1 Ayene, owoni akwashe ya yozalabi, ala ni bipu ko omaku ni, ala kwikye anu wikweyi ko owe. Ala ke gbera shini ala ka gbo omama lo. 2 Ala zenu kiyikala, bwowe mani pini ala ba ko ono ko Okristi gyogye la. 3 Owoni ashe yama manu woje, oke wojije lo, oya gyiyinu egya pini yoma. 4 Ananoho na miyinu ma ome na gwabotu kpoza ni oyaya ni, wa ko miyinu kpashe la lo, kpiyi nu la. 5 Ananoho na byiyo kiyinu.

6 Aseni afela ko Owuso, oshu ko dase ni foza ni oza neshi bwipu kodu nu koza kese mani.

7 Ala ka gyiyikala egya lo. Ashishe ya gege ya gwo Owuso otu lo. Oza ni otu ni anu pini oya kye la. 8 Ase ni toza ipu kikpiye, bwebe kikpiye oya kyikwu, aseni ke toza ipu ko Omaku, bwebe ko Omaku oya kyo olayi ko gbogbo-gbogbo. 9 Ni olemani oni ahan ka nwa ko yoza neshi lo. Ikweyi koni ishi yawa ba ni aba kyizire neshi ni, owoni ashoza neshi ko yoya bita lo. 10 Ishini aha pyebe ko yoza, an yananoho oneshi, kayi ki ipwoma ko otuse na shoshe.

11 Ala mikpo kenena nyakwu-nyakwu ni nta dala kpa abo hin mani! 12 Awase ni ba yimu ko yala shofu koshu mani wawino zikweyi iso la, kweyi aba gwabotu kpoza komoma kiyi. Aba ya mani ikweyi koni aba yoshi ko megye do oshi ko Okristi ni. 13 Kawase ni ashuwofu ni ba ko Ono gyogye lalo; aba yimu shini ana shala ofu shini ana gwabotu mala geyagye do odu kikpiye mani la. 14 Ami ya gwabotu lo owoni owi ikweyi ko oshi ka Adole kaha Oyesu Okristi lalo; koni bwebe ko oshi nu, ese wokwu ebe hin, ami ki wokwu ebe kese. 15 Ko shofu ko shofu lo owojije la lo; ela ni she ni wela ko womoma pepe. 16 Omene kpiyinyinyi na yo kpawase ni ba ko ono ki Izrayila mani ipu koyagye wa ni, kawa kawase ko Owuso kpiri!

17 Ko gwejeji: ashishe naka yotu hin na fo lo, koni ngbenena ko Oyesu ikpiye hin.

18 Ayene hin, oneshi ka Adole Oyesu Okristi na yo kpala kpiri. Nalemani.