1 Ayene hin, byoni ala wawo kyogwu ipu ka Adole Oyesu Okristi ni wa Adole kigyashi ni, ala ka zashe shashe bwebe ko moma kiyi lo. 2 Owoni olodu oye la arika ko ozinariya kpo oshiye neshi wogbayi kala, kweyi oleha oye ni lashigiri ni wipu mamani. 3 Owoni ala ma ase ni shoshiye neshi ni gyiyi she kweyi ka danu mo, <<Yagye oka ni shoshi she kpiri mani,>> kweyi ka do oleha mo, <<Hagye ebe ni kwe yagye okpagye obutu hin,>> 4 ala gbepwo ko zashe shashe ipu kala, kpa ko miyi kala kpo otu oye hoha. 5 Ala pwo ayene hin! Owuso shawo oleha kese mani ko wo olodu ipu kotuse ko ki rogwu ko obula no Owuso shokoyi ko dawase ni ba yimu nu ni. 6 Ala ke ba mawo oleha gyiyi lo! Awanoho ba dala owe kweyi ba pyala gebe kawo kepwo? Awolodu la lo? 7 Awa pini ba kela bibi ikweyi kiye neneshi ni adala oni la.

8 Ala yoza neshi, owoni ala gboso ono ko Obula byoni okpa ko Owuso ka ni mo, <<Yimu kase ni ala bagye dudu ni byoni oya yimu kiyo ni.>> 9 Owoni ala ke mashe shashe byoni ala muwa kiyi ni, ala yozalabi, kweyi Ono kwala epwo mala wawo yo ono kyigbo. 10 Ase ni yo ono oye kigbo, ogbepwo ko yo ono kpiri kigbo oma. 11 Koni ase ni kamo, ka beba lo ni, anu pini kamo, ka ngmase lo la. Owoni obeba lo oke ngmase, oyo ono kigbo koni ongmase ni. 12 Ela koka kala kpoza yoya kala na le bya kase ni aba wa kepwo wa kpo ono ni ya ngmaha ni. 13 Ikweyi koni ase ni gbiyinyinyi kase lo; Owuso ya miyinyinyi nu ebe kepwo koka lo; iyinyinyi ke loshu shepwo koka.

14 Ayene hin, owoni ase manu gbo otuse kweyi oyoko lo, oji woneshi nu? Edo kotuse mani ya gege ya ngmanu? 15 Ana kamo oyene oye, onya kwe ongo gbo ozarore kpo oshiye lo. 16 Owoni ashe kala ka danu mo, <<Owuso na yo oneshi; shoshiye neshi, kweyi roza yipu!>> Kweyi oke dawo ojije ko tuwabo ipu ko olayi wa lo? 17 Mamani, owoni otuse gboko lo, owo okwu pini yoma.

18 Ashe ke ya kamo, <<Awo gbo otuse kweyi, ashe gbo oko.>> Nkyogwu mo, <<Shami otuse wo ni gboko lo ni. Ami ke ya shawo otuse hin bwebe ko oko ni nyya ni.>> 19 Owoni okyogwu mo Owuso woye, oshoshi! Omaku bibi kyogwu mamani, kpi ikpiye wode kpo oshi yoya mo Owuso woye. 20 Awo ikyo! Oya yimu na ki shawo mo otuse ni gboko lo woyeye? 21 Ayamoji zo okyikyi kaha ki Ibirayi wa aseneshi ebe ko Owuso? Bwebe ko oko ni oya ni lalo? Ni ozo oyi nu Ishaku koyi peshi okpe ni. 22 Awo ma lo? Otuse nu kpo oko nu yawu dudu; kweyi otuse nu woneshi bwebe ko oko noya ni. 23 Okpa ko Owuso ko kwokwoshi mo, <<Ibirayi kyogwu kpo Owuso, ikweyi kotuse nu Owuso mo wase neshi.>> Mani oni, Owuso yi Ibirayi ogwu mo owoya nu. 24 Ala ma, aba yase wase neshi ko Owuso bwebe ko oko yoya nu la, wo otuse nu kin la lo. 25 Ogbodagye mamani kpa agbaza Orahab. Owase neshi ebe ko Owuso bwebe ko oko nu la, ishini oza awogyebe ma ki Izrayila wole nu kweyi oki ngmawa bose bwowe oye gogo. 26 Mani oni, byoni ikpiye ni gbo omaku lo owokwu ni, otuse ni gboko lo owokwu.