1 Itikpi ki ishayi igwene nki kwikye go Ojerusele kpo Obarnabas kpo Otitus. 2 Ngga ikweyi koni Owuso sayi dami mo na ga ni. Ni ngga ni ngbayi kpa anyakwase kole ko Owuso, nka dawa owe ni nyya tono koshu neshi dawase ni wase ko Oyahuda lo ni. Nkela mani dawa fufuwa okoka shini oko hin ni nyya ga kponi nyya ya anani mani naka woyeye lo. 3 Otitus oya kiyawu hin, koni owase ko Ogirik ni, ashishe kwo koshu ko shofu lo, 4 koni ashini wa yimu shini ona shofu ni, awase mani pa gipu kikpo kaha ko wa gyotu ka, aba ya byo awawo kyogwu kpo Okristi oni, shini ana wa gyotu kominyo ni apye bwebe kema kaha kpo Okristi Oyesu ni, aba yimu ko yaha shan wo oshe, 5 aha ke kyuwogwu lo kpiri-kpiri, shini okwokwoshi koshu neshi na yo kpala.

6 Ase ni ke lema bya awoteyi ni, nyya ka mani ikweyi koni oza ni awe ni shiwo hin lo; Owuso ya mase bwebe komoma kiyi lalo, awoteyi oni woje pepe ebe hin lo. 7 Abishi koni, ama ni Owuso damoko ko tono koshu neshi dofu afafu, byoni odo Obitrus oko ko tono koshu neshi dawase ni shofu ni. 8 Owuso oyun woyikoko bwebe koshu nu gebe kawase ni wase ko Oyahuda lo ni, byoni oyo Obitrus woyikoko gebe kase ko Oyahuda ni. 9 Oyakubu, Obitrus kpo Oyohana, ni lema byawi ite ni, gye mo Owuso pini damoko nyakwu mani la; mani oni adami kpo Obarnabas abo, oni sayi maha kpiri wawoya koko neshi la. Akyogwu kpiyi kaha mami kpo Obarnabas ba yoko ipu kawase ni wase ko Oyahuda lo ni, awa ke ba yoko ipu kase ko Oyahuda. 10 Amo ahan bi rela ka awoleha ni bipu wa ni, oza ni adoka ni kin oma, oza ni nke ya showu koyoya ni.

11 Ishini Obitrus ke wa Antakiya ni ngbapwo iyi kananoho, ikweyi koni ananoho gye mo oyoza gyogye lo. 12 Ome awase no Oyakubu tuwoleho ni na webe ni, oyagye ya roza kpawase ni wase ko Oyahuda lo ni kyogwu kpo Oyesu ni. Ni ango mani ke wa ni, Obitrus sha gitikpi kweyi shozarore bita, ikweyi koni oya yoshi kawase ni ba yela kofu shoshe ni. 13 Mamani ashini ka Ase ko Oyahuda ni kyogwu kpo Oyesu ni kwotu ko yoza byawo yoziyi dudu kpo Obitrus; Obarnabas gbo gipu ko yoziyi kpawa mamani. 14 Ni nma mowe koza yoya wa ga gyogye kpo okwokwoshi koshu neshi lo ni, nka do Obitrus obutu wa kpiri mo, <<Owase ko Oyahuda la, oke ya yoza byase ni wase ko Oyahuda lo ni. Bwowe wonya noya takirikwu ko yawase ni wase ko Oyahuda lo ni na yoko kpo odu kase ko Oyahuda?>>

15 Kokwokwoshi, aha womoma ko Oyahuda la, aha wase ni wase ko Oyahuda lo ni aba yuwogwu mo awinozalabi ni lalo. 16 Kwikyikyeni agye mase ya wase neshi bwebe ko kyogwu kpo Oyesu Okristi kin la, bwebe ko ko Ono lalo. Mani oni, aha kyogwu kpo Okristi Oyesu shini ana yaha wase neshi bwebe kotuse kaha ipu ko Okristi, wa ko ko Ono lalo. Koni ashishe ya wase neshi bwebe ko ko Ono lo. 17 Owoni ake ba takirikwu ko wase neshi ebe ko Owuso bwebe kema kaha kpo Okristi, aki maha wa awinozalabi byawase ni wase ko Oyahuda lo ni, olema byo Okristi ya yoko ko yozalabi na gohobu ona? Olemani lalo! 18 Owoni nkyo oko ko Ono ni nyyi kye ni ma, nsayi kiyun mun wino yo Ono kigbo oma. 19 Mani oni ebe ko Ono, nkwobonu gekwu wa, Ono abiyinu yun ngmo, shini na yiyi do Owuso. Akwobonu yun ngmo kpo Okristi ni ayo poshi ni, 20 mani oni ami pini yiyi ke lalo, Okristi pini yiyi ipu hin la. Oyiyi hin anani, nyyiyi bwebe ko totuso Oyi ko Owuso ni yimu hin kweyi gekwu ikweyi hin ni. 21 Nta hin ko tela koneshi ko Owuso. Owoni asuse ke ya wase neshi ebe ko Owuso bwebe ko Ono, oya lema byikwu ko Okristi woyeye oma!