1 Ikweyi koni pini ami Obulus ni ayun shetu ikweyi ko Okristi Oyesu ela kawase ni wase ko Oyahuda lo ni, ya tinarigwu do Owuso. 2 Kokwokwoshi ala pwo mo Owuso ipu ko neshi nu oda ami oko mani ko ya ikweyi ko oneshi kala. 3 Owuso sayi koza ni ogbo teba ni dami. Ntenena gbayayi ikweyi nu. 4 Owoni ala moza ni nta ni, ala ba gye mo ngyoza teba ikweyi ko Okristi. 5 Nekye-nekye agwi ikweyi nu da ase lo, anani ke Owuso gwi ikweyi nu bwebe ko Omaku sere da ayikoko nu kpa awinobane. 6 Oza ni ase gye lo oni yoma: bwebe ko oshu neshi ase ni wo Oyahuda lo gbo ogwu kpase ko Oyahuda ipu ka aboneshi ko Owuso; awawigo ki ikpiye oye kponu ki gba abola ipu ko okoyi ni Owuso she bwebe ko Okristi Oyesu ni. 7 Ayun woyole ko oshu neshi bwebe ke eshi ko Owuso, ni odami bwebe ko oshu nu ni ya yoko ni. 8 Ami ni ke wo ojije lo ipu kase ko Owuso ni, odami eshi mani ko tono ko odu ko Okristi ni gbomeyi lo ni da ase ni wase ko Oyahuda lo ni, 9 shini na yase kpiri na moza ni Owuso gbo teba ko wa gbodagye ni. Owuso ni yo ojoji kpiri ni yoza mani teba do oyi wonyonya ni shigbo ni, 10 shini anani, bwebe kawo ko Owuso, awokpogwu kpa awine ko oshu kole ki iso kpiri na gyo Owuso kpo oziyi nu. 11 Owuso ya mani byoni ogbo ko ya ome ona yese ni, owa yoza mani ya bwebe ko Okristi Oyesu Adole kaha. 12 Ipu ko dudu kaha kpo Okristi bwebe ko totuso aha pyoshu ko gobutu ko Owuso kpotu oye kponu. 13 Nyya bala, ala ka gbo otu ikweyi ko owe ni nyya ma ikweyi kala ni lo, kpiri wa ko oneshi kala la.

14 Ikweyi koni nkwagye obutu ka Ada, 15 ni ipwoma wonyonya iso kpe ese pyiye wa bwebe nu ni. 16 Nyya bo Owuso ipu kodu kigyashi nu mo ona dala oshu bwebe ko Omaku nu ko talotugbagba, 17 nkyi ya tinarigwu mo Okristi na yagye ipu ko otu kala bwebe ko otuse. Nyya tinarigwu shala gbogba kpo otu ipu ki imu, 18 shini ala, kpase ko Owuso kpiri, ala gboshu ko gyo owa kpenu, ikpo kpo libwu kimu yoya ko Okristi. 19 Olemani, ko ki gyi imu ko Okristi, koni aba gye kweyi lo ni, shini otu ka ala na lebyo otu ko Owuso.

20 Anu ni bwebe ko oshu nu ni ya yoko ipu kaha ni ko ya shoza ni aba doka ni, kwoza ni yipu kotu kaha ni: 21 igyashi wa ko Owuso ipu ko oda ko Owuso kpipu ko Okristi Oyesu di ishi kpiri, ko gbogbo-gbogbo! Nalemani.