1 Nyya gwabotu, koni ogbeshi ko ojije lo ni. Nke ya kela koza ni Adole gwamiyi ma ni mina. 2 Ngyongo oye ipu ko Okristi, ishayi igwene ni shigbo ni azo giso ko omweta (ngye lo kwe ogbodagye ipu kikpiye la kwe ipu komaku, Owuso pini gye la.) 3 Nki gye mo ongo mani kwe oyipu kikpiye la kwipu komaku, Owuso pini gye la. 4 Azo gi iso ga pwo oza ni okwunu ka asuse ya gege ya ka lo ni, ela ni ada asuse oshu ko ka lo ni.

5 Mani oni nyya gwabotu kpo ongo mani, nke ya gwabotu kpi iyun lo, nke ya gwabotu ebe ni ngboshu lo ni. 6 Owoni nyyimu ko gwabotu, nyya wikyo lo, ikweyi koni nyya kokwokwoshi la. Nke ya gwabotu lo, shini ashishe naka kami shoshu lo, bwebe koza ni nyya ni kwela ni ala pwo okwunu hin ni.

7 Shini naka zikweyi iso ikweyi kawoza kigbashi ni nma ni lo, adami igye ikpiye hin, ni wo oyoleho ki Ibiri ni, ko tumoshi shini naka zikweyi iso lo. 8 Ntinarigwu igbeta shini Adole na yi bize shun. 9 Oke nyumagbo mo, <<Eshi hin gbayi awo, oshu hin ya yoko neshi ebe ni ase nye ni la.>> Mani oni, nyya gohobu ko gwabotu kpo otunehe ikweyi ko nyonye hin, shini oshu ko Okristi na yipu hin. 10 Abishi ko Okristi, nyya shotunehe ipu ko nyonye hin, ipu kesa, ipu ko owe moma, kpo ozalono. Koni ishini oshu hin nye, nyya loshu.

11 Nyyiyun ya wikyo, ala pini ke yun ya mani la. Ala pini shu ko kami la. Koni nwwojije lo ni, ayikoko nyakwu kala ni shun kpojije lo. 12 Awoza kigbashi nwashika ni nyya ipu kala kpotumene ni shala mo nwwo oyikoko ko Oyesu. 13 Nyyo oda ko Owuso oyoye oneshi shala lo, oza ni nke yala ni pini wo ni nwwegye dala lo ni kin la. Ala rigbun koni nyyala gyogye lo ni!

14 Anani nwwiyunshu wa ko gbaloga komweta, kwikyikyeni nki ya wegye dala lo, ikweyi koni oza ni nyya yimu ni woza ni ala gbo ni lalo, ala pini nyya yimu la. Ayi pini ba tikpo koza da ase ni muwa ni lalo, ase ni mayi ni pini ya tikpo koza dayi nu la. 15 Mani oni, nyya yiyun kpo ojoji ni ngbo ni ya ngmo dala kpo otunehe. Ala ba yimu hin gbayayi koni nyya yimu kala nwashika ni?

16 Byoni owe ni, ala ba kyogwu kpami mo nwwegye dala lo. Ashe ke ya kamo nyyaloziyi, kweyi ngyalegya kpokame. 17 Owe wonya? Nyyaloziyi bwebe kase ni ntoleho ebe kala ni? 18 Nbo Otitus mona gebe kala kweyi ntoyene oye oleho ga kpanu, kwe ala ba mo Otitus yaloza iyi la? Aayi, ami kpanu gbotu oye kponu kweyi ki ba yoza kaha owe oye kponu lalo? 19 Oye lo ala ba ma bya ba yimu ko nyepwo kiyikaha dala la. Aayi! Aba kela byoni Okristi ya yimu kaha koka obutu ko Owuso ni, kweyi ojoji ni aba ya, aba ya ko talabo la, ayene hin moshi. 20 Nyya yoshi mo ishi ni nwwa, nyya wa mala gogo kpoza ni nyya yimu shala we ni, kweyi ala ba mun gogo kpoza ni ala ba yimu shini na we ni. Nyya yoshi mo nyya wa ta apwo gbogbo, kpanya yoya, kpotu yoya, kpo yimu kiyo shase, kpesa sosa, olokwunu agye, zikweyi iso, kpo yoza waya ipu kala. 21 Nyya yoshi ela koni ishini nki wa, Owuso hin ya tumiweyi obutu kala, kweyi nyya byotu ikweyi kase nwashika ni yozalabi itikpi kweyi shagbotu kozalabi wa lo ni: ikweyi keba boba, kpoza bibi shishini naba ya ni.