1 Oji ya byo onu kpa apwo wipu kala? Obwebe kimu kiyo kese ni ya kpefu ipu kala ni la lo? 2 Ala ba yimu koza, ala ke pye lo, mani oni ala ba ngmase kweyi ba re oshu, ala ke pyoza ni ala ba yimu ni lo, ala ba gbapwo ba nonu. Ala gbo lo ikweyi koni ala do Owuso oka lo ni. 3 Kweyi ishini ala doka, ala ba pye lo, ikweyi koni ala doka kpo otu neshi lo; ala ba doka koza ko yoko kpanu ebe ko yi ngmo shi ikpiye. 4 Ala agbaza! Ala gye mo oya kese wo omonyekwotu ko Owuso la lo? Ase ni woya kese, owo omonyekwotu ko Owuso. 5 Kwe ala ba ma mo oza ni Okpa ko Owuso ka ni wo yeye la, ni omo, <<Omaku ko Owuso ni yipu kaha ni ya kpipu kotata.>> 6 Owuso ke fo oneshi manu daha. Byoni Okpa ko Owuso ka mo, <<Awino zikweyi iso Owuso ya tasuweyi, awase ni ke ba zikweyi iso lo ni, Owuso ya yuwo oneshi.>>

7 Mani oni, ala yiyi kala do Owuso, ala tela ki ibiri, oya nyinya shala bita. 8 Ala sha bo Owuso, anu ki ya sha bala. Yabo kala na, ala awine ko ozalabi! Ala yotu kala na awino yo oza iyi! 9 Ala byotu, ala kyegba kpi ize iyi; ala yeye kala pya wegba kyokye, otunehe kala na pya wotu byobya! 10 Ala ziyi kala wojije lo obutu ka Adole, anu ya nga ala iso.

11 Ayene hin, ala ka kwiyi kala epwo lo, owoni okwi inogboso Oyesu epwo, okwo Ono ko Owuso epwo oma. Owoni oke kwo Ono ko Owuso epwo, owino gboso Ono la lo, oke wino kwe epwo la. 12 Owuso fufunu pini ya dase ono, ki ya kepwo la. Anu fufunu pini ya dase olayi, ki ya yase ngmo la. Awo wanoho, ko kwashe epwo?

13 Anani ala ya kpaha tagye shini ala pwo, awino kamo <<Ikyeni, kwe okyi aha ba gogya nyakwu oni ga yagye kishayi oye kweyi kwotu ko yotoyu shini na pyi ikwiri nwashika.>> 14 Ala ke gyoza ni olayi kala ya we okyi ni lo! Olayi kala lema byo owula ke ebwu, oya bose ishi gbayayi oki ya gebi nu. 15 Oza ni ala shu ko ka ni yoma: <<Owoni Owuso kyogwu, aba gbo olayi kweyi aba yoza mani kpo olamu oni.>> 16 Anani ke, ala ba zikweyi iso kweyi ba gwabotu; edo ko gwabotu mani ke shoshi lo. 17 Mani oni, owoni ogyoza ni oshu ko ya ni, kweyi oya lo, oyo ozalabi la.