1 Ni olemani oni, ami ni ayun shetu ikweyi koni nyya yoko ka Adole ni, ya ba ala mala bagye neshi gyogye kpogwu ni Owuso yalo ogwu ni. 2 Ipu ki ishi kpiri ala ka zikweyi iso lo, ala gbo otumene, ala zotu. Ala sayi kimu yoya kala bwebe ko gbotu kpi iyikala. 3 Ala takirikwu shala bipu kema kpo Omaku bwebe ko omene ni kpala gbayi ni. 4 Ikpiye woye kponu, Omaku woye kponu, byoni otuse woye kponu ni Owuso yalogwu gipu nu ni. 5 Adole woye kponu, otuse woye kponu, obatisma woye kponu; 6 Owuso woye Ada kase kpiri, ni wa Adole kase kpiri, ni ya yoko kpase kpiri kweyi yipu kase kpiri ni.

7 Ananoho kaha nyeshi gyogye kpo oza ni Okristi daha ni. 8 Byoni Okpa ko Owuso ka ni,

<<Ishini otoshi gisiso ni,

obya awase nwashika ni bo oruduru ni ga kpanu;

oda ase eshi.>>

9 Anani, owoni amo <ogiso> ase nu lemoji? Ela mani sayi mo ikyikyo osa weyeye kese. 10 Mani oni anu ni sa bwiso ni ananu pini toshi giso la, ogiso kweyi gwawiso ta, shini ona yese kpiri na nwonwu kpi iyinu. 11 Anu pini da ase eshi la; oyase shishini wa ayikoko ko Oyesu, ase shishini wa awinobane, ase shishini wa awotono, ase shishini wa awosapa kpa awofoza. 12 Oya mani ko kyase ko Owuso kpiri tu ko yoko ka awogboso, shini ikpiye ko Okristi na gye gohobu. 13 Gbishini kpiri kaha ba woye kponu ipu kotuse kaha kpo ogyogye ko Oyi ko Owuso; aha ba wa zokwu, kweyi ba fi ikpo ko Okristi. 14 Ebeni aba wa ayi leke kelo, ni awo gyase egya ba kpaha geye giso kpowu ko ozafofu wa ni. 15 Abishi koni, ahan ko okwokwoshi ipu ki imu, shini ahan gye ipu ko Okristi, ni wi Ikweyi ni. 16 Bwebe nu igo ki ikpiye kpiri gbayi dudu, kweyi oriho yuwa byi. Mani oni ishi ni agbabo wonyonya yoko ni oshu ko ya ni, ikpiye kpiri ya gye kweyi ya miyinu giso ipu ki imu.

17 Mani oni nyya pyala akpaha ipu kiye ka Adole mo, ala ka le bya ase ni gyo Owuso lo ni, awo kpela yeye shotu 18 ni otu wa yebe dibu ni. Agbabo ipu ko olayi ni Owuso ya dase ni lo, ikweyi koni agyojije lo aki ba zakpaha. 19 Ake gbiweyi lo; aziyiwa doza bibi ko yoya, kweyi agbimu ko shibita lo.

20 Omani pini woza ni ala fu bwebe ko Okristi ni lalo! 21 Ngye mo ala pwoshu nu, kweyi afala okwokwoshi ni yipu ko Oyesu ni, koni ala wa awogboso ni. 22 Mani oni ala pya showe kala nekye bita, ni yala ba yoza ni ala ya ga ni bwebe kimu kozalabi. 23 Owotiri shini otu kala kpela kotu kala na wo opepe, 24 kweyi ala wase pepe, ni Owuso ya byanu ni kweyi sayi kiyinu ipu ko olayi ni yo tiriri ki gbotu neshi ni.

25 Ni olemani oni ala sho kame ko koka bita! Ananoho na ko okwokwoshi do oyinanu, ikweyi koni kpiri kaha wigo kikpiye oye kponu la, ni wo Okristi ni. 26 Ishini okyanya, ka ya anya kyokye wo na yo shini oyozalabi lo. Ka yeno na gagye tawo ipu ka anya kyokye lo. 27 Ka di ibiri owe lo. 28 Ase ni ya wiyi naka wiyi kelo, kweyi na yoko kpa abo nu, shini ona pyoza neshi ni ya tabo ni shona ki tawoleha abo. 29 Ela bibi naka bose bwo okwunu kala lo, na wela ni ya tase abo ni kin, ko tase otugbagba shana gye, shini oza ni oya ka ni na yase ni ya pwo ni oneshi. 30 Ala ka yo otu ko Omaku ko Owuso na bya lo; koni Omaku pini wo olobene ni yipu kala ya sayi mala wa ko Owuso ni la, anu yaha kyogwu otu oye kponu me Eno ya wa ba ni Owuso ya wa ngmala ni. 31 Ala shanya yoya bita, kpo otu wowu, kpanya kyokye, kpa afo gbogbo, kpe esa sosa, kweyi ka yanya kase lo. 32 Abishi koni, ala yi iyikala oneshi ki gbotumene kpi iyikala, kweyi ala yepwo labi gbi iyikala, byoni Owuso rigbala bwebe ko Okristi ni.