1 Omani wako omweta ni nyya wa gbaloga ni pini yoma. Okpa ko Owuso ka mo, <<Aba yo okwokwoshi kepwo kpiri ya ngmeyi bwebe ko olobene kase epa kwe eta.>> 2 Nyya yimu ko ka dala ni yozalabi ga itikpi ni kpase ashini kpiri, byoni nkwobonu ka dala owowa hin ko omwepa ni, nki ya kyanu ka anani ni nyyo kpala lo ni: ishini nki wa nyya gbalogo agye kpiri, nyya shashishe bita lo. 3 Ikweyi koni ala ba mojoji ni ala ba yimu ko ma ome shini ala kyogwu mo Okristi ya kela bwebe hin ni. Osha ebe ko yoza kpala lo, oke sayi koshu nu ipu kala. 4 Koni olema byo Okristi gboshu lo ni ayo poshi ni, bwebe koshu ko Owuso pini oki yiyi la. Ipu kema kaha kpanu aha loshu lo mamani; ipu kema kaha kpala ke aba gbingbo koshu ko Owuso ipu ko olayi nu.

5 Ala miyikala ma shini ala gye kwe ala bipu ko otuse. Ala gye mo Okristi Oyesu yipu kala lo? Owoni olemani lo, ala zigbo oma. 6 Ntotuse mala ba gye maha zigbo lo. 7 Anani aba bo Owuso shini ala ka yo ojije labi lo, shini ase na gye maha rogwa lalo, shini ala ke yoza ni shoshi ni, koni ole byaha zigbo ni. 8 Koni aba tela ko okwokwoshi lo, ake ba hagye do okwokwoshi la. 9 Ashotunehe ishi ni aha gboshu lo ala ke gboshu; kweyi aba tinarigwu shini ala gya.

10 Ozani yun tokpa mani ishini nyyo kpala lo ni oma; shini ishini nwwa, naka wa gbalapwo nwashika bwebe ko yoko kpo oshu hin ni Adole dami ni lo, oshu ko zala iso, wa ko yala gbo lalo.

11 Ogwejeji, ayene hin, Owuso na gbaha! Ala takirikwu shini ala gya; ala pwoboba hin; ala kyogwu kpiyikala, ala bagye ipu ko omene. Kweyi Owuso kimu kpo omene ya yo kpala.

12 Ala tiyikala ogbogba kweyi kwiyikala botu ipu ko omene.

13 Eshi ka Adole Oyesu kristi, kpimu ko Owuso, kpo ogeyagye ko Omaku Sere nayo kpa ala kpiri.

14 Nyya beshi ka Adole Oyesu Okristi, kpimu ko Owuso, kpema ko Omaku ko Owuso na yo kpala kpiri.