1 Anani, ala awolodu ala pwo! Ala sheha kpe egba kyokye ikweyi ko owe ni yawa tala ni. 2 Odu kala kwobonu kwoka wa, kweyi Oshiye kala wo ozarore ke eha. 3 Ozinariya kpa azurupa kala kwoka wa, kweyi okwoka mani yawa wi iwene ikweyi kala kweyi ya yala ikpiye byo ola. Ala kpo odu tukpa nwashika ishini ese ya wo okweyi mani. 4 Ala tela ko dawase ni yoko eho kala ni abola ko oko wa. Ala pwa akyose wa! Egba kawase ni yoko ipu ki izire kala ni fa akpaha ko Owuso, Adole ine koshu kpiri. 5 Ipu koyagye kese, ala gbojoji ni ala ba doka ni kweyi ala monye kese. Ala yiyi kala gyokwu byo obize ya gbeyi keno ni aba shuwoko ni. 6 Awase ni gbepwo lo ni ala kwuwepwo kweyi yuwa ngmo, ake tasala eyi lo.

7 Ayene hin, ala zotu gbishi ko wowa ka Adole. Ala ma awosheho ni ba zotu ba gbeyi gbishini eho wa yawa mizire kowada. Aba zotu ba gbeyi ko Owuso gbobi go okweyi ko ogwa. 8 Ala zotu mamani. Ala yi iyitagye neneshi ikweyi koni eno ko wowa ka Adole baha piya.

9 Ayene hin, ala ka kakyose ikweyi kiyikala lo, shini Owuso naka kwala epwo lo. Ino kepwo kwobonu hagye owe kofunu wa. 10 Ayene hin, ala rela kawo bane ni kela ikweyi ka Adole ni. Ala fu bwebe wa ko ozotu kpo owe moma. 11 Aba yuwogwu ma awine kotunehe ikweyi koni azotu ni. Ala pwela kotu zoze ka Ayuba, kweyi ala moza ni Adole danu ogwejeji ni. Koni Adole wine ki iyinyinyi oki ya tase abo.

12 Oni she kpiri ni, ayene hin, ala ka yiyikala ki iso kwo okpagye kwe iye kojije lo. Ee kala na wo ee, kweyi aayi kala na wo aayi, shini Owuso naka kwala epwo lo.

13 Owoni ashe ipu kala ya mowe, ona tinarigwu. Owoni ashe ipu kala ya shotunehe, ona wigye sho Owuso iye. 14 Owoni ashe ipu kala ya gbere, ona ya awanyakwase ko oda ko Owuso ogwu, shini ana wa tinarigwu danu ba nya ano ipu kiye ka Adole. 15 Inarigwu ko otuse ya di ine ke ere ogege ki ikpiye; Adole ya dano ogege ki ikpiye, kweyi owoni oyo ozalabi oya rigbo. 16 Mani oni, ala ko ozalabi ni ala ya ni diyi kala, kweyi ala tinarigwu diyi kala, shini ala pyo ogege ki ikpiye. Inarigwu kase neshi gboshu kotata kweyi ya yo oko. 17 Iliya wa asuse byaha la. Otinarigwu loshu, loshu mo owuso naka yiwo lo, owuso ke yiwo lo ki ishayi eta kpo oya ihiri. 18 Oki tinarigwu, iso shonu ki inyo, okpagye yi izire neshi.

19 Ayene hin, owoni ashe ipu kala showe kokwokwoshi bita, kweyi ashe ipu kala ki kwikye anu wa, 20 ala rela mani: ase ni kwikye ine ko ozalabi wi ikweyi ko owe ongmo omaku nu shi ikwu kweyi yo ozalabi nwashika bya.