1 Okpa mani bwebe hin Obulus, ni oshoshu hin ko wo oyikoko ko Oyesu bwebe ka asuse lalo, ke bwebe ko Oyesu Okristi abiyinu la, kpo Owuso Ada, ni yo Oyesu nyiso bwi ikwu ni. 2 Ayene kpiri ni bebeni kpa ami ni ba toleho ko gbogba ga awoda ko Owuso ni bo Ogalatiya ni.

3 Owuso Ada kaha kpa Adole Oyesu Okristi na dala oneshi kpo omene.

4 Oyesu Okristi wa gekwu ikweyi kozalabi kaha, shini ona ngmaha sho oyi bibi mani. Oya mani byoni Owuso Ada kaha ya yimu. 5 Igyashi wa ko Owuso ko gbogbo-gbogbo! Nalemani.

6 Igbashi kwun kotata koni ipu kishi gbayayi ala ba yimu ko shase ni yala ogwu bwebe ko oneshi ko Okristi ni bita, kweyi ba kyogwu kposhu neshi oye hoha. 7 Kokwokwoshi, oshu neshi oye hoha yaba lo. Nke ka mani ikweyi koni agbawase ni ba gyalegya, kweyi ba takirikwu ko yo oshu neshi ko Okristi yi pya ni. 8 Owoni aha kwe oyoleho oye bwi iso wa tono koshu neshi oye gogo kpo olamu ni aha ka dala ni, ona gole kola! 9 Byoni aha kwobonu ka dala ni, nki ya ka dala anani mo: owoni ashe tono koshu neshi oye gogo kpo olamu ni ala kwobonu ze ni, ona gole kola!

10 Ala ba ma mo nyya kela mani shase na kyogwu kpela hin la? Aayi! Owuso pini nyya yimu shona kyogwu kpami la. Ala ba ma byo nyya yimu ko shase otu la? Aayi! Owoni nbi tayayo ya yimu ko shase otu nbi ya wo oyole ko Okristi lo.

11 Nyya yimu shala gye ayene hin, oshu neshi ni nyya tono mani bwebe kasuse la lo. 12 Nnye bwebe ka asuse la lo, ashishe ke fun lo. Oyesu Okristi abiyinu pini sayi anu dami la.

13 Ala pwoza ni nyya ka ishini nyya ko owe kawo Oyahuda ni, nyya dase ko Owuso egye ki ya takirikwu ko yuwa kya. 14 Nko owe ko Oyahuda shawase ni anyiso dudu ni, nziyun do odu kawokyikyi kaha shananoho.

15 Owuso ipu koneshi nu ke shun ome amun la, oyumogwu ko yoko danu. Ishini shotu ni 16 osayi Oyi nu dami, shini na tono ko oshu neshi dawase ni wase ko Oyahuda lo ni, nkpela shashishe ko tumoko lo. 17 Nke go Ojerusele ebe kawase ni kwobonu dami ipu kayikoko ko Oyesu ni lo. Ozani nyya ni ebebeni nggagye ka Arabiya, bwebe ni nkwikye wo Odamasko. 18 Itikpi kishayi eta ome nggo Ojerusele ga mo Okefas ni wo Osimo Obitrus ni. Nyyo obize epa kpanu. 19 Itikpi koni nmo oyikoko ko Oyesu oyoye ke lo, Oyakubu ni woyene ka Adole ni fufunu pini nmo la. 20 Ozani nta dala mani wokwokwoshi, Owuso gye mo nyya kokame lalo!

21 Itikpi koni nggebe shishini agye ko Osiriya kpo Okilikiya. 22 Ishi oni awase kawoda ko Owuso ni bo Oyahudiya ni gyun lo. 23 Aba pwoza ni ase shishini ba ka ni kin la mo: <<Ongo ni ya daha egye ni, anani anu abiyinu ya tono kotuse ni ishi oye oya takirikwu ko yi yishi ni!>> 24 Mani oni asho Owuso iye ikweyi hin.