1 Ayene hin, nwashika kala naka wawo foza lo. Byoni ala gye ni, aha ni ba foza ni pini aba kwaha epwo she la. 2 Kpiri kaha ishi nwashika aba nyowe. Owoni ase ke nyowe ela koka lo, owase neshi ni ya gege ya kwiyi nu ni. 3 Aba ya arijemu ya lo onya okwunu ko yo na geyagye daha, shini ona ga agbabo ni aba yimu ni. 4 Kwe ala rela ko owu kinyo gyokwu ni owu loshu ya gege ko pyo ni, ese titi ya gege ko po, kweyi oya ga agbabo ni opowu ya yimu nu ko ga ni. 5 Mamani pini owe la kpi igbenu: koni ole titi ni, oya yoza nyakwu.

Ogye mo ikpo ko ola titi ya gege ya yi imweshi yola. 6 Igbenu lema byola la. Owese ko oza bibi, ogbebe ko yagye nu ikpiye. Oya gege ya kpo obibi ya shase ikpiye kpiri. Igbenu ya gege ko ya ase ikpiye yishi kpo ola ni webe nu bwa aleku ni. 7 Aha asuse ba gege ko yo ojoji ni Owuso ya ni shetu, ke ebe ki ikyashi, ki igbano, oza ni ba pyipu agye ni kpe ebinyi kpiri. 8 Ashishe ke ya gege ko yi igbenu shetu lo. Owoza bibi kweyi ashishe ya gege ya kwo lo, onwonwu kpe efa ko ngmase. 9 Aba yoko kpa anu ko sha Adole kpa Ada ka iye, aki ba yase okwunu kpa anu, ase ni Owuso yuwa lema byi iyi nu ni. 10 Ela ko shotunehe kpe esasosa ba bose bwo okwunu oye kponu. Ayene hin, oshu ko lemani lo. 11 Inyo neshi kpi inyo ni lono ba lu bwi ibwu oye kponu lo. 12 Ayene hin, efu ko ofig ya gbo ogwogwa ke epa lo; efu ki inabi ke ya gbo ogwogwa ko ofig lo, ibwu ko onwa ya gbi inyo neshi lo.

13 Ashe ipu kala gboziyi kpo ogyogye? Ona sayi bwebe koyagye neshi nu, bwebe koko neshi nu noya kpo zikweyi iso lo kpo oziyi nu. 14 Owoni ala ke yipu kpokpo kpafu yoya teba otu kala, ka gwabotu kpanu lo kweyi ka tela ko kwokwoshi lo. 15 Edo ko oziyi mani bwi iso pini wa la lo; owa kese la, owa ko omaku la lo, ki ibiri la. 16 Ebeni ase ba kpipu kpafu yoya, oni ya kyebe ki ya bye edo ko ozalabi kpiri yawa. 17 Oziyi ni ke wa bwiso ikyikyo wo oneshi; oki gbo omene, kweyi zikweyi iso lo kweyi ya rema kase; ogbiyinyinyi, kweyi yase ya kyizire ko oko neshi; oya yase ya gbo okwokwoshi kweyi ya yoza iyi lo. 18 Awino yimu ko omene ni ti izire ipu ko omene ni ba kyi izire ko oza neshi.