbogbo-gbogbo. Nalemani.

12 Ayene hin moshi, onaka woza kigbashi dala lo, ikweyi ko owe ni ala ba mani, onaka woza pepe ebe kala lo, ala kamo byo owoza pepe ni tala ebyibye wa lo ni. 13 Ni olemani ala shotunehe koni ala ba medo ko owe ni Okristi mani, shini ala shotunehe nwashika kpanu ishini oya sayi igyashi nu dala. 14 Owoni asala esa ikweyi kiye ko Okristi, ala shotunehe koni oshu ko Omaku ko Owuso yo kpa ala. 15 Owoni omowe, onaka le byo owino gmase kwe owi kwe ase ni ya kyono igbo kwe kpemu kwela kase. 16 Owoni oke omowe ikweyi koni oya gboso Oyesu, ka yiweyi lo, shotunehe do Owuso koni oriye ko Okristi. 17 Ishi ko kepwo yawa, aba kwotu kepwo koka kpawase ko Owuso ikyikyo. Owoni akwotu kpaha, okweyi nu ya lemoji da awase ni kyogwu kpo Oshu Neshi ko Owuso ni? 18 Byoni Okpa ko Owuso kamo,

<<Oya lono ko ngmase neshi;

oya lemoji da awase ni gyo Owuso lo? Ikweyi koni aba yo ozalabi.>>

19 Ni olemani oni, awase ni mowe ikweyi koni ayoza ni Owuso ya yimu ni, ana gohobu kpo neshi, ana yi iyiwa da ase ni yuwa ni, oya byo okoyi nu ni oshe da awa ishi kpiri.