1 Aha gye mo ishini aya adaba ni abanu mani kye, ni wikpiye kaha kese mani, Owuso ya daha ole ko bagye ko gbogbo-gbogbo ipu ki iso ni womoma kabo kasuse lalo ni. 2 Anani ke aba fotu, ikweyi koni aba showu ko gole kaha kiso ni wikpiye kaha pepe ni; 3 ishini oshaha oshiye mani, aba yewewa kelo. 4 Ishini abe ese mani ni, aba fotu koni aba dahowe ni. Aba yimu ko gekwu shini an shikpiye kese mani bita lalo, ake ba yimu kole kiso ko wa yaha gwu la, shini olayi na yikpiye kaha ko gekwu mani me. 5 Owuso pini kwobonu yaha ko shi ikpiye mani la, odaha Omaku nu ko woyi koza ni ogbo shagye daha ni.

6 Mani oni, ipu kishi kpiri aha hagye loshu. Koni agye mo owoni aha bipu kikpiye aha bebe lenu kpole ko Owuso. 7 Aha gbolayi bwebe ko otuse la, bwebe koza ni aha ba ma ni lalo. 8 Aha gbikpiye loshu, kweyi Aba yimu ko shole ka bita ipu kikpiye shi ahan gabagye ole ka Adole. 9 Oni shojoji ni, yoma aba yimu ko ya Adole otusha, ole mani, kwipu kole ka Adole. 10 Koni kpiri kaha ba wa bose obutu ko Okristi shini ona kepwo kaha. Ananoho kaha ya nya abola ko oza ni oya ni gyogye kpoza kpiri naha ya ipu kikpiye kaha ni, oneshi kwe olabi.

11 Aha gye mo oshoshi ko yoshi ka Adole, mani oni aba takirikwu ko ka dase ashini. Owuso gyaha kpiri-kpiri, nki totuse mo ala gyun ipu kotu kala mamani. 12 Aba takirikwu ko kiyikaha dala lalo, ake ba takirikwu shini ala moza ko kaha abiyikala, shini ala gyoza ko ka dase ni ba gwabotu kpo omoma kiyi kase, abishi koza yoya kase ni. 13 Kokwokwoshi aha wo nyoza la? Owoni aha nyoza aha nyoza abishi ko Owuso la. Kwe anyoza lo? Owoni aha nyoza lo aha nyoza lo abishi kala la. 14 Imu ko Okristi pini ya kpaha ogwu la, anani ni aha wa gye mo ongo oye gekwu ikweyi kase kpiri ni, kpiri kase gbingbo ipu kikwu nu. 15 Ogekwu dase kpiri, shini ase ni biyi ni naka bagye diyiwa kelo, ana ke bagye da anu fufunu ni gekwu dawa kweyi Owuso kiyo nyiso kpo olayi abishi wa.

16 Aba kwashishe epwo komoma kasuse kelo. Koni akwo Okristi epwo owe kepwo koka kasuse ni, nabani aba ya mani kelo. 17 Aseni yipu ko Okristi owase pepe. Onekye shigbo, opepe wa. 18 Kpiri koza mani Owuso pini ya la, bwebe ko Okristi oyaha awomonyekwotu nu pya wawoya nu, kweyi daha oko ko yase ashini pya wawoya nu mamani. 19 Oko ni odaha ni yoma: Owuso ya yase kese kpiri ba wawoya nu bwebe ko Okristi. Owuso yozalabi wa ta tagye lo, kweyi otaha oleho ko tono ko yase pya wawoya nu. 20 Mani oni aha pini ba kela abishi ko Okristi la, byo Owuso abiyinu ya kela dala bwebe kaha. Aba bala okwunu ko Okristi: ala bwo omonyekwotu ko Owuso shini ala pya wawoya nu! 21 Okristi gbo ozalabi lo, Owuso ke yo gbingbo kozalabi kaha, shini aha an waseneshi dudu kpanu ebe ko Owuso.