1 Enena mani bwabo hin Oyakubu, oshe ko Owuso kpa Adole Oyesu Okristi:

Gebe ka awose igwepa ni pasha ebebenya ipu kese kpiri ni.

2 Ayene hin, ala ziyi kala mala shotunehe ishini amalama owe gogo-gogo ni, 3 ikweyi koni alagye mo, otuse kala ya gye owoni amalama kweyi oya yala ba zotu. 4 Ala zotu kpo ojoji shini ala gye kweyi ki gyogya ipu ko Omaku, ojije naka nyala lo. 5 Owoni ashe kala gbo oziyi lo, ona bo Owuso, ni ya dala oza ni; ikweyi koni Owuso ya da anano oza yeye kpo otu oye kponu. 6 Ishini oke ya tinarigwu, owotiri shini okyogwu kpotu oye kponu. Ikweyi koni ine kotu epa lema byo ogwa kishu ni owu ya to geye giso ni. 7 Edo kase mani naka yo otuse manu ya pyoje ebe ka Adole lo. 8 Ikweyi koni owine kotu epa, oya hikpo oye kponu lo ipu koza yo ya nu kpiri.

9 Ayene ni wo oleha ni, na shotunehe do Owuso ishini ozuwa iso ni, 10 mamani owotiri da ayene ni wo olodu, ana shotunehe do Owuso ishini okwikye awa itikpi ni. Ikweyi koni odu ya kweyi byo oshepu ki ikyashi ni. 11 Ishini eno weyi, oyasi ikyashi, oshepu nu ba gwo shonu, ome oshinu ya kweyi, mamani olodu ya gekwu sho otoyu nu bita.

12 Otunehe yo kpa awase ni zotu ishini amuwama, ishini ayo omama mani gwagye, aba pya abola ko olayi ko gbogbo-gbogbo ni Owuso shokoyi dawo yimu nu ni. 13 Awase ni amuwama, ana ka kamo, Owuso pini muwama la lo. Ikweyi koni aba mo Owuso ma kpo ozalabi lo, anu abiyinu ke ya mashishe ma lo. 14 Imu oza kaha bwowe ni shoshi lo ni pini yaha ba gbo gipu ko ozalabi la. 15 Ishini imu ko ozalabi bipu oya mo ozalabi, ishini ozalabi gyagwu oya mi ikwu.

16 Ayene hin moshi, ashishe naka gyalegya lo! 17 Eshi kpiri ni shoshi kiyo gyogye ni yawa bwi iso la; ya sa bwebe ko Owuso, ino ya awoyoyu ki iso, ni ya pya lo oke ya yebe dibu bwebe ko pyopya nu lo. 18 Bwebe kimu kotu nu oyaha bwebe kela ko okwokwoshi, shini ahan wa kikyikyo ipu kawoza kpiri ni oya ni.

19 Ayene hin moshi! Ela mani na yipu kotu kala, ananoho naya papa ko pwela, oke naka ya papa ko kela lo, naka ya papa ko kyanya lo. 20 Anya kyokye kasuse ya byoza neshi ni Owuso ya yimu ni wa lo. 21 Mani oni, ahan shoza kobwa kpo ozalabi kpiri bita. Ala kpotu so Owuso shini ala zela ni oya tu ipu kotu kala, ni ya gege ko ngma la ni.

22 Ala ka gyiyikala egya ko pwela kin lo; ala wawo yoko kpoza ni ala pwo ni. 23 Owoni ala pwela kin kweyi yoko kpanu lo, ala lema byawase ni miyiwa ipu ki iyimebe ko moza ni awe ni. 24 Amiyiwa neneshi kweyi ashebe ni bita, ebebeni anwanyi oza ni awe ni. 25 Owoni ala ke yiyi kwo ono ni ya dase ominyo ni, kweyi gbera kpanu ki pwo yeye ko nwanyi kpanu lo, ke ba yoko kpanu. Owuso ya sa ala aboneshi ipu kojoji ni ala ba ya ni.

26 Owoni ashe kala manu ya gboso Owuso kweyi ogege kwigbenu nu lo, oya gyiyinu egya oma, ogboso Owuso nu woyeye la. 27 Oza ni Owuso Ada mo owoneshi kpo okwokwoshi ko gboso ni yoma: tayokwu kpa anyokwu abo ipu ko owe ni aba mani, kweyi ka yese na yo yishi lo.