1 Owuso ipu kiyinyinyi nu odaha oko mani koyoya, mani oni kweyi aha ba gbotu lo. 2 Aha shoza ni aba ya teba kpo oza ki iweyi bita; aha ba gyase egya kelo, kwe aba yela ko Owuso ya wokame lo. Aha bagye ipu ko oyoyu neshi ko Owuso. Akyi ba takirikwu ko sayi kotu neshi kaha dananoho obutu ko Adole. 3 Owoni oshu neshi ni aba tono ni teba, oteba ebe kase ni gebi owe ni kin la. 4 Awa ke kyogwu lo, ikweyi koni awowuso ko oyi mani yuwotu gwu, shini anaka mo oyoyu koshu neshi ki igyashi ko Okristi ni wo oyi ko Owuso ni lo. 5 Aba tono ikweyi kiyikaha lalo; aba tono mo Oyesu Okristi wa Adole, aha abiyikaha ke wayole wo ikweyi ko Oyesu. 6 Owuso ni kamo, <<Bwipu kebe dibu ola ya yu!>> ni, ananu pini wo Owuso ni yola nu yu ipu kotu kaha la, shini na wa daha ogyogye kigyashi ko Owuso ni yayu aheyi ko Oyesu Okristi ni.

7 Kwikyikyeni aha ni gbo odu ko Omaku ko Owuso mani lema byo eyi ka agye la, shini na shaha mo Owuso pini gbo oshu nyaku ko ojoji la, aha lalo. 8 Aha mowe ishi nwashika, aha ke kya lo; Ishi shishini aba byotu, aha ke nyowe lo; 9 adahowe nwashika, Owuso ke shahabita lo; ishi shishini agwaha agye, ake ngmaha lo. 10 Ishi kpiri aba zikwu ko Oyesu ipu kikpiye ka ni ya gekwu ni, shini ana mo olayi nu mamani ipu kikpiye ka. 11 Ishi kpiri ipu koyagye kaha abo okwunu kikwu ikweyi ko Oyesu, shini ana mo olayi nu ipu kikpiye kaha ni ya gekwu ni. 12 Omani ya sayi mo ikwu yoko ipu kaha, olayi ke ya yoko ipu kala.

13 Okpa ko Owuso kamo, <<Nka ikweyi koni ntotuse ni.>> Ipu ko Omaku kotuse oye kponu akyi ka mamani ikweyi koni akyogwu ni. 14 Agye mo Owuso, ni ya Adole Oyesu nyiso bwikwu ni, ya yaha ba nyiso kpo Oyesu kweyi ya kpaha kpa ala go obutu nu. 15 Kpiri mani wako oneshi kala la; kweyi byo ni eshi ko Owuso ya febe kase lewewa mani, awa ba shotunehe digyashi ko Owuso kpi inarigwu lewewa kotunehe keshi no dawa ni.

16 Ikweyi koni aba gbotu lo. Koni ikpiye kaha ya gekwu ni, kwikyikyeni ikpiye kaha ko Omaku ya wopepe kurutu. 17 Kweyi owe moma kishi gbayayi mani ya byi igyashi ko gbogbo-gbogbo yawa, ni loshu sho owe kpiri ni. 18 Koni aziyi kaha kwo oza ni aba mani lalo, oza ni aba ma lo ni la. Ikweyi koni oza ni aba ma ni ya rese kishi gbayayi la, oza ni iyi ke yama lo ni ya rese ko gbogbo-gbogbo.