1 Enena mani bwa abo hin Obulus, ni osho Owuso tu ko yun wo oyikoko ko Okristi Oyesu ni,

Gebe kase ko Owuso ni be Efesu ni, awa ni gbo okwokwoshi ipu ko Okristi Oyesu ni:

2 Owuso Ada kaha kpa Adole Oyesu Okristi na dala oneshi kpo omene.

3 Ahan shotunehe do Owuso Ada ka Adole kaha Oyesu Okristi! Koni ipu ko odudu ka kpo Okristi osaha aboneshi ko omaku bwole ki iso. 4 Ome ana yese, Owuso kwobonu shaha wakakanu bwebe ko dudu kaha kpo Okristi, shini ahan wase sere ni gbepwo ebe nu lo ni.

Ikweyi ki imu nu 5 Owuso kwobonu gbo ko yaha wayi nu bwebe ko Oyesu Okristi, oza ni shotu ko yoya ni oma. 6 Ahan sho Owuso iye ikweyi koneshi ki igyashi nu, ikweyi ke eshi yeye ni odaha ipu ko Oyi nu moshi ni! 7 Bwebe ko oyi ko Okristi pini ngmaha la, oyo ozalabi kaha gbaha. Eshi ko Owuso shoshi kotata 8 ni odaha nwashika ni!

Ipu ko oziyi kpo ogyogye nu 9 Owuso yo oza ni okwobonu gbo ipu kotu nu ni, kweyi oya aha gyo oza ni ogbo teba ni bwebe ko Okristi. 10 Ozani Owuso gbo mani wa gya, owoni ishini gye, oyawa kpo ojoji ni oya ni kpiri ya tukpa, ojoji ni biso kpo oni bese kweyi ya yo Okristi ya kpuwogu.

11 Ojoji kpiri gbodagye byoni Owuso gbo kweyi ogbimu; Owuso shaha shan wase nu ipu ko dudu kpo Okristi ikweyi ko mani, oza ni okwobonu yigbo bwikyikyo. 12 Mani oni ahan wikyikyo ko yiyitagye ipu ko Okristi, ahan shi igyashi ko Owuso iye!

13 Ala ki wase ko Owuso ishini ala pwela ko okwokwoshi, Oshu Neshi ni wa ngmala ni. Ala kyogwu kpo Okristi, kweyi Owuso gwoyi nu ikpiye kala ni sayi mo ala wakaka nu bwebe ko Omaku ko Owuso ni oshokoyi dala ni. 14 Omaku sayi mo aha ba nyoza ni Owuso shokoyi dase nu ni, kweyi omani yaha gye mo Owuso ya ngmase ni wa akakanu. Ahan shi igyashi nu iye!

15 Ikweyi koni, bwishi ni npwela kotuse kala ipu ka Adole Oyesu kpi imu ni ala gbo dase ko Owuso ni, 16 nsho Owuso ko shotunehe danu bita ikweyi kala lo. Nyya rela kala ipu kinarigwu hin, 17 kweyi nyya bo Owuso ka Adole kaha Oyesu Okristi, Ada ki igyashi, shona dala Omaku nu ni ya yala ba ziyi kweyi na sayi Owuso dala shini ala gyo neneshi. 18 Nyya tinarigwu do Owuso na gwotu kala shini ala mo yoyu nu, shini ala gyotuse ni oyala ogwu ni, shini ala gya aboneshi nyakwu ni oshokoyi da ase nu ni, 19 shini ala gyo oshu nu kotata ni ya yoko ipu ka aha ni kyogwu ni. Oshu ni ya yoko ipu ka aha mani oye kponu kpo oshu ko Owuso. 20 Oshu mani pini Owuso yoko kpa anu kweyi sho Okristi iyi bwikwu kweyi yo yagye abore nu ole ki iso la. 21 Okristi woteyi ka awoteyi kpa awine ko oshu kpo oshu kpa awadole kpiri ipu ki iso; Owuso da anu iye ni yohobu ki iye wonyonya ipu kese mani kpe ese ni ya wa ni. 22 Owuso yojoji kpiri yi sheye kikpo ko Okristi kweyi yo wa adole kojoji kpiri kawo ko Owuso. 23 Oda ko Owuso wikpiye ko Okristi, ni wo kpiri-kpiri nu kweyi yojoji gyogya ebebenya ni.