1 Mani oni, ipu koko kaha dudu kpo Owuso, aba bala ni zeshi ko Owuso ni mala ka yona woyeye lo. 2 Pwoza ni Owuso kani:

<<Owoni ishi ya dami ko miyinyinyi kala,

Nyya pwala;

ishi ni eno gye dami ko ngmala,

Nyya tala abo.>>

Alapwo! Anani wishi kiyinyinyi ko Owuso; ikyeni weno ni ya ngma la!

3 Aba yimu shini ashishe na kwahepwo bwebe koko ka lo, mani oni aha takirikwu shini anka yashishe owe gwu lo. 4 Abishi ko ni, ipu kojoji ni aba ya ni aha sayi kiyika mo ayole ko Owuso bwebe ko zotu kyi gbo otumene kpowe, enyo kpo ozalono. 5 Agwaha ize, ayaha shetu, ashawa ikweyi ka; ayaha yoko shiyika oshu ke eno ko otu, aha gbola ake roza lo. 6 Bwebe kotu neshi ka, kpo ogyogye, kpo ozotu, kpo otu mene, aha sayi maha wayole ko Owuso, bwebe ko Omaku ko Owuso kpi imu kaha ko kwokwoshi. 7 Owoni ako kwokwoshi, kpo oshu ko Owuso. Oneshi ko yoya wiyo kefu ka, ko kpefu kpa ko gbiyi ka. 8 Adaha abokpa kweyi kyi tahanye, akoneshi ka akyi kolabi ka, abo kwokwoshi, mo aba gyase egya; 9 Agyaha ake mawa gyaha lo, akamo agekwu, ake, tayayo gbo olayi. Agwaha ize, ake yaha ngmaha lo. 10 Ayotu ka bya ake ba shotunehe ishi kpiri; awoleha, ake yase nwashika wolodu; ale bya gbojije lo, ake gbojoji kpiri.

11 Ayene hin ko Okorentus! Akela kotata dala; kweyi ayotu ka gwa kpiri dala. 12 Aha pini yotu ka gwu dala lalo; ala pini yotu kala gwu daha la. 13 Nyya kela dala byayi hin: Ala gwotu kala daha byoni aha gwotu kaha dala ni. Ala gwotu kala kpiri!

14 Ka rema kase ni tela ko kyogwu kpo Owuso ni lo, oya ya lo. Oneshi kpo obibi ba rema kiyiwa lo, oyoyu kpe ebe dibu ba bagye dudu lo. 15 Oji yo Okristi kpi ibiri ba kyogwu kpiyiwa? Oji ni inogboso Oyesu gbo ko ya kpase ni kyogwu lo ni? 16 Okoyi wonya ni ole ko Owuso gbo kpe eka? Aha pini wole ko Owuso ni gbo olayi ni la! Byoni Owuso abiyinu ka mo,

<<Nyya yole kpawase hin

nyya yagye ipu wa;

Nyya wo Owuso wa,

kweyi awa ba wase hin.>>

17 Mani pini Adole kamo,

<<Bose shipu wa

shini ogogo kpawa.

Ka gabo oza ni awobi ni lo,

kweyi nyya kyogwu kpala.

18 Adole ine koshu pini kamo,

<<Nyya wa Ada kala,

kweyi ala ba wayi hin.>>