1 Ipu ki ishi ni shigbo ni ala gekwu ipu ko omaku ikweyi koni ala ba geyagye lo kweyi ba yozalabi ni. 2 Ishi oni ala ba gboso owe bibi kese; ba geyagye do omaku bibi ni wo oteyi ko oshu ko obula ko owu ni, omaku ni ya yoko ipu kawase ni ba zakpaha ni. 3 Kokwokwoshi kpiri kaha lemani ishi oye, aba bwo owe kimu ki ikpiye, aba yo oza ni ikpiye kpo otu kaha ba yimu ni. Anya ko Owuso shu ko yikweyi kaha, byoni oyikweyi kananoho ni.

4 Iyinyinyi ko Owuso ke sheyi gagye, kweyi imu ni ogbo daha ni nwashika, 5 koni agekwu ipu ko ozalabi kaha ni, oyaha gbo olayi kpo Okristi. Bwebe ke eshi ko Owuso pini angmala la. 6 Owuso yaha nyiso bwikwu kpo Okristi Adole ka, kweyi yaha bagye kpanu iso ipu ko Okristi. 7 Owuso yo mani ko sayi ke eshi nu ni gbokoka lo ni do oyi kpiri ni yawa ni bwebe ki imu kaha noya ipu ko Okristi Oyesu ni. 8 Bwebe ke eshi ko Owuso ngmala ikweyi kotuse kala, Omani ke woyoya kala lalo, owe eshi bwebe ko Owuso la. 9 Aba pye bwebe koko lalo, shini ashishe naka gwakya ikweyi nu lo. 10 Aha woko kabo ko Owuso la, oyaha ipu ko Okristi Oyesu ko yoko neshi, ni Owuso kwobonu kyanutu daha ko ya.

11 Ala rela koza ni ala we ishi oye ni, ni wase ko Oyahuda bwebe koma lo ni ase ko Oyahuda ba yala ogwu mo ofu afafu kweyi ba yiyiwa ogwu mo awase ni shofu ni (oni woza ni ase ba ya ikpiye wa ni la). 12 Ishi oni ala kema kpo Okristi. Ala wa awogboga kweyi ala bipu kawase ni Owuso shuwa ni lo. Ala gbabo ipu ka awokoyi ni Owuso she dase nu ki Izrayila ni lo, kweyi ala bipu kese mani gbiyitagye lo ala ke gbo Owuso lo. 13 Nabani ke, ipu ko Okristi Oyesu ala ni bebe lenu kpo Owuso ni abyala webe nu bwebe ko oyi ko Okristi. 14 Okristi ke byo omene wa daha bwebe ko yase ko Oyahuda kpa awase ni wase ko Oyahuda lo ni woye kponu. Oya agaya ni yuwa ko kweyi yuwa womonyekwotu kiyiwa ni yi kye kpikpiye nu. 15 Oyo Ono kase ko Oyahuda yi sa kpowe koza yoya wa, shini ona yase ko Oyahuda kpa awase ni wase ko Oyahuda lo ni na woye kponu ipu nu, bwebe koni oyuwa bagye ko omene kpiyiwa. 16 Okristi yuwa wo omonyekwotu kiyiwa ke lo bwebe kikwu nu ikweyi ko oshi, bwebe ko oshi okpuwa pwayi ipu kikpiye oye kponu kweyi kwikye awa webe ko Owuso. 17 Mani oni Okristi wa tono ko Oshu Neshi ko omene dase kpiri, dala ni wase ko Oyahuda lo ni lenu kpo Owuso ni, ki dase ko Oyahuda ni lenu kpanu lo ni. 18 Bwebe ko Okristi pini kpiri kaha, ase ko Oyahuda kpase ni wase ko Oyahuda lo ni, gege ko go obutu ka Ada ipu ko Omaku oye kponu. 19 Nabani ala ni wase ko Oyahuda lo ni ala wo ogboga ke lo; anani ala woye kponu kpase ko Owuso, kweyi wi ipwoma ko Owuso. 20 Amala mamani ikweyi kotu koda ni ayikoko ko Oyesu kpa awobane kwu ni, Okristi Oyesu abiyinu pini ke wikyikpo ni shoshi she ni la. 21 Anu pini byoda kpiri-kpiri la, kweyi yo gye wole ko Owuso sere. 22 Ipu kema kala kpo Okristi pini amala dudu kpase ashini kpiri ko webe ni Owuso ya yagye anu bwebe ko Omaku nu ni.